1Hadai jò aih raq, i ƀài mangai anoe hlài ka Chuaq Jesus loq Philat khoe jêh đac toq leq ngai Galili, yŏc mahim clai ta ngè tadreo.2Chuaq Jesus doe ka wì haq: “Pì xoh đeh ƀài mangai Galili aih broq yiniq lui cleq yeo qmèq ùh hnau ka mangai Galili qnoeq qmòh, dài wì majah glàm kan haƀo qmang aih?3Au doe ka pì loq: Ùh xài, mahaq tàng pì ùh qnì raxach, èh dìq ka pì hanoh lùng pac qmang aih diq.4Tàng ùh qmang aih, moeq jàt rahem ngai cachìt ka hnim haqnhèq Siloê tùc, aih pì hèm wì haq broq yiniq lui yeo qmèq ka mangai oe ta Jêrusalem qmòh?5Au doe ka pì: Ùh! Mahaq tàng pì ùh raxach, dìq ka pì hadai cachìt lùch qmang aih èh.6Khoe aih haq hi alìah bàu kô: “I moeq ngai pìt dèh ta wuàn plì nho moeq xèm long pŏc, haq loh chaq git plì ta aih mahaq chaq ùh lòm hnoq,7Haq doe ka ƀài wì mangai pìt nho: Khoe piq hanam au loh git plì nòe xèm long pŏc kô mahaq ùh lah i qmòe plì, kau cađac long qmat, gleq majah đòeq haq tawac ngwan toq ka taneh?8Mangai pìt nho padreo bàu: Wì craq, ìh đòeq tam moeq hanam kô hòm, dôq au bŏc dudan taxèm haq khoe aih tah phàn.9Broq braiq atìq èh haq loh plì, ùh qmang aih èh ìh hi koh cađac.
Haqnauq brêh ka mangai yinìq ta hì Sabat
10I moeq hì sabat, Chuaq Jesus mùt hnài tanòe hnim tagop qyoh.11Ta aih i moeq ngai gucadrì, loh ka pen khoe moeq jàt rahim hanam, majah qmang aih kiac rùp baxa haq. Haq kŏc crŏng ùh jah yòng ka qnhoh.12Bu hnoq haq, Chuaq Jesus khoe creo doe: “Yôiq! mangai gucadrì tau, ìh khoe jah brêh ka yinìq”,13Chuaq Jesus hi yŏc tì bèq chac haq. Tajòe hloe, haq aih jah yòng cajang, rai dèch bàu manè apôi Boc plình.14Jò aih, mangai wèq hnim tagop qyoh hnoq Chuaq Jesus broq brêh ka mangai yinìq ta hì sabat, haq aih tapoch hloe ka mangai bàc ta aih: I tadràu hì hu abroq, pì trùh ta ƀài hì aih đòeq hu jah broq brêh ka yinìq ùh hrŏc, ùh dùh trùh dèh hì sabat.15Mahaq Chuaq Jesus tèu haq: “Wùih! Mangai patìah toq enh gùng tau, hì sabat pì ma ùh caqnaih ƀo, caqnaih lùa loh enh cadrong hu tiaq aràng haq lam ôq diac qmòh?16Kon cadrì da Apraham kô, satan khoe rùp kàt haq moeq jàt rahim hanam, ta hì sabat ma ùh khòh lêh caqnaih haq qmòh?”17Haq tapoch qmang aih ƀài mangai ma tagit ka haq loh dŏng ka camaih, yàng da mangai bàc ta aih lem bùi ka trong halac haq khoe broq.
Adrech habài xam blo cadroh
18Chuaq Jesus doe: “Diac Boc plình qmang leq, au yŏc cleq hu alìah?19Diac aih tìah ka moeq pliang clong habài, i moeq ngai aih haq rai deh ta wia, jah hon hi wìa long kàn, chìm trùh broq pù ta hamenh haq.”20Haq anoe hòm: “Au alìah diac Boc plình ti cleq kô hòm?21Diac aih tiàh ka blo, i moeqngai gucad rì yŏc jràu ta piq cađap dàc, trùh dèh jò dàc hi rèu dŏng.”
Qmang haqnop
22Khoe aih Chuaq Jesus tŏc ta Jêrusalem, haq lam pagat enh ƀài plài qyoh trùh plài kàn, rai lam haq hnài wì.23I mangai bòch haq: Waiq Chuaq! Ajoq toq biaq ngai raq ma jah dèch qmòh?24Haq doe ka wì: “Ep ran dìq ka paden đòeq àu mùt ta qmang chit, majah qmang aih au doe ka pì, bàc ngai àu chaq trong hu mùt mahaq ùh jah.”25Jò cla wì craq ta hnim yòng clenh qmang, pì yòng enh gùng clôq qmang rai creo: waiq Chuaq! pèh ka nhèn qmang diq. Mahaq cla wì craq doe: Au ùh qnì ka pì trùh enh leq.26Jò aih èh pì doe: Nhèn khoe acaq, khoe ôq pajùm ti ìh, ti trong ti chòq ìh khoe hnài nhèn.27Mahaq wì craq doe hòm: Au doe ka pì, au ùh qnì ka pì trùh enh leq, dìq dŏng ƀài mangai broq dù tau, drah wia dŏng ma khoe ka au beq!28Jò aih èh, pì hnoq Apraham, Ysac xam Jacôp hloe xam dìq dŏng ƀài mangai pajàu tanòe diac Boc plình, mahaq pì èh jah khwênh qnoh cađac enh gùng, tanòe aih toq crò hmoe xam cadrit hanenh.29Yàng èh, enh gùng mahì loh, enh gùng mahì mùt, enh gùng pah qma, enh gùng pah qngeo, wì trùh hangui ta aniang hu acaq yiniang ta diac Boc Plình.30Aih èh, i mangai atìq jah loh angoe, mangai adroe jah loh ka atìq.”
Herôt enh jêh đac Jesus
31Hadai jò aih, i mangai Pharisi lam doe ka Chuaq Jesus: Ìh pi dùh oe tacô chaq lam taqnoeq beq, Herôt enh jêh đac Ìh,32Chuaq Jesus padreo bàu: “Lam anoe ka chôn aih: Hì kô, hì da èh, au oe drùh hnan kan kiac rai broq brêh kan hinìq tôq, trùh hì mòe, aih èh qnhòng rìh da au hi dìq.33Mahaq hì kô, hì da èh, xam hì mòe au ep lam, majah qmang aih wìa ka mangai pajàu ma cachìt enh gùng ka Jêrusalem.34Wùih! Jêrusalem, Jêrusalem, gè jêh cađac ƀài mangai pajàu, yŏc hmo hibùq ƀài mangai wê bàu trùh ti gè, bàc yàng au enh hacom haqmon pì qmang ka ia kan creo àm dèh kon ta panan, mahaq pì ùh waq!35Kô èh, hnim pì wìa hnim catù. Au doe qmòe ka pì, kô èh pì pi hnoq au hòm trùh hì ma hi doe: Xôq ramot am ka Mangai trùh enh dalam ka Yiniq Chuaq.”