IBA GANA88hui_png

Ngode Datagaliwabehondo biamogo bia lalu olenego ogo

1Anduane Homogo Ngode Datagaliwabe-o i̱naga pele ngiagaore í̠ni kegoni.Horo bibahendengi i̱ biamogo bia lalu olaabo haruli.Mbiraga ngagoha howabi í̠hondo bi laabo haruli.2I̱naga bi larogo hale ha.I̱ pele ngi lowa olalu kogoni hale habe.
3I̱ha genda damene dewaore íbu ngagomei̱ homolene kawareni pu kogoni ndobe.4I̱naga hongo holene ereba hai halui̱ agali áyu dege homole bu karu ale homole kogonida.5Tigua i̱ yu wahayagola agali homeneru baba mandagi kogonida.I̱ agali marume bo wahalu pene ale howahomaliha wiradagua bidogoni.Agali mbira mbirali abogo lalu embedaho wahenebiamogo bibe nahe aibe tobahe hagadagua i̱ haruda laro.6Í̠na i̱ gundu uli timbuni unuraore arumahe wiagoha bape ho waharigonida.7Í̠naga keba holene timbuni wigome i̱ dambi haluiba solowara timbuni bedagome dambi haradagua bu heledegonida.
8Í̠na i̱naga nenegerume i̱ erembira ngialu piai heledegonida.Í̠na i̱ mo koorene ko howa hiriri bini heledegolatigua i̱ handa tara haga ka.Í̠na ani bidegome i̱ dariba ho heledegolahadalu pobe nahe kogoni.9I̱ genda yu kogome i̱naga de ko halu au hara.Anduane Homogo-o i̱na horo bibahendengi i̱naga gi yaraga howa í̠ olalui̱ biamogo bia lalu haabo kogoni.
10Í̠na wali agali homene ngaru mo heya haluagalime nabiagane aleru birilibe.Wali agali homenerume lone heyu howa í̠naga mini yaraga hagabe.11Wali agali homaliha ngarume, Í̠na gubaliniore ho kegoni, lagabe.Dindi mo ko heneha karume, Í̠ mini bilinahe kego, lagabe.12Arumaha karume í̠na agalime nabiaga ale biriliru de handagabe.Dindi ina embedaho waheneha pu karumeí̠na mana bayale tigabi bereru de handagabe.
13Anduane Homogo-o í̠na i̱ biamogo bibelo í̠ olalu ko.Egerebagi bibahendengi i̱na í̠hondo bi lalu haabo haruli.14Bi ani laruligo Anduane Homogo í̠na irane aginaga i̱ erembira ngialu kebe.Í̠na irane aginaga i̱ handa tara halu ha do kebe.15Bamba i̱ igiri emeneni hewangi genda dege yama ibalu henegoáyu nde homolene kawareni haabo kogoni.Í̠na i̱ pani ngirirume i̱naga hongo holene bo pirilape henego kogoni ndobe.16Í̠naga keba holene timbuni ngegomei̱ bo dambi henego kogoni.Í̠na i̱hondo pani ngirigo nguwa dege babi bo baulo waharigoni ndobe.17Horombe mbiragabi urunidagua biaabo harigolaiba li timbuni ibalu bibahende dambi hai hagadagua kome i̱ bo dambi helarigoni.Dindi bibahendeha howa waitigime i̱ bole ho mabu bu hagadaguako dewa uruni i̱ koria ibaabo haga.18I̱naga nenegealiore hearume i̱ erembira ngialu í̠na piai helarigolaainde i̱naga nenege aruma holene dege ngeledegonida.
expand_more
Search