1Phaulo, tiaq manoh Boc Plình khoe jah creo broq mangai Tiaq cla da Jesus Christ, pajùm ka Sothen oh daq bèn,2achìh am ka Tagop Hadròeh da Boc Plình oe ta Corinto, aih ƀoè mangai khoe jah basròeh enh dalam ka Jesus Christ, khoe jah creo mangai hadròeh, sam ka rìm ngai creo dang yiniq Jesus Christ, aih Chuaq da bèn sam da wì aih yac ka wì oe taleq.3Waiq ka oh daq jah kan tabòeh dech sam kan catèm enh Boc Plình, Baq bèn, sam Jesus Christ.
Bàu manè apôi
4Au ùh hêq ka manè apôi Boc Plình, majah qmang aih kan tabòeh dech Haq khoe am ka oh daq enh dalam ka Jesus Christ,5majah qmang aih enh dalam ka Haq oh daq khoe jah padrŏng rìm trong, enh bàu capoch trùh kan rabiaq,6qmang ka bàu nhèn anoe trùh Christ khoe jah cajap taqne oh daq.7Oh daq ùh i blat qmòe mòeq kan tabòeh leq enh Yiang Hadròeh jò oh daq qnang ngèh gòm Jesus Christ bèn trùh.8Haq aih ma broq ka oh daq jah cajap manoh trùh lùch trùh gêh, dôq trùh hì Jesus Chirst da bèn oh daq ùh hìaq i qmòe ajang leq ma ep cwò.9Boc Plình aih ùh tablòq manoh, Haq khoe creo ka oh daq jah taqmùt ti Jesus Christ kon Haq, aih raq Chuaq da bèn.
Thê mòeq manoh ka dabau
10Au canòm ka yiniq Jesus Chuaq da bèn, đòeq hu pariaq dìq ka oh daq ep pajùm mòeq bàu, apaq lah đac dabau mahaq ep mòeq manoh mòeq cliac ka dabau.11Majah qmang aih, enh ƀòe mangai oe ta hnim Ko-lo-ê, au i hìa bàu doe taqne oh daq i kan tagrình ka dabau.12Au enh doe taqne oh daq i mangai doe qmang kô: “Au tiaq Phaulo”; qnah ngai qnoeq doe: “Au tiaq Abo-lo”; mangai qnoeq doe: “Au tiaq Sepha”, maqnoeq hòm doe: “Au tiaq Christ”.13Aleq Christ khoe pah broq baiq qmòh? Ahìaq Phaulo khoe chìuq tiang đình talong pagat am ka oh daq, tàng ùh meh oh daq khoe canòm ka yiniq Phaulo đòeq broq ƀaptem ajoq?14Au manè apôi Boc Plình majah qmang aih enh gùng ka Korit-bu sam Gai-ut, taqne oh daq au qnhòq lah broq ƀaptem am ka cabô,15dôq ùh hìaq i cabô doe oh daq khoe yŏc yiniq au đoèq broq ƀaptem.16Joq au i broq ƀaptem ka mangai ta hnim Sepha-na, enh gùng ka hnim aih au pi hmàng đeh khoe broq batpem am ka cabô hòm.17Majah qmang aih Christ thê au trùh ùh xài đòeq hu broq ƀaptem, mahaq đòeq hu anoe hnài Bàu lem, hadai ùh hnài sam hacùng bàu rabiaq da kon mangai, dôq kan i cwìang itai long pagat da Jesus Christ ùh hìa hnhung đac.18Majah qmang aih, ƀòe mangai ma hnhung lùch wì doe bàu ma hnài trùh long pagat aih kan ratùt, mahaq da bèn mangai ma khoe jah dèch aih raq cwìang itai da Boc Plình.19Majah qmang aih i bàu khoe achìh: “Au raliang đac kan rabiaq da mangai rabiaq,Au palùng đac kan loq da mangai loq”.20Mangai rabiaq oe taleq? Mangai hnài ranenh taleq? Mangai rabiaq ka hadrah qnhòng kô oe taleq? Ajoq Boc Plình khoe broq kan rabiaq da crŏng taneh kô loh ka ratùt ùh?21Majah qmang aih taiq crŏng taneh kô canòm dèh kan rabiaq cla, ùh canòm kan rabiaq da Boc Plình đòeq hu canau ka Boc Plình, dài Haq majah lem bùi dèch ƀòe mangai i manoh lùi ajang bàu hnài da mangai blùng qmang ka nhèn.22Jò mangai Juđa bòch toq kan halac, mangai Gorec chaq toq kan rabiaq,23mahaq nhèn anoe toq Christ tiang đình talong pagat, aih kan catoeh ka mangai Juđa, mangai diac wì doe aih kan blùng;24mahaq da bèn mangai ma khoe jah creo yac ka mangai Juđa yac ka mangai Gorec Christ aih kan itai sam kan rabiaq da Boc Plình.25Majah qmang aih kan blùng da Boc Plình aih rabiaq yeo hnau kan rabiaq da mangai, kan ùh nèn da Boc Plình aih yeo dêh ka padren mangai.26Hèm beq! taqne pì oh daq ma khoe jah creo, tiaq qnhòng kô pì ùh i bàc ngai rabiaq, ùh bàc ngai i cwìang, ùh bàc ngai rahù ranhòm.27Mahaq Boc Plình khoe yŏc kan blùng ta crŏng taneh đòeq broq ka mangai rabiaq camaih, Boc Plình yŏc kan ùh nèn ta crŏng taneh đòeq baxep ka mangai tadêh.28Boc Plình khoe yŏc kan ùh cra, kan wì ma jù lê cađac, sam ƀòe yiniq ùh i hnoq, đòeq broq ƀòe yiniq xau hnoq loh ka pi i hnoq,29dôq ùh i mangai leq jah padèch rađeh enh ngèa Boc Plình.30Qmang aih, canòm ka Haq oh daq ma khoe jah oe ta Jesus Christ aih Mangai Boc Plình ma khoe broq Haq wìa kan rabiaq, kan taq atoq, kan hadròeh sam kan dèch dìq ka bèn;31đòeq tìah ka bàu ma khoe achìh: “Cabô catèh rađeh, ep catèh enh dalam ka Chuaq”.