Nɨawari89hch_wb2
'Etani 'ɨkitsikaya 'etsirahi tewiyari.
1Yawé 'aku, yuheyeme nepikwikani'anaki'eriya mɨmariwe,yuheyemekɨ nepikuxatani ke'aixɨa pemɨtikamie.2Mɨpaɨ nepaineni 'anaki'eriya heitserie 'amuyeikakɨ,yapehaitɨ ke'aixɨa pemɨtikamie muyuawi yamɨtiuyema hetsie.3Mɨpaɨ peputayɨ: «Ne tɨratu nepuwewi nemenayexei hamatɨa,Rawiri mɨpaɨ yurikɨ nepɨtiutahɨawixɨ neti'uximayatsiriwame:4“'Anuiwari yunaitɨ te'aitamete nepɨwarayeitɨani,meta yanepaine 'a'uweni 'amuwenikɨ yuheyemekɨ”».5Yawé, mariweme kepemɨtiyuriene muyuawi peyexeiya,meta ke'aixɨa pemɨtikamie memɨpatsie mepeyexeiya.6¿Kemɨ'ane muyuawitsie Yawé hepaɨ pɨ'ane?¿Kemɨ'ane muyuawitsie 'uyeikatɨ Yawé hepaɨ pɨ'ane?7Kakaɨyari waɨkawa pumakaxiwa memɨpatsie memayuxeɨrietsie,pɨmariwe yemekɨ 'amemu'uwa 'auriena wahetsiemieme.8Xewitɨ 'ahepaɨ 'anetɨ pumawe Yawé Kakaɨyari Naimekɨpemɨtɨrɨkaɨye,tɨrɨkariya pemexeiya meta 'aixɨa pemɨtikamie.9'Ekɨ pepɨti'aita hamewari mɨtɨrɨkaɨyetsie,'ekɨ kayuwatɨ pepipitɨa hamewari muyuane.10Xahawi peputapɨnaxɨ mɨki hepaɨ,'atɨrɨkariyakɨ pepɨwareutaxɨriexɨa memɨmetsi'aye'unie.11'Ahetsie pɨmieme muyuawi, meta pɨti'apiini kwie,'ekɨ kwie peputawewi meta naitɨ hetsiena mɨtixuawe.12'Ekɨ tayeta meta tatsutɨa peputiwewi,Tawuxi meta Heximuni hɨriyarite mepɨmetsikwika yutemawierima.13'Amamatekɨ mariweme pemɨtiuyurieni pepɨyɨwe,pepɨtɨrɨkaɨye pepɨrayu'iwa yemekɨ.14'Aixɨa mɨti'ane meta tita mɨtiheitserie mɨkɨ 'a'uweni pɨtsutɨmeyari,meta 'aniukamete mepɨhɨkɨ naki'eriya meta yuri mɨraine.15'Aixɨa meke'itɨarieka memɨmetsihahiwiwa temawierikakɨ, Yawé,meta 'ahekɨariyatsie memuhu,16kemɨ'ane tukarikɨ 'ahetsiemieme memuyutemamawiemeta memetsi'ayexeiyatɨ heitserie pemexeiyakɨ.17'Ekɨtsɨ watɨrɨkariya witsipemɨ'ane pekanihɨkɨtɨni wahetsiemieme,mɨpaɨ mɨmatinakekɨ waɨkawa tɨrɨkariya pepɨtatsipitɨa.18Yawé, 'ekɨ tepɨa tahetsie nunuwame pepɨhɨkɨ,'ekɨ, 'Ixaheri hetsie pemɨpatsie, petati'aitɨwame pepɨhɨkɨ.19Heiwa 'ekɨ 'ateɨterima pepɨtiwarutaxatɨa heinɨtsi hepaɨ 'anemekɨ,mɨpaɨ pepɨtiwarutahɨawixɨ 'ateɨterima yamemɨtekahu:«Ne nekaniparewieka xeime waɨkawa meuyutamiewe,xeime tewi 'aixɨa nemɨtixeiya hetsiena mieme 'aixɨa nepaine.20Rawiri nekaniutaxeiya, neti'uximayatsiriwame,nekanikawirieni ne'atseiti mɨpatsiekɨ.21Nemamá yuheyemekɨ pituikani,netɨrɨkariya pitatɨrɨkariya.22Meye'unie pɨkahe'iwani meta pɨkatita'aitɨani mɨtiyukutuayanikɨ,xewitɨ tɨma 'axamɨtiuka'iyari pɨkatita'aitɨani.23Kemɨ'ane memitamieni ne nepuwatipɨna,kemɨ'ane memitixani'erieni ne nepuwaka'una.24Nenaki'eriya ke'aixɨa mɨtikamie hamatɨana puyeikani,tɨrɨkariyaya nehetsiemiemekɨ 'aixɨa pɨraniuwani.25Ne tɨrɨkariya nekanipitɨamɨkɨ haramaratsie mɨti'aitanikɨ,meta haa muyehapanetsie mɨtiwa'aitɨakakɨ.26Mɨkɨ mɨpaɨ kanetinitahɨawimɨkɨ: “'Ekɨ ne'ukiyari pekanihɨkɨtɨni,nekakaɨyari, ne'ai netsiwikweitsitɨwame”.27Ne neniwe matɨari mieme heitserie nekanipitɨamɨkɨ,mexɨakame kanayeimɨkɨ te'aitamete kwiepa memɨtama wahetsie.28Nenaki'eriya hetsiena mieme yaxeikɨa kani'anekamɨkɨ,tɨratu ketemɨtehexeiya mɨkɨmatɨa yaxeikɨa kani'anekamɨkɨ.29Nuiwarimama memɨteta'aitakɨ 'aixɨa nekaniwayurimɨkɨ meta 'uwenieyayuheyemekɨ, mexi 'akuxi muyuawi 'a'uyemaka.30»Peru xɨka niwemama ne'aitsika me'uku'eirienimeta kenemaine mɨpaɨ xɨka mekate'u'uwani,31xɨka me'iku'eirieni ne'aitsikameta xɨka mekaheitixeiyaxɨani kenemɨtiu'ai,32kɨyekɨ nekatiniwakwinitɨamɨkɨ 'axamemɨte'uyurikɨmeta nekaniwatiwamɨkɨ yamemɨkatekakɨkɨ.33Tsepa yamemɨkatekakɨ, nepɨkawahayewa newanaki'erietɨ,meta kenemɨtiwarutahɨawixɨ pɨkareuyeweka.34Netɨratu 'axanepɨkayurieni,kenemutayɨ nepɨkahetɨmaiya.35Xeimieme xeikɨa yanepaine nemɨpatsiekɨ,meta Rawiri nepɨkati'itaiya:36Nuiwarimama yuheyeme nepɨwa'ɨwiyani,'uwenieya 'apuweni tau hepaɨ pɨreutere nehɨxie.37Metsa hepaɨ, 'aixɨa mɨtiuka'iyari mɨtaniere muyuawitsie,mɨpaɨ 'apuweni yuheyemekɨ».38Peru neuxei 'ekɨ pepeihɨa, pemenayexei pepɨka'utanaki'eri,pepuyeha'a hamatɨana waɨkawamekɨ.39Pepihayewaxɨ 'atɨratu meti'uximayatsiriwame hamatɨa,kwiepa pepihaxime kurunaya.40Kuraruya naime pepa'unatɨya,yeuta puyuhayewaxɨ kiiya 'amɨpapa.41Yunaitɨ mana memuyekɨka mepɨte'inawatsirie,'auriena kiekatari mepiyuriya.42'Aixɨa pepaine memeye'unie watɨrɨkariya hepaɨtsita,temawierikakɨ pepɨwarutihɨniyaxɨ memeye'unie.43'Ixiparaya pepatatamɨraxɨ,meta pepɨka'iparewi muyumienekaitsie.44Mɨmariwekai mana pepɨti'atɨiri'uwenieya kwiepa pe'atihɨaka.45Temaikɨtɨme kwitɨwa 'ukiratsi pepayeitɨa,pepitewiyatsitɨa.46Yawé, ¿kepaukake pepɨtihayewa peyu'awietanetɨ?¿Tai hepaɨ tiutatawetɨ 'ahaxɨa yuheyemekɨ?47Mɨpaɨ ketinemaika netukari 'apɨkatiteriwe.'Imatɨrieka, ¿titayari memukwiwawe petiwarutiwewi?48¿Kemɨ'ane 'apuyeika kamɨnike,yatɨni yɨwetɨ muwatiyanikɨ teukiyapa?49Tati'aitɨwame, ¿hakewari 'anaki'eriya meripai mieme,Rawiri kepemɨtiutahɨawixɨ yapetikamietɨ?50Tati'aitɨwame, kenaye'eri te'a'uximayatsiriwamete kememɨtenanaimarie,meta ne'iyaritsie hipame teɨteri watierika kenemɨrexeiya.51Yawé, memɨmetsi'aye'unie mepɨtatsinanaima,kemɨtiumie 'axamepɨte'ikɨhɨawe pemenayexei.52'Aixɨa ke'itɨarieka Yawé yuheyemekɨ.'Aixɨa pɨ'ane, 'aixɨa pɨ'ane.