1Phaulô, tiaq manoh Boc Plình thê, broq mangai tiaq cla da Chuaq Jesus Christ, achìh ka mangai hadròeh da Boc Plình oe ta Êphêsô, ka mangai ma ùh tablòq manoh enh dalam ka Chuaq Jesus Christ.2Waiq kan tabàih dech xam kan catèm enh Boc Plình, Baq bèn xam enh Chuaq Jesus Christ jah am ka oh daq.
I bàc xôq ramot am ka mangai khoe jah ràih
3Manè apôi Boc Plình, Baq da Chuaq Jesus Christ bèn, enh dalam ka Christ, haq khoe ùc qnoh rìm xôq ramot yiang enh plình am ka bèn,4adroe ka broq plình crŏng taneh, haq khoe ràih bèn enh dalam ka Christ, đòeq hu broq bèn wìa kan hadròeh pi i qmòe ajang leq hu cwò enh ngèa ka Boc Plình,5majah qmang aih kan loq waq haq khoe taqmroq adroe dôq bèn jah wìa kon ban da haq enh dalam Chuaq Jesus Christ, tiaq manoh lem cla haq,6đòeq hu manè apôi kan ranhòm da kan tabàih haq khoe am dech ka bèn enh dalam Kon cla haq ma loq waq dèh.7Enh dalam ka Christ, bèn jah dèch jah rot hlài xi mahim haq, jah caqnaih da bèn yiniq lui, tiaq kan tabàih dech ùh dìq ùh dài da Boc Plình.8Haq khoe ùc bình bui ka bèn rìm kan rabiaq xam kan qnì loq,9dôq bèn jah loq kan hlèp ta manoh haq, tiaq manoh cla haq khoe padon deh adroe ta kan loq waq haq10đoèq broq trong haq ma khoe padon deh adroe aih ta jò atìq lùch tagop dìq dŏng rìm yiniq hlài ta dalam ka Christ, hloe xam yiniq oe ta trŏc xam ta taneh.11Aih, enh dalam ka Christ bèn hadai khoe jah ràih đòeq wìa mangai wiang jah kùng hang, ma khoe palauq qmòe adroe tiaq manoh Boc Plình aih Mangai broq gêh rìm yiniq tiaq manoh cla enh.12Đòeq bèn kô mangai ma adroe dŏng khoe canòm ka Christ jah calêu manè apôi kan ranhòm da haq.13Hadai enh dalam ka haq, oh daq khoe jah tàng trong joq qnàng, aih raq Bàu lem hu dèch oh daq, jò oh daq khoe lùi haq oh daq jah pateo xi Yiang Hadròeh ma khoe tèu am,14Yiang aih broq ka cajap kùng hang da bèn, trùh jò baxon hlài ƀài mangai haq khoe jah hu manè apôi kan ranhòm haq.
Phaulô waiq khàn ka mangai Êphêsô
15Taiq qmang aih, jò au khoe tàng manoh lùi da oh daq enh dalam ka Chuaq Jesus Christ xam manoh oh daq loq waq ka mangai da Boc Plình,16au ùh hêq ka manè apôi oh daq, jò waiq khàn au ràu trùh yôt oh daq.17Au waiq Boc Plình da Chuaq Jesus Christ bèn aih Baq qngah qngai, am ka oh daq Yiang da kan rabiaq xam kan mahnu ka oh daq đòeq pì canau loq ka haq.18Khoe aih sreo qngah mat ta manoh cliac oh daq, đòeq hu loq trong bèn ma tangèh canòm aih qmang leq, kan padrŏng haq am ka ƀài mangai hadròeh aih dàng leq,19èh loq ka cwìang itai pi cajaq da haq am ka bèn mangai ma lùi aih kàn dàng leq, tiaq cwìang itai aih.20Haq khoe paqnoh ta Christ, jò broq ka Christ rìh hlài enh mangai cachìt rai am haqngui pah qma rađeh oe tanòe Plình,21Yeo haqnhèq dìq dŏng ka ƀài cla craq, ƀài i cwìang, ƀài padren, ƀài bùa xam ƀài i bang i tìang, ùh xài toq ta qnhòng kô, mahaq hloe xam qnhòng atìq hòm.22Haq khoe roh rìm yiniq oe dìq enh qneq ka jènh da Christ, rai am ka Christ broq gàu Tagop Hadròeh,23Tagop Hadròeh aih chac da Christ, aih la kan bình halùih da Mangai ma broq bình rìm yiniq oe ta rìm trong.