Nɨawari69hch_wb2
Teyuitɨwamete wa'ukiyari. «Tuturi» kwikariyari xekeneuweiyani. Rawiri nɨawarieya.
1Nekakaɨyari, keneneutawikweitsitɨa,nekɨipitɨa paitɨri haa puku'axe.2Nepɨkayunirɨme putsu meukatewata,titatsie nerakeni pumawe.'Amutiyewatsie hixɨapa nepuyewie,haa muhane pɨnetsi'uhautsitɨaxime.3Nepu'uxeri parewiya neha'iwawatɨ,nekɨipitsie nepanatiwakiri.Nehɨxite pu'u'uxeri,Kakaɨyari parewiyaya netakwewietɨ.4Nekɨpate kemɨpaɨme reuyetamepɨyupaɨme memɨnetsixani'erie yakɨxeikɨa,mepuyumɨire memɨnetsi'aye'unie 'itarikakɨmemɨnetsimieku.¿Titakuta netiyetuani nemɨkatiunawa?5Kakaɨyari 'aku, 'ekɨ pepɨtimate nemɨkayukɨhɨawekɨ,ke'axanemɨtiuyuri nemɨtiuti'awieta nepɨkayɨwe.6Yawé Tati'aitɨwame, Naimekɨmɨtɨrɨkaɨye,mepɨkatewinɨarieka ne 'axanemɨtiuyurikɨmemɨmetsitakwewie,'Ixaheri Kakaɨyarieya 'aku,mepɨkaha'iwarieka nehetsiemiemekemɨ'ane memɨmetsikuwautɨwe.7'Ahetsiemieme nepɨtiuka'eniwa ne'utatieriwatɨ,nehɨxie nepayenɨtsa tewiyarikɨ.8Ne'iwama wahetsiemieme nemɨkamatiwani hepaɨ nekani'aneneni,'ateewa kiekame nekanihɨkɨtɨni nemaama niwemama wahetsiemieme.9'Akii nemukweriekɨ netaɨta nepɨtaxɨtsitɨariexime,nehetsie xeikɨa katininakenimemɨmetsi'aye'unie watierika.10Kepauka nemutatsuakatsie meta kepauka nemɨnehakietsie,nekatininewiekamɨkɨ kememɨnetehahɨaweni,11kepauka hiwerika kamixayari nemanakatɨkɨtsie,'atsieriwame nekanihɨkɨtɨni.12Kitenie memutayaxike nehepaɨtsita niuki mekanixɨatɨaka,memɨtarɨwe 'axa'anemekɨ mekaneniutakwikani.13Peru Yawé, neuxei nepumetiwawiriehikɨ 'ekɨ mɨpaɨ mumetinakekɨ.Kakaɨyari 'aku, 'anaki'eriya mɨmariwekɨ, keneneuta'eiya,'aixɨa pemɨtikamiekɨ, keneneutawikweitsitɨa.14Kenenewatihani muyehaxuyatsie,nemɨkayunekɨ pepɨkanetsipitɨaka.Keneneɨxɨna memɨnetsixani'erie wahetsie,hata 'ameukatewatsie.15Pepɨkanetsipitɨaka haa mɨnetsihehautsitɨwanikɨ,muwatixawa 'emeukatewa mɨnetsiheukakwa'anikɨ pepɨkanetsipitɨaka,meta teukiya neheima muwiwikenikɨ.16Yawé, keneneta'eiya 'aixɨa pemɨtiuka'iyari naki'eriya pemexeiyakɨ,yemekɨ pemɨti'akanenimayakɨ, nehetsɨa kenenua.17'Ikɨ meti'uximayatsiriwame pexeiyatɨ pepɨkatikuhayeikawani,yapauka keneneta'eiya, nepɨtiuka'eniwa.18'Ahurawa kenayaka, keneneutawikweitsitɨa,keneneɨxɨna memɨnetsi'aye'unie watsata.19'Ekɨ pepɨtimate kememɨnete'ute'a,nenetewiyame mepɨnetsi'ayeitɨwa,pepɨtimate kemɨ'ane memɨnetsi'aye'unie.20Watierika ne'iyari kaniutatsana,nehetsiemiemeri xɨari pɨkayɨwe 'aixɨa mɨtiyɨni.Nenimayatsika neputiwau, nepɨka'ikaxei,nɨtɨarika neputiwau, nepɨka'itaxei.21Ne'ikwaitsie matsiwi mepɨkaye,neheuharimɨkɨkaku matsina mepɨnetsi'uharitɨa.22Wawiniyari kehayani wa'ixɨarari,memɨte'ukaxexeiya wawiniyari kehayani.23Wahɨxite ke'utiture, memɨkaheunenierenikɨ,watɨrɨkariya ke'uxɨni yuheyemekɨ.24'Ahaxɨa wahetsie keneukawiwi,'ahaxɨa kewaranuku'axe.25Makumawe ke'ayani memakutei,waxamaru ke'uxaxawani.26Yemetsɨ kemɨ'ane pemɨ'uximatɨani kaniuweiyarieka,kemɨ'ane pemɨtikwinitɨani kaninanaimarieka mɨtiuka'eniwakɨ.27'Axakemɨtiyuriene keneutinɨitɨa waɨkawa 'axamɨti'ane,'awikweitsitɨarikatsie pepɨkawaraye'uitɨaka.28Meke'ayeyeitɨarieni tukari xapayaritsie,heitserie memexeiya wahamatɨa mepɨka'aye'uka.29Kakaɨyari 'aku, ne tixaɨtɨ nemɨkarexeiya meta nemɨtiuka'eniwa,'awikweitsitɨarika nehetsie kenuaka.30Kwikarikɨ nepinɨawani Kakaɨyari kemɨtitewa,pamɨpariyutsikɨ 'aixɨa nepɨrehɨaweni.31Mɨkɨ mawari matsi Yawé pinakirekeyuri tuuru yatɨni tsikeruha'awatɨ meta 'anuketatɨ.32Tixaɨtɨ memɨkatehexeiya mɨkɨ metexeiyame mepuyutemamawieka,xeme xekeneyuwaɨriyani, Kakaɨyari xemukuwautɨwe.33Karikɨ Yawé kaniwa'enieka kemɨ'ane memɨteheuyehɨwa,meta yuteɨterima memehapanie pɨkawarexɨrɨwa.34Meke'inɨawani muyuawi meta kwie,haramara meta yunaitɨ mana memɨteye'uwa,35Kakaɨyari Tsiyuni kanitawikweitsitɨamɨkɨ,meta Kura kiekariyari kananukuketɨamɨkɨ.Mana mekanikumarikuni teɨterimamakwie wahetsiemieme kanayeimɨkɨ.36Wahetsiemieme katinayeimɨkɨ te'uximayatame waniwema,Ti'aitame memɨnaki'erie mana mekanitiyaxikuni.