Tsupuniyaxi1hch_wb2

1'Ikɨ Yawé niukieya kanihɨkɨtɨni, Tsupuniyaxi kemɨtiutahɨawarie Kutsi nu'aya, mɨkɨta Kerariyaxi nu'aya, mɨkɨta 'Amariyaxi nu'aya, mɨkɨta 'Etsekiyaxi nu'aya, kepauka mɨti'aitakai Kutsiyaxi 'Amuni nu'aya, Kura kwieyaritsie:

Kememɨte'utaxatɨarie kememɨteka'unarieni 'arike

2«Meteyunaime nepɨtiwareuyehɨanikemeteyupaɨmetɨ kwiepa memɨtexuawe—Yawé mɨpaɨ kanaineni—.3Teɨteri meta tewaxi nekaniwareuyehɨamɨkɨ,meta memɨte'awɨwawemeta haramaratsie memɨteye'uwa,metatsiere kakaɨyarixi memɨwewiyatɨka metatsiere teɨteri 'axamemɨte'u'iyari yaxeikɨa.»Teɨteri nekaniwarakumaweriyamɨkɨ'ena kwiepa naitsarie—mɨpaɨ kanaineni Yawé—.

Kura kemɨtika'unarieni

4»Kura kwieyaritsie kiekatari nepɨtiwakwinitɨani,meta yunaime Kerutsareme kiekatari.Wahari huyerieya 'ɨarime naime nepakuyeitɨani,meta mawari wewiwamete hetsɨana miemete kememɨtetetewa naime,5meta kemɨ'ane yukii heima memukatunuma'uwe,muyuawitsie miemete xurawetsixi mewarayexeiyatɨ,meta kemɨ'ane metitunuma'utɨ,kename Yawé me'ayexeiya memutiyuane,kwitɨwata kakaɨyari Muruki yaxeikɨa memɨtehahɨawe,6meta kemɨ'ane Yawé memuku'e'eiriwa,meta memɨka'ikuwautɨwe meta memɨkahe'iwawiya.7Kayuwatɨ xekeneumaka Yawé Naimekɨmɨyɨwe hɨxie,Yawé mɨtixekwinitɨanitsie pehurari,Yawé mawari kaniukuha'aritɨanimeta yu'inierima kaniwaru'itieniri.8'Iya tukaritsie Yawé yumɨireme muwakwinitsienepɨtiwakwinitɨani ti'aitame parewiwametemama meta niwemama,meta kemɨ'ane kamixate hipame kwieyaritsie miemete memanakatɨtɨka.9'Iya tukaritsie nekatiniwakwinitɨamɨkɨkemɨ'ane hipame kakaɨyarixi memɨwarayexeiya,meta memɨtehɨniya yukakaɨyarixi watukita piinite,'itarikakɨ memɨte'a'iwaxɨ meta hipame mewananaimatɨ.
10»Yawé mɨpaɨ kanaineni: 'Iya tukaritsie parewiya hiwariyari pɨ'enierieni,kitenie Tsapa mɨtitewatsie paitɨ,'aiwari pɨ'enierieni Kiekari Hutarieka Mieme makumatsie,meta waɨkawa hiwari pa'eniɨriɨkɨni yemuritetsie paitɨ.
11»Xemeta xekeneutitsuanani, tetuayamete memakutei xemɨtama.Naitɨ tita xemɨtetua katineuyehɨiyamɨkɨ,xepeuyehɨiyani yunaitɨ kemɨ'ane pɨrata xemexeiyanikɨ xemɨyɨa.12'Iya tukaritsie Kerutsareme nepayekexiya kɨxeme ne'akwetɨ,nemɨtiwakwinitɨanikɨ kemɨ'ane yu'iyarikɨ memɨ'uxipie,kaxie winuyari mɨkakuyuitɨariwa meuyewexime hepaɨ memɨ'ane,kemɨ'ane mɨpaɨ memutiyuane: “Yawé 'atsipɨkatiyurieni,ni'aixɨa pɨkatatsiyurieni ni'axa pɨkatatsiyurieni”.13Xepiinitɨarika memɨxeka'una wa'iwarika pɨrayani,xekii yuxaɨta puyuhayewaxɨani:“Yukii xepɨtiwewieni,peru muwa xepɨka'ayeyaxe,kaxie xepɨka'iteɨta,peru winuyari xepɨkaha'inɨata”.

Yawé haxɨaya tukariyari

14»Yawé haxɨaya tukariyari paye'axime,kanaye'aximeni yapauka.Yawé tukarieyatsie pɨ'enierieni kwinimieme memɨte'uka'eniwa hiwariyari,meta kemɨ'ane mɨkama 'ana kanitatsuamɨkɨ.15'Iya tukaritsie haxɨa tukariyari kanayeimɨkɨ,meta 'uximatɨarika meta hiwerika tukariyari,xemɨka'unarieni meta xemakumaweriyarieni tukariyari,yɨriya tukariyari,meta haiwitɨri mɨyɨyɨxawi tukariyari,16kuxineta meta kuyaxa hiwariyari tukariyarikiekarite kuraruyari 'amatitɨtɨ hepaɨtsita mieme,meta tuxiyu 'amutɨtɨ hepaɨtsita mieme.17Ne nepɨwaranukuweiya teɨteri nekawa'uxipitɨatɨ,memɨkaheuneniereni hepaɨ me'anenetɨ mepu'uwani,Yawé hepaɨtsita 'axamemɨte'uyurikɨ.Waxuriya nitayeuriyamɨkɨ tumuanari hepaɨ,meta wakwinurite kwitarai hepaɨ pɨtiyuxexeiyani.18Wahuru meta wapɨratapɨkawatawikweitsitɨani,Yawé haxɨaya tukariyaritsie.'Ɨtetsarikaya taiyarinaime kwie pakuxɨtsitɨani,yapauka kaniwarakumaweriyamɨkɨyunaime teɨteri kwiepa memɨtama».
expand_more
Search