Yarusaleme wali agalime dara howa kiabu dugu binigo ogo
1Yarusalemeni wali agali dewaore ala bu henego ai áyu naheore ngago darabioreda.Ala nde wali agali dindi tara tarani palu ngarume Yarusalemenaga mini yaraga haganegoáyu nde ibu wali mbira agalini homene dalo biraradagua bida.Ala nde ibu kuini wali biragadagua biruwa dindi dewa handa gimbu bu biragagoáyu nde ibu waitigirume bope hayagola habane nabulene garabaya biabe biahaga ale ho bedagoni.2Ala dindi bibahendeme ibula nenege henegoai áyu dindi mbiragome ibula dara hamogo bia ho nabereore.Ibunaga nenege biaru ti ibu mo hondo halu ibunaga waitigi bu hinaya.Ani biyagola mbiraga bibahendengi Yarusaleme ibu dugu biaabo haragola de iba giligala laabo haragoni.3Yuda wali agaliru waitigime mo ko howaoreti dindi mendeha garabaya helo minu yalu pene.Ti dindi taraha hameigini tara tara hearu dombeneha pu howa bayale ndo hene.Ani bu howa ti ibida pobe naheyagolawaitigirume ho mabu bupe howa minu yalu pene.4Saiono tanoha hariga pedagoria wali agali mbira Anduane Homogonaga horo timbuni pongo bo winiangi napiaga.Ani bialu tano pangaru bame duguaho wialu loma binigo mo miaga biarume genda howagomogomo lalu dugu darabi bialu hea.Saionoha wandari biru wiarume genda timbuniore howaSaiono tanoha hearu bibahendeme tandaga timbuni halu dugu bialu hea.5Waitigirume Yarusaleme hondo howatigua Yarusaleme ibugua ti bope naholebira manda buwa ti mogo nale hene.Yarusaleme ibu ko dewa biaabo hayagonaga Anduane Homogohanda genda tandagabi timbuni nelo miniya.Waitigi biarume Yarusaleme waneiginiru dindi kaundiaha minu yalu puwa garabaya bu helene.6Saiono tano mini lene hayago ereba hai haya.Ibunaga agali haguane hearu ti nogo gabua mini diame tani nolene nawidagolagaribi lowa hongo ibiraho hagadagua tinaga hongo ibira halu ibida pobe nahe ka.7Yarusaleme bo gialabagabu wiagola ibunaga wali agaliru dindi bibahendeha hama purogolo heangiibu mbirale bayale bayale ala wiyaru mitangibu dai biragoni.Waitigiru ibuwa Yarusaleme wali agaliru minu yalu piyangi hameigini marume ibu biamogo nabiore.Waitigi biarume Yarusaleme bo gialabagabu waheagola ti hondo oba haya.8Yarusaleme ibu ko dewa biaabo hayagome mbirale ko ngubiore wiaganegobi wini.Bamba hameigini marume ibunaga mini yaraga haganegoáyu ibu ti babe ale heago hondowa mege biyagoni.Anigo Yarusaleme ibu wali mbirame tandaga timbuni nalu biruwa dengui buyi howa dugu bialu biragadagua beda.9Ala ibugua ko biyaru mo paniho wiagolamani marume ibu bo gialabagabu waholobada manda nabi hene.Ani bu hearia ibu bo gialobagabu waore hayagolawali agali mbiramebi ibu dara naheore hene.Ani biyagola ibugua lalu, Anduane Homogo-o i̱naga genda ogoni handa.Waitigirume i̱ hengedape halu bo gialobagabu waore hayago de handabe, lalu hea.10Waitigirume Yarusalemenaga mbirale bayale bibahende wiaru mo page biai haya.Wali agali tara Anduane Homogo mitangi nabiaga hearumeibunaga andaha anda polene nawi lo winigoha anda puwako ogoni biyagola Yarusaleme ibu de hendene.11Yarusaleme wali agaliru tomo nolene nawiyagolagaribi gibiore lowa ti tomo taya bialu howa dugu taraore bialu hea.Ti homa nabi holenaga tomo yolo bialu nole lowatinaga mbirale bayale wiaru baba iriari bialu haga.Yarusaleme ibugua lalu, Anduane Homogo-o tigua i̱ mo ko hene bedogo de handa, laragoni.12Yarusaleme ibugua hariga kaware wigi biagoriani wali agali pugu biyaruhondo olaga bigi bialu,I̱na genda timbuni yu bedogo handadaba.Anduane Homogo ibu i̱la keba taraore howa i̱hondo tandaga timbuniore noliya ngiya.I̱na manda berogola genda ogonibi mbira agali ala henerume nane.Anidago tígua manda beremigola ogoni bame mbira biyadabe toba kamibe.13Anduane Homogohanda daligaha howa ira hedope hayagomei̱naga hongo bope halu kuniru do gedaore helo ibilaya.Ibugua gono mbira winiyagoha i̱ dalu erembirahayagi mo paraho ibira helaya.I̱ yu waore hayagola i̱ homaore birugoni.14Anduane Homogohanda i̱na ko biruru bibahende mo yu ngoai howa pongo buwa i̱ninaga mani wia haya.Ko biruruni genda gibiore yabe naheyago i̱naga hongo biba haya.Anduane Homogohanda i̱ waitigirunaga giha minu ya hayagola i̱na ti baba wai bibe nahe harugoni.15Anduane Homogohanda i̱naga ami hongohe hearuni hondo oba halu erembira miya.I̱naga igiri daliahe hearu bo hilo wahole waitiginaga ami ibilaya.Pu mbira mini gerebi lini pingidalu hengedagadaguai̱naga Yuda wali agaliru hengedo mbaralo wahaya.16Ani biyagome i̱na dugu darabiore bialu i̱naga deha de iba giligala lalu ibaabo haragoni.I̱ pele ngialu mini mo hongo holenebi mbirali naheoreda.Waitigi hearume i̱ bo gialobagabu wahalui̱naga wali agalirunaga mbirale mbira yu wa naheore,lalu Yarusaleme ibugua lene.17Saiono ibu mbiralime biamogo bilo ibunaga gi dogolo amu heagolabiamogo bulene mbira naheoreya.Anduane Homogohanda hameigini maru dindi tara kawareha hearuYagaba hameigini baba waitigi helo ibilaya.Ani ibilayagola waitigi biarume Yarusaleme hondowambirale ngubi mbira handaradagua biyagoni.18Yarusaleme ibugua lalu, Anduane Homogo ibu mini tigabi howai̱hondo biyagoni irane i̱na ibunaga bi mo waharugonagada.Wali agali dindi bibahendeni kamirutígua i̱na bi larogobi hale halutandaga narogobi de handadaba.I̱naga wandari igiri daliahe hearu waitigime dindi kaundiaha garabayabu helole minu yalu piyagoni.19I̱naga nenegerume i̱ biamogo bilo olarugolati i̱ waitigi bu hinaya.Loma binigo mo miagabi agali ala hene miniwi hearubi ti homa nabi holenaga erekui biabe bialutomo nolene taya bialu hearia hariga wiarunaga homo payapaya biya.20Anduane Homogo-o i̱ genda timbuniore yu bedogo de handabe.I̱na í̠naga bi lo wirigo bibahende mo wahalu doga harugomei̱naga miniha mitangi bulene bibahende mo talola hai kagola bedogoni.Tagirahayagi waitigirume i̱naga wali agaliru harigani bo paya bialuai andagaha biru wiarubi homaiore haragonida.21I̱ tandaga nalu dugu bialu wirugoni hameigini maru hearu ti hale howai̱ dara hamogo bulene mbirali naheya.Í̠na genda timbuni i̱hondo ngiriruni i̱ waitigi biaru ti hale howa turuho kagoni.Ala í̠na mana bule lo wirigo lola helo hameledo.Ani lola harangi i̱ waitigi biaru i̱ bedogobi helotihondo mana mbiraore ogonibi dege mibelo hameledo.22I̱na ko biruru í̠na mitangi bu howa pani ngirigoni.I̱ waitigi biarume ko bibahende biyaru mitangi bialu pani i̱ ngirigobi dege mibelo hameledo.I̱ miniha genda halu hongo nahe biruwa dugu timbuni bialu bedogoni,lalu Yarusalemenaga dugu darabiore binigo uruni Yaremaiahanda lene.