I JON2hre_bth

1Yôiq wì kon yoh da au, au achìh ƀài yiniq kô ka pì, đòeq pì ùh hìaq broq yiniq lui. Tàng loq i cabô broq yiniq lui, aih bèn i Mangai waiq khàn am ka bèn ajang Boc Plình, aih Chuaq Jesus Christ aih la Mangai taq atoq.2Haq aih broq ramènh đòeq hu baxon hlài da bèn yiniq lui, ùh xài toq da bèn hi hêq mahaq xam dìq ka yiniq lui da crŏng taneh kô. Wèq bàu Boc Plình hnài3Kô hagleq bèn majah loq ka rađeh khoe loq ka Haq, aih pàng bèn khoe wèq ranenh da haq!4Cabô doe: Au loq ka Haq, mahaq ùh wèq ranenh haq, aih mangai loq qnùt, kan joq qnàng blinh ùh oe ta mangai aih.5Mahaq tàng mangai leq wèq bàu haq, aih èh kan loq waq da Boc Plình joq gêh geo ta mangai aih. Aih èh, bèn men loq ka rađeh oe ta haq.6Cabô doe đeh oe enh dalam haq, hadai ep broq tìah ka haq khoe broq.7Yôiq ƀài oh daq au ma loq waq deh, kô ùh xài ranenh au neo achìh ònh ka oh daq, mahaq ranenh dùnh oh daq ma khoe jah enh jò baxèm nèh raq, ranenh dùnh kô aih raq bàu oh daq ma khoe jah tàng.8Mahaq au hadai achìh ka oh daq ranenh neo, aih trong joq qnàng enh dalam ka Chuaq xam ta oh daq, majah qmang aih kan clam cluiq khoe pi i, èh kan qngah joq qnàng khoe sreo qngah.9Mangai leq doe đeh oe ta kan qngah, mahaq git dèh ka oh daq, haq aih oe raq ta clam.10Mangai leq ha-och dèh ka oh daq, haq aih oe ta kan qngah, enh dalam haq aih ùh i ka yiniq cleq ma broq ka wì qnoeq kan catoeh.11Mahaq, cabô tagit dèh ka oh daq, aih haq oe ta nòe clam, broq toq kan clam cluiq rai ùh qnì ka rađeh qnang lam taleq, majah qmang aih kan clam khoe broq ka mat haq pi xau hnoq.12Yôiq ƀài kon qyoh da au, au achìh ka pì kon, majah qmang aih yiniq lui da pì kon canòm ka yiniq Chuaq khoe jah caqnaih.13Ƀài mangai ma broq baq, au achìh ka pì, majah qmang aih pì khoe loq ka Mangai ma i qmòe dèh enh jò baxèm. Ƀài mangai adrùh radam, au achìh ka pì, majah qmang aih pì khoe tablêq kan kiac dù.14Yôiq kon qyoh da au, au achìh ka pì kon, majah qmang aih pì khoe loq ka Baq. Yôiq ƀài mangai ma broq baq, au khoe achìh ka pì majah qmang aih pì khoe loq ka Mangai ma khoe i qmòe dèh enh jò baxèm. Yôiq ƀài mangai radam, au achìh ka pì majah qmang aih pì aih mangai i padren, bàu Boc Plình oe enh dalam pì, èh pì hadai khe tablêq kan kiac dù.15Apaq bêh crŏng taneh kô, hadai apaq bêh ƀài dahwèq ta crŏng taneh kô, majah qmang aih cabô bêh crŏng taneh kô, aih èh kan loq iu yùq ka Boc Plình ùh oe ta mangai aih.16Majah qmang aih rìm yiniq ta crŏng taneh kô: Trong xech akia ma enh, trong mat ma ònh xam trong loq catèh da qnhòng kô, dìq ùh xài loh enh Baq, mahaq loh enh crŏng taneh.17Crŏng taneh kô xam kan plai da haq kô èh hnhung dìq dŏng mahaq mangai maleq ma broq tiaq trong manoh Boc Plình enh, ma aih èh ma oe mòeq đòe.

Ƀài mangai tablêq hlài ka Chuaq

18Yôiq wì kon da au, kô raq jò atìq lùch, pì kon khoe tàng doe mangai tablêq hlài ka Christ ep trùh. Wop manòeq kô i bàc ngai tablêq hlài ka Christ khoe trùh, ajang aih, bèn hu loq aih raq jò atìq lùch.19Wì haq khoe loh enh taqne bèn, mahaq wì haq ùh mòeq bua ka bèn, majah qmang aih tàng joq wì haq mòeq bua ti bèn, aih wì khoe oe ti bèn, mahaq khoe i qmang aih đòeq hu jah patô qnoh wì haq ùh mòeq bua ka bèn.20Mahaq da pì kon, khoe jah kan xùt dàu enh Mangai Hadròeh, aih khoe jah loq rìm yiniq.21Au achìh ka pì kon aih ùh xài pì ùh qnì kan joq qnàng, mahaq taiq pì loq kan joq qnàng, pì loq ùh i ka kan patìah loh enh kan joq qnàng.22Cabô ma capoch qnùt? aih ma ùh xài ƀài mangai ma doe Jesus aih ùh xài Christ? Aih raq Mangai ma tablêq hlài ka Christ, aih ƀài mangai ma doe ùh i ka Baq, ùh i ka Kon!23Cabô ma hangah đac Kon, mangai aih ùh i ka Baq, mangai leq doe đeh loq ka Kon mangai aih hadai loq ka Baq.24Da pì kon, trong pì ma khoe tàng enh jò baxèm ep oe yôt enh dalam ka pì. Tàng joq yiniq pì kon ma khoe tàng qmòe enh jò baxèm oe yôt ta pì, aih èh pì kon hadai jah oe ta Kon xam ta Baq.25Bàu cla Haq ma khoe tèu am ka bèn, aih raq kan rìh halình mòeq đòe.26Au achìh ka pì kon ƀài yiniq kô aih đòeq anoe trùh ƀài mangai ma loq qnùt pì kon.27Da pì kon manòeq kô, dàu pì ma khoe jah xùt enh Chuaq dua oe raq enh dalam pì, qmang aih pi cabô ep hnài cleq hòm, mahaq kan xùt dàu da haq jah hnài pì rìm trong, kan xùt dàu aih joq qnàng ùh xài kan paqnùt, qmang aih thê pì oe ta dalam haq, tiaq qmang ka ƀài bàu hnài pì ma khoe jah tàng.

Kon qyoh da Boc Plình

28Qmang aih manòeq kô, yôiq wì kon qyoh da au, drah oe enh dalam ka haq, đòeq jò haq trùh, bèn jah bình kan cajap manoh, ùh hìaq ep crè xep ta kan camaih jò haq trùh.29Tàng pì loq haq aih kan taq atoq, aih hadai ep loq mangai leq broq tiaq kan taq atoq, aih mangai ma ha-uang loh enh haq.
expand_more
Search