2TI2hre_bth
Kan salep da mangai patìh ka Chuaq
1Qmang aih, kon ep canòm kan tabàih enh dalam ka Chuaq Jesus Christ đòeq broq ka rađeh tadêh.2Ƀài yiniq cleq kon khoe tàng ajang au enh ngèa bàc ngai wiang hnoq, kon jao hlài ka ƀài mangai ùh ta blòq manoh cliac, hadai rabiaq ka loq hnài mangai qnoeq.3Drah wiang chìuq xalep ti au qmang ka mangai lình ma tanoq da Chuaq Jesus Christ.4Jò mangai lình lam tajêh, aih pi dôq ƀài yiniq ta qnhòng kô broq ka rađeh tawac, haq broq qmang aih đòeq lem manoh mangai ma creo ka rađeh.5Hanoh qmang aih, mangai cadàu tacadêh tanòe cadàu, ep cadàu troq tiaq dèh ranenh aih èh men jah waq cadoh da mangai blêq.6Mangai abèq ruàng ep xalep adroe òeq, men jah gat.7Ep hèm ma tem bàu au ma anoe ka kon, èh cla Chuaq men am ka kon kan rabiaq ta rìm yiniq.8Ep hmàng rameh Chuaq Jesus Christ, ha-uang loh enh nang noe bùa Đawit, khoe rìh hlài enh mangai cachìt, tiaq Bàu lem da au ma hnài.9Taiq Bàu lem aih dài au majah ep xalep, ra-ùng haq wì kàt au tìah qmòe ka mangai broq trong dù, mahaq bàu da Boc Plình ùh i cabô jah kàt.10Aih ìq dài au majah chìuq dŏng rìm yiniq am ka ƀài mangai ma khoe jah ràih, dôq wì haq hadai jah dèch enh dalam ka Chuaq Jesus Christ hloe xam kan ranhòm mòeq đòe.11Bàu kô cajap joq qnàng:“Tàng joq bèn cachìt ti haq,Aih èh bèn hadai rìh ti haq.12Tàng joq bèn hlàt chìuq qnhroAih èh bèn hadai jah wèq cwìang ti haq,Tàng bèn hangah đac ka haqAih èh Haq hadai hangah đac chau ka bèn.13Tàng bèn loq tablòq manohHaq dua ùh tablòq manoh, majah qmang aih haq aclai ka rađeh ùh jah.”14Kô ƀài yiniq kon ma ep bahmàng rai hnài enh ngèa Boc Plình: ep wia ka hangai kan tarahen trong bàu capoch, trong aih ùh i jah cleq, haƀo toq ka mangai ma tàng đeh.15Drah dìq jaq loq àu đòeq hujah lem ka manoh Boc Plình qmang ka mangai patìh lem geo, yŏc manoh hnhuh jang hu hnài bàu joq qnàng.16Mahaq ep cađac ƀài bàu capoch lech loq, majah qmang aih ƀài mangai capoch trong aih rai èh rai pi qnì iu yùq Boc Plình,17bàu wì haq lênh tìah ka ra-om habau. Ta aih i Himênê xam Philêt,18wì khoe cađac trong joq qnàng, wì doe kan rìh hlài khoe trùh, wì haq raliang đac manoh lùi da qnah ngai qmang aih.19Mahaq xèm cajap da Boc Plình ma broq dèh dua oe raq ùh i tachriah, i bàu parìt qmang kô: “Chuaq loq dèh mangai da haq”, qnah hòm: “Mangai leq ma creo dang ka Chuaq, ep wia ka trong dù.”20Oe ta hnim kàn, ùh xài i toq ƀài cabi wang cabi ƀac, mahaq hadai i tang qnah broq xi long xi taneh, qnah aih palauq hu tah hang canaq, qnah aih palauq hu tah hang hwòt hwat.21Aih èh cabô loq wèq rađeh claih ka ƀài trong qmèq qmang aih, haq jah tìah qmang ka cabi lem, jah basròeh, i lòeq ka cla wì craq, jò leq jò meh toq padon broq yiniq lem.22Hadai ep wia trong mangai radam ma enh, đòeq hu ti chaq trong taq atoq, manoh lùi, loq waq, ti chaq hatroq ti ƀài mangai yŏc manoh hliang creo dang ka Chuaq.23Apaq taqmùt ka bàu tarahen blùng ratùt, majah qmang aih haq loh toq kan talech.24Mangai hapŏng da Chuaq apaq enh ka trong tajênh: mahaq ep acaq oe ma laq alàng ti rìm ngai, loq hnài, ùh hìaq loq hònh,25yŏc kan tabat đòeq hu ƀàt hnài ƀài mangai ma enh tablêq, ngèh ka Boc Plình am ka wì haq kan loq raxach đòeq canau loq trong joq qnàng,26èh wì jah clang đòeq hu doeh rađeh claih ka hlàm kan kiac, majah qmang aih kiac khoe rùp padit đòeq thê wì broq tiaq manoh haq.