Tsupuniyaxi3hch_wb2

Kerutsareme manutimietsie kemɨtiyɨni

1Xɨa'ui kiekari hipame pemɨwananaima,pemɨkaheu'ena meta tita 'axamɨti'ane pemɨrexeiya.2Mɨkayu'ɨxatsitɨarinɨa,meta mɨkatiyuxatɨarinɨa.Yawé hetsie yuri mɨkati'erie,meta yukakaɨyari hetsɨa 'ahurawa mɨka'uyeika.3'Itsɨkate mana memanuka'umayetsi memɨtehaketɨkɨka wahepaɨ mepɨ'anene,wakuwexinaruritsixi 'ɨrawetsixi yɨwikɨta memuku'uwa mekanihɨkɨtɨnitita memɨtetakwani tixaɨtɨ mepɨkatekuhayeikawa memɨkakayeikienikɨ.4Kakaɨyari niukametemama mana kiekatari mepɨte'itawa,Kakaɨyari mepuku'eiri.Mawari wewiwamete piinite netukita timieme katipatsiekame mepɨte'ayeitɨa,meta 'aitsika kemaine yamepɨkatekahu.5Matsi Yawé mana muka kemɨtiheitserie yapɨtiyuriene,kemɨkatiheitserie pɨkatiyuriene.Xexuime tukari mukatataretsie kemɨtiheitserie yapɨtiyuriene,meta pɨkatihayewa tukari mɨyehane mukatataretsie,peru 'axatiyuruwame tewiyarika pɨkamate.
6«Nekaniwaruka'una nuiwarite,kanakumawere wakuraru meta watuxiyu.Nekanihayewa kaye 'utɨa teɨteri 'umaweme,nixewitɨ tɨma mɨkɨ 'utɨa pɨka'uyeika.Kaniuyuhayewa wakiekarite 'u'unitɨ,nixewitɨ pɨkayuhayewaxɨ mana mukanikɨ.7Kiekari mɨpaɨ nepɨtiutahɨawixɨ:“Yurikɨ pepɨnetsi'ayemakaxeni,kenemɨmetita'ɨxatsitɨani pepeu'enani”.Hikɨ 'ayumieme wakiekari pɨkaka'unarienikekai,naimekɨ nemɨtita'aitɨakaikɨ.Peru mɨyatɨtɨ, meyumexɨitɨatɨ mekanakɨne pɨta'axamemɨteyurienikɨ naime hepaɨtsita.8'Ayumieme xekenenetakwewieka,yapauka nepɨrayu'iwa—Yawé mɨpaɨ kanaineni—,'ari nuiwarite neniwakuxeɨrimɨkɨ,meta te'aitametenemɨtiwakwinitɨanikɨ nehaxɨakɨ,meta naimekɨ kenemɨreuha'a.Ne'ɨtetsarika taiyariyarikɨ,naitɨ kwie kanakuxɨtsitɨariemɨkɨ.
9»Teɨteri 'aixɨa me'utiyuaneme nekaniwarayeitɨamɨkɨ,para yunaitɨ memɨnetsihahɨawenikɨ Yawé kenemɨtitewameta memɨnetsi'ayexeiyanikɨ yaxeikɨa meteyukɨhɨawetɨ.10Kutsi hatɨayari manuyehapane 'anutaɨye me'anexɨame,'imikieri mekaneni'atɨiriekunimemɨnetsi'ayexeiya, neteɨterima memeutaxɨriexɨa.11Mɨkɨ tukaritsie tewiyarika xepɨkapitɨarieniri,'ari 'axaxeteyurietɨ nehepaɨtsita xepɨtehayewa.Nekaniwarayeweiyamɨkɨ xetsatamɨkɨ teɨteri mamariwemete memayuyeitɨwa,hikɨ 'ana mepukumawere memɨyuti'ɨrenehɨri makupatsietsie.12Mekaniyuhayewakuni xeikɨa,tixaɨtɨ memɨkatehɨkɨ.Mɨkɨ Yawé hetsie memɨtewiya memɨhɨkɨkɨ,13'etsimeyupaɨmetɨ memɨyuhayewaxɨ 'ixaheritsixi,tita 'axamɨti'ane mepɨkateyuriekari,'itarikakɨ mepɨkatekuxatani,kwamanarikakɨ mepɨkatekuxatani.Mekateniutikwa'akuni meta mekaniuka'uxipiwekuninixewitɨ kawamariutakaku».
14Keneutahiwani, neniwe 'uka Tsiyuni, temawierikakɨ,memɨtehayu'iwa wahepaɨ xeketeneuhiwani, 'ixaheritsixi.Xekeneutikwikani meta xekeneyutemamawieka yu'iyarikɨ,neniwe 'uka Kerutsareme.15Yawé pɨkatixekwinitɨaniri,kaniwarutaweiya memɨmetsi'aye'unie.Yawé, 'Ixaheritsie ti'aitame, xetsata kaniukani:hatsuakuri pepɨkaheumaka.16Mɨkɨ tukaritsie Kerutsareme mɨpaɨ pɨtitahɨawarieni:«Tsiyuni, pepɨkamaka meta pepɨka'utaweranareni,17Yawé 'akakaɨyari 'ahamatɨa kaniukanimɨkɨ kuya mɨrayu'iwa pɨhɨkɨ.Pɨyutemawieka 'ahetsiemieme,pɨmetsihekwariyani yunaki'eriyakɨ,kaniutakwikamɨkɨ yutemawietɨ 'ahetsiemieme18'ixɨarari mɨhɨkɨtɨni hepaɨ».«Ne xehetsie nepɨtanuani xemɨkahiweritɨarienikɨri,mɨixari kexemɨte'anuyehu xetewiyatsitɨarietɨ.19Mɨkɨ tukaritsie ne nekaniwaranukuweiyamɨkɨkemɨ'ane waɨriyarika memɨtexe'aitɨa,nepɨwatawikweitsitɨani muxatsi memɨ'ɨkamɨmɨri,meta nekaniwaranukuwaumɨkɨ memeuyexɨri.Xeme xemariwame waɨkawa nepɨxe'ayeitɨani'iya nuiwarite watsata hakewa xemetewinɨarie.20Mɨkɨ tukaritsie ne nekanixe'atɨamɨkɨ,mɨkɨ tukaritsie nepɨxekuxeɨrieni.Xeme xemariwame waɨkawa nepɨxe'ayeitɨaniyunaime teɨteri kwiepa memɨtama watsatakepauka nemɨxehakunuitɨani mɨkɨ wahɨxie'ateewa xehehapanieku».Mɨpaɨ kaniutayɨni Yawé.
expand_more
Search