IEREMIA46hmo_png

Aigupito taudia be tuari idia lusi Karakemisi dekenai

1Lohiabada ena hereva be lau Ieremia dekenai ia mai, bese idauidau totona:
2Hereva ginigunana be Aigupito totona:
Farao Neko, Aigupito ena king, ena tuari taudia orea be Karakemisi dekenai idia kamepa, Euperate Sinavai ena isena dekenai. Vadaeni Nebukanesa, Babulonia ena king ese idia ia halusia. Unai be Iehoiakimi, Iuda ena king Iosaia ena natuna tau, ena king lagani namba 4 lalonai.
3Aigupito tuari biagudia idia boiboi noho,idia gwau,“Keme auri dabua,bona kesi do umui abia hegaegae,tuari dekenai do umui raka lao!4Emui hosi edia varo do umui kwatua,bona hosi guia taudia e,emui hosi do umui guia!Ta ta emui gabu, emui gabu dekenai do umui gini,emui auri kwara gaudia do umui atoa!Emui io matadia do umui segea namonamo!Emui auri tuari dabua do umui karaia hegaegae!”
5To Lohiabada ese ia nanadaia, ia gwau,“Dahaka lau itaia noho?Aigupito tuari taudia be mai gari bada danu idia giroa mai noho.Kahana taudia ese idia halusidia noho.Mai gari bada danu idia heau haraga noho,bona edia matadia idia negea lou lasi.6Inai heau haraga taudia,be idia heau mauri diba lasi.Tuari taudia ese mauri idia davaria diba lasi.Mirigini kahanai, Euperate Sinavai ena badibadinai,idia be idia hekwakwanai,bona idia moru diho noho.”
7Inai orea be daika,Naila Sinavai bamona ia toreisi noho?Sinavai ta, abata dainai,iena isena korikori ia heau hanaia mai goada danu bamona.8Inai be Aigupito,Naila Sinavai bamona ia toreisi noho.Sinavai ia abata dainai,iena isena korikori ia heau hanaia noho.Aigupito ia gwau, “Lau ese do lau toreisi,bona tanobada kahana ibounai do lau hanaia, do lau abia.Lau ese hanua badadia do lau hadikaia ore,bona edia taudia do lau alaia ore.9Hosi e, do umui heau vaira!Kariota e, do umui heau goada lao!Tuari taudia e, do umui raka lao,Etiopia bona Libia dekena amo mai taudia, mai emui kesi,bona Ludia taudia, peva diba momo taudia.”
10Aigupito ese unai bamona ia hereva,to unai dina be Lohiabada,Siahu Ibounai Lohiabada ena dina,badina hari dina ia ese dika ena davana do ia henia,ia dekenai idia tuari henia taudia edia dika davana,be do ia henia momokani.Lohiabada ena tuari kaia ese idia do ia ania,ela bona ia boga kunu,bona edia rarana do ia inua,ela bona ia ranu mase lasi.Hari inai dina dekenai Siahu Ibounai Lohiabada ese,boubou karana do ia karaia,mirigini kahana tano dekenai,Euperate Sinavai ena badibadinai.11Lohiabada ia gwau,“Aigupito taudia e,Gileada dekenai do umui lao,gorere hanamoa muramura do umui tahua.Umui emui muramura ibounai,be umui gaukaralaia kava vadaeni.Umui sibona emui gorere hanamoa dalana ta be lasi.12Bese idauidau ese,emui hemarai ena sivarai idia kamonai vadaeni.Tanobada taudia ibounai ese,emui tai idia kamonai vadaeni,badina be tuari tauna ta be tuari tauna ma ta danu,idia bamepa bona hekwakwanai,bona ruaosi be tano dekenai idia moru diho hebou.”

Nebukanesa ia mai noho

13Lohiabada ese lau, peroveta tauna, Ieremia dekenai ia hereva henia, Nebukanesa, Babulonia ena king, ese Aigupito tano tuari henia totona ia mai neganai. Lohiabada ia gwau:14“Aigupito lalonai do oi herevalaia,Migidola lalonai do oi gwauraia.Memepisi lalonai bona Tapanese lalonai,do oi gwauraia hedinarai,do oi gwau, ‘Do umui gini hegaegae noho,badina be tuari ese umui idia hagegea noho taudia ia alaia noho.’15Badina dahaka emui boromakau tau dirava badana Apisi,be ia moru diho vadaeni?Lohiabada ese ia doria diho vadaeni.16Emui tuari taudia do idia heau neganai,do idia hekwakwanai, do idia moru diho.Idia ta ta dekenai idia hereva, idia gwau,‘Karaharaga, iseda bese korikori gabuna,iseda vara tano dekenai do ita giroa lou,inai tuari taudia dekena amo do ita heau mauri!’
17“Unuseni Farao, Aigupito ena king dekenai,ladana matamata do idia henia, inai bamona:‘Hereva momo tauna,nega namona ia diba lasi tauna.’
18“To lau, Siahu Ibounai Lohiabada, be King Badana.Lau be mauri ena Dirava.Taboro Ororo be ororo ibounai edia huanai,ia sibona be ataiai bamona,bona Karamele Ororo be davara badibadinai,ia ataiai herea bamona,unai bamona danu, Aigupito do ia tuari henia tauna,ena goada be bada herea.19Aigupito dekenai noho taudia e!Emui gau bona kohu do umui haboua hegaegae,gabu daudau dekenai,umui do idia abia lao dainai.Badina Memepisi hanua,be tano kaukau do idia halaoa,gabu dikana do ia lao,tau ta do ia noho lasi gabuna.
20“Aigupito be boromakau hahine matamatana,mai ena hairai danu,to mirigini dekena amo nanigo ta ese ia koria vadaeni.21Aigupito ena tuari taudia,moni dekena amo idia hoia taudia,be manoka, boromakau natudia bamona.Idia gini auka lasi,idia tuari henia lasi,idia ibounai ese tuari dekena amo idia siri,bona mai gari danu idia heau lou hebou.Badina be edia hisihisi dinana be ia ginidae,edia davana abia negana.22Aigupito be tuari ia lusi ena regena,be gaigai ia rau lao ena regena bamona,badina Aigupito hadikaia gwauraia tuari taudia,be idia raka mai noho mai edia goada danu.Idia be mai edia ira danu,Aigupito do idia hadikaia totona idia mai noho,au idia utua diho taudia edia kara bamona.”
23Lohiabada ma ia gwau,“Momokani, Aigupito taudia be momo,uda be mai ena au momo bamona,to tuari taudia ese uda idia hadikaia ore.Unai tuari taudia be momo herea,duahia diba lasi.Edia namba ese kwadi edia namba idia hanaia.24Aigupito taudia be do idia hemarai bada,badina be mirigini kahana dekena amo bese taudia,ese do idia halusidia.Lau inai Lohiabada lau hereva vadaeni.”
25Siahu Ibounai Lohiabada, Israela ena Dirava, ia hereva, ia gwau, “Kamonai, lau ese Amona, Tebe ena dirava, bona Farao, bona Aigupito ena tano, bona ena dirava bona king ibounai danu, edia dika davana do lau henia, bona Farao idia abidadama henia taudia ibounai edia dika davana danu.26Edia mase dalana idia tahua noho taudia edia siahu henunai do lau atodia, Nebukanesa, Babulonia ena king, bona iena lohia taudia edia siahu henunai. To gabeai Aigupito dekenai taunimanima do idia noho lou, nega gunadia hegeregerena. Lau inai Lohiabada lau hereva vadaeni.”

Lohiabada ese iena bese taudia do ia hamauria

27Lohiabada ma ia gwau,“Egu bese taudia e,do umui gari lasi,Israela taudia e,do umui gari bada lasi.Kamonai, lau ese gabu daudau dekena amo,umui do lau hamauria.Emui natudia, bona tubudia danu be mai guia danu,to idia noho tano dekena amo, idia do lau hamauria.Iakobo ena bese taudia,be edia tano korikori dekenai do idia giroa lou,bona maino dekenai do idia noho.Noho namo do idia davaria,bona tau ta ese idia do idia hagaria lasi.”28Lohiabada ma ia gwau,“Egu hesiai tauna Iakobo e,do oi gari lasi,badina lau be oi danu lau noho.Momokani idia dekenai oi lau lulua lao besedia ibounai,be lau ese do lau hadikaia ore.To oi be do lau hadikaia ore lasi.Oiemu dika ena davana korikori,be oi dekenai do lau henia,to lau ese mai egu kota maoromaoro,bona egu laloa momokani danu, oi do lau matakani henia.”
expand_more
Search