1Phaulô, Siwan xam Timôthê achìh ka Tagop Hadroèh oe ta Têsalônica, aih Tagop oe enh dalam Boc Plình, Baq da bèn, xam enh dalam ka Jesus Christ aih Chuaq bèn:2waiq ka oh daq jah kan tabàih dech xam kan catèm enh nòe Boc Plình, Baq bèn xam enh nòe Chuaq Jesus Christ.
Bàu manè apôi sam bàu waiq khàn
3Nhèn ep manè apôi yôt Boc Plình am ka oh daq, trong aih troq, majah qmang aih manoh lùi da oh daq rai èh rai tadèch, kan oh daq loq waq ka dabau rai èh rai bàc.4Qmang aih, oe qne Tagop ma qnoeq da Boc Plình nhèn hadai jah catèh dèh pì oh daq, khoe cajap manoh, khoe qnhrang kan lùi oe qne kan ranàc pì qnang glàm manòeq.5Aih khoe tôm ka yiniq đòeq panhìn kan tah hadarah da Boc Plình aih troq. Haq enh broq dôq ka oh daq jah tajì ka diac da haq, taiq diac aih oh daq majah ep xalep.6Tiaq kan taq atoq da Boc Plình, aih èh haq yŏc kan nanxa đòeq patem hlài ka mangai ma baxa oh daq,7khoe aih am ka pì oh daq mangai qnang xalep jah padài ti nhèn, jò Chuaq Jesus Christ loh enh plình taqne ùnh ma adrènh xam ƀài ƀình plình i cwìang itai da haq,8baxa chau ƀài mangai ma ùh canau ka Boc Plình, ùh iu tiaq Bàu lem da Chuaq Jesus Christ aih Chuaq da bèn.9Wì aih ep chìuq kan raliang hnhung mòeq đòe, hangai ka hadrò Chuaq xam kan ranhòm da kan itai haq,10Aih la hì haq trùh đoèq jah kan ranhòm oe taqne ƀài mangai hadròeh, đòeq jah bàu manè apôi da rìm ngai ma lùi, ta aih i oh daq, majah qmang aih pàng oh daq khoe lùi bàu nhèn anoe.11Aih ìq, dài nhèn majah ùh hêq ka waiq khàn am ka oh daq, đòeq Boc Plình bèn broq ka oh daq jah tajì ka bàu haq khoe creo, đòeq haq yŏc dèh padren hu broq gêh ta oh daq rìm kan loq tamèt oe ta manoh loq waq da haq hloe xam ƀài yiniq broq loh enh manoh lùi;12qmang aih èh, yiniq Jesus Christ Chuaq da bèn jah qngah qngai tanòe oh daq, oh daq oe enh dalam haq, tiaq kan tabàih dech enh Boc Plình bèn xam da Chuaq Jesus Christ bèn.