याकूब उन मिस्त्र साटी होगोद
1आग इस्त्राएल तान सप्पा येनारा हुडुकु बेर्शेबा अक होदुन, अदिक अल तान आप्प इसहाक उन परमेश्वर उक बलिदान येर्सदुन.2आग परमेश्वर इस्त्राएल से ईळ्लक इक दर्शन दा अंदुन, “हे याकूब हे याकूब.” आव अंदुन, “येन आग्या.”3आव अंदुन, “ना परमेश्वर नीन आप्प उन परमेश्वर हुईन, नी मिस्त्र होगली अंजबाळ; यतिकी ना नीन से अल ऊंद धोळ्द जाती माळाईन.4ना नीन सांगुळ सांगुळ मिस्त्र अक बरतीन; अदिक ना नीनी अल बाक सही दा तराईन; अदिक यूसुफ तान कय देल नीन कण्ण इक बंद माळ्यान.”5आग याकूब बेर्शेबा टु नळदुन; अदिक मिस्त्र ताका यात्रा माळदुन, इस्त्राएल उन चिकोर, मतलब याकूब इन चिकोर तान आप्प, तान हिंग्सगोळ अदिक तान सप्पा चिकोर इक मिस्त्र तंदुर, आंदुर फिरौन द्वारा कळुकु आगीदव आ गाळागोळ देल यात्रा माळदुर.6आंदुर तान व्हात मर्र, वस्ता गोस, अदिक कनान द्याश दा तान जमा माळ्द सप्पा धन इक हुडुकु मिस्त्र दा बंदुर.7अदिक याकूब तान पोर पारगोळ, नातु नातीगोळ, मतलब तान वंश इक तान सांगुळ मिस्त्र दा तंदुन.8याकूब उन सांगुळ जो इस्त्राएली, मतलब आऊन पारगोळ, नातीगोळ, पयले मिस्त्र दा बंदुर, आंदुर हेसुर ईव आव याकूब उन धोड्डेव पार रूबेन ईरोन.9अदिक रूबेन उन पार हनोक, पल्लू, हेस्त्रोन, अदिक कर्मी ईरव.10शिमोन उन पार, यमूएल, यामीन, ओहद, याकीन, सोहर, अदिक ऊंद कनानी आर्त से पैदा आगीदुन शाऊल भी ईरोन.11लेवी इन पार गेर्शोन, कहात, अदिक मरारी ईरोर.12यहूदा अन एर, ओनान, शेला, पेरेस, अदिक जेरह हेसुर इन पारगोळ आगीदुर; लेकीन एर अदिक ओनान कनान द्याश दा सोतोगीदुर; अदिक पेरेस उन पारगोळ, हेस्रोन अदिक हामुल ईरोर.13इस्साकार उन पारगोळ, तोला, पुब्बा, योब अदिक शिम्रोन ईरोर.14जबूलून उन पारगोळ, सेरेद, एलोन, अदिक यहलेल ईरोर.15लियाह अन पारगोळ जो याकूब देल पद्दनराम दा पैदा आगीदुर, आंदुर पारगोळ नातीगोळ ईंदुर अच ईरोर, अदिक ईंदुर से येक्कुल आव आंदुर सांगुळ ऊंद पोर दीना अक जनम कोटीदुन. ईल ताका रा याकूब उन सप्पा वंश वाळेर तैतीस लॉकुर आदुर.16बाक गाद इन पारगोळ, सपोन, हाग्गी, शूनी, एसबोन, एरी, अरोदी, अदिक अरेली ईरोर.17आशेर इन पारगोळ, यिम्ना, यिक्ष्वा, यिक्ष्वी, अदिक बरीआ ईरोर, अदिक आंदुर आकतींग सेरह ईरोर; अदिक बरीआ अन पारगोळ, हेबेर अदिक मल्कीएल ईरोर.18जिल्पा, यारी लाबान तान पोर लियाह अक कोटीदुन, आऊन पारगोळ नातीगोळ पयले ईंदुर अच ईरोर; अदिक आऊन द्वारा याकूब उन सोलह लॉकुर पैदा आदुर.19बाक याकूब उन हिंग्स राहेल इन पारगोळ यूसुफ अदिक बिन्यामीन ईरोर.20अदिक मिस्त्र द्याश दा ओन नगर इन याजक पोतीपेरा अन पोर आसनत देल यूसुफ उन पारगोळ पैदा आदुर, मतलब मनश्शे अदिक एप्रैम.21बिन्यामीन उन पारगोळ, बेला, बेकेर, अश्बेल, गेरा, नामान, एही, रोश, मूप्पीम, हूप्पीम, अदिक अर्द ईरोर.22राहेल इन पारगोळ जो याकूब से पैदा आदुर आंदुरोर ईंदुर अच पारगोळ ईरोर; आऊन ई सप्पा पारगोळ नातीगोळ चौदहा औलाद आदुर.23बाक दान उन पार हूशीम ईरोन.24नप्ताली इन पारगोळ, यहसेल, गूनी, येसेर, अदिक शिल्लेम ईरोर.25बिल्हा दासी, यारी लाबान तान पोर राहेल इक कोट्टुन, आऊन पारगोळ, नातीगोळ ईंदुर अच हुळ; आऊन द्वारा याकूब उन वंश दा येळ औलाद पैदा आदुर.26याकूब उन निज वंश इन प्राणी जो मिस्त्र दा बंदुर, आंदुर आऊन सास्सागोळी बिटकु सप्पा छियासठ लॉकुर आदुर.27अदिक यूसुफ उन पारगोळ, जो मिस्त्र दा आऊन से पैदा आदुर, आंदुर येढ्ढ प्राणी ईरोर; ई प्रकार याकूब उन घराना अन लॉकुर जो मिस्त्र दा बंदुर आंदुर सप्पा मुंदुर सत्तर आदुर.याकूब अदिक आऊन परिवार मिस्त्र दा
28बाक आव यहूदा अक मुंद यूसुफ उन हाती कळुदुन कि आव आऊक गोशेन इक हाती तोरस्यान; अदिक आंदुर गोशेन द्याश बंदुर.29आग यूसुफ तान रथ तेगुकु तान आप्प इस्त्राएल उन सांगुळ मुलाकात माळोर साटी गोशेन द्याश इक होदुन, अदिक आऊन से मुलाकात माळकु आऊन याद्दी अक चिपकुसोन, अदिक हापाळ समय ताका आऊन याद्दी इक चिपकुसकु वर्लतेला ईत्तुन.30आग इस्त्राएल यूसुफ से अंदुन, “ना ईग सोतोगाईन भी रा खुश आईन, यतिकी नीनी जीत्ता नोळदीन अदिक नीन बाय नोळ कोंडीन.”31आग यूसुफ तान वार्टुर से अदिक तान आप्प उन घराना सांगुळ अंदुन, “ना फिरौन उक होगकु ईद समाचार कोळाईन, ‘नान वार्टुर अदिक नान आप्प उन घराना अन सप्पा लॉकुर, जो कनान द्याश दा ईर तोगोर, आंदुर नान हाती होट्ट बंदार;32अदिक आंदुर चरवाहा आर, यतिकी आंदुर जनावरगोळी पाल्सतार; इदुरसाटी आंदुर तान मर्र म्यांडा, गोसी वस्ता, अदिक जो येनारा आंदुर्द आद, सप्पा तंदार.’33याग फिरौन नीमी कारूकु केळ्यान, ‘नीम्द क्याल्सा धंदा येन आद?’34आग अनेतीर, ‘नीन दास लड़कपन टु हुडुकु ईंद ताका जनावरगोळी पाल्सतेला बंदेव, बल्की नाम हाळाबाट्टगोळ भी हिंगा माळतेला बंदार.’ ईदुर देल नीव गोशेन द्याश दा ईर सकीर; यतिकी सप्पा चरवाहागोळ से मिस्त्री लॉकुर सिट्ट माळतार.”