Tsakariyaxi7hch_wb2

Kakaɨyari hakiya pɨkaheuyehɨwa

1Naurieka wiyaritsie ti'aitakaku Raríyu, naurieka tukaritsie 'atanauka metseritsie, kitsirehu metseriyaritsie mɨyatɨtɨ, 'ana Yawé niukieya Tsakariyaxi hetsɨa kaninuani.2Weteri kiekatari mekaniwareyenɨ'akaitɨni Tsaretsexi meta Xekeni-Mereki, metatsiere wateɨterima, memiwauyukɨ Yawé parewiyaya,3meta memeta'iwaunikɨ mawari wewiwamete wahetsɨa memɨhɨritɨarie Yawé Naimekɨmɨtɨrɨkaɨye tukieya, metatsiere Kakaɨyari niukametemama: «¿Tetehe'eriwani 'akuxi 'auxɨwirieka metseriyaritsie xeitukari teteyuhiwerieka meta teteyuhakieka teyɨhɨtɨ, yaxeikɨa meripaitɨ wiyaritsie ketemɨ'anekai?»4Hikɨ 'ikɨ niuki nehetsɨa kaninuani Yawé Naimekɨmɨtɨrɨkaɨye hetsɨa mieme:5«Mɨpaɨ ketiniwarutahɨawi yunaime mɨkɨ kwieyaritsie memɨtama,metatsiere mawari wewiwamete:“Kepauka xeme xemuyutihakiwakai meta xemuyuhiweriekai'auxɨwirieka metseriyaritsie meta 'atahutarieka metseriyaritsiehaika tewiyari heimana tamamata wiyari manukatɨatsie,'ana yurikɨ nehetsiemieme xepɨkayuhakiekai.6Kepauka xeme xemɨtekwa'a xemɨte'ie,yuhetsiemieme xeikɨa xekaniyɨaka”».
7'Ikɨ niuki pɨhɨkɨneniukamete meripaitɨ miemetene Yawé yanetiwapitɨakaku memitaxataxɨkepauka 'akuxi Kerutsareme meta kiekari 'auriena mamanetɨkatsiemɨkiepatɨkai meta kayuwatɨ memexeiyakaitsie,kepauka 'akuxi Nekexi meta muweritsie tau makayuyuipike hepamɨkiepatɨkai.8Yawé niukieya kaninuani hekwamekɨ Tsakariyaxi hetsɨa. Mɨpaɨ katineyehɨtɨani:
9«Mɨpaɨ kanaineni Yawé Naimekɨmɨtɨrɨkaɨye:»“Xeketeneheitseritɨaka yurikɨ kemɨtiheitserie,xekeneyunaki'erieka meta xekeneyunenimayakaxeyunɨtɨ yunaitɨ.10Xepɨkawananaimaka wiuraxi meta nutuite,meta 'ateewa kiekatari metatsiere tixaɨtɨ memɨkateheuxeiya.'Axamɨti'ane xepɨkawewieka yu'iyaritsiehipame wahetsiemieme”.11»Peru mɨkɨ mepɨka'uyuwaɨri mɨpaɨ memɨtekakɨnekɨ. Me'i'inɨatatɨwetɨ mekanawaritaxɨani meta mepeuyukanaxɨa yunakata.12Memɨka'i'enienikɨ niuki 'aitsika meripai miemetexi Kakaɨyari niukametemama Yawé Naimekɨmɨtɨrɨkaɨye muwareyenɨ'airiekai 'Iyari yuhetsɨa miemekɨ, 'ana yu'iyari mekaniutseiriya tete kwinimieme mɨtitse'i hepaɨ. Hikɨ 'ayumieme, Yawé Naimekɨmɨtɨrɨkaɨye yemekɨ kaniuyeha'ani.13“Memɨkanetsi'u'enikɨ kepauka nemɨwarutahɨawixɨtsie, neta nepɨkawa'enieni kepauka memɨnetsitahɨawetsie —mɨpaɨ kanaineni Yawé Naimekɨmɨtɨrɨkaɨye—.14Haikɨri waɨkawa mɨtɨrɨkaɨye hepaɨ, nekaniwareutaxɨriexɨani naitsarie hipame nuiwarite memɨkawamatekai wahetsɨa. Yukwie memiku'eiri yuxaɨta puyuhayewaxɨ nixewitɨ tɨma mana pɨka'uyeyeikakai. Mɨpaɨ me'ɨyɨka yukwie 'akumaweme mekanayeitɨani meripaitɨ witsimɨraku'anekai”».
expand_more
Search