Nɨawari39hch_wb2
Teyuitɨwamete wa'ukiyari. Kerutuni hetsiemieme. Rawiri nɨawarieya.
1Ne mɨpaɨ nepɨtiu'eri:«Teɨteri 'axateyuruwamete wahɨxie nemuyeikakɨnepɨne'ɨwiyani kenemɨtiuyeika,nepɨtinewieka kapa 'axane'utayɨnikɨ,matsi netenie nepuwieka».2Hikɨ kayuwatɨ mana nepuyeikakai, nepɨka'utaniu.'Aixɨa mɨti'ane meta nepɨkatikuxatakai.Matsi ne'uximatɨarika kanitimiekaitɨni,3ne'iyari pɨtakai netawitsie.Mɨyanetiku'eriwakaku, matsi tai kaniutani'ayumieme mɨpaɨ nekaniutayɨni:4«Yawé, keneneutaxatɨa 'ena kwiepa netukari kereutere,kepaɨmexɨa xeikɨa nepuyeikani,keneneutaxatɨa netukari ke'emɨkatiteriwe.5Netukari pɨkawaɨkawa pemɨnetsi'upitɨa,'akɨmana, kepaɨmeme wiyari nemuyurieni tixaɨtɨ pɨkatihɨkɨ.Xeihɨtsiyari xeikɨa pɨhɨkɨ tewi mɨmɨwe.6Tewi tukarieya 'etɨriya hepaɨ xeikɨa kani'aneni meuyewautse.Yakɨ xeikɨa pɨyɨaneni piinitɨarika xɨka tixeɨrieka,'atsipɨkatimatsiɨkɨ kemɨ'ane mɨranupiini.7»Hikɨta, Ti'aitame, ¿titari netitakwewieka?'Ahetsietimieme xeikɨa nepɨtitakwewie.8'Axanemɨtiuyurikɨ keneneutawikweitsitɨa.Pepɨkawapitɨaka 'atsimemɨkatemate memɨnetsiyuriyanikɨ.9»Kayuwatɨ nepuyeika, netenie nepuwie,'ekɨ pemɨhɨkɨkɨ pɨta mɨyapemɨtiyurie.10'Ariri pepɨkanetsitiwayani,'a'iwaɨyɨ pɨnetsikumemiwatɨma.11'Ekɨ teɨteri pepɨtiwaruka'enitsitɨwa,pepɨwatiwaya ke'axamemɨteyurie,kwitsi tikɨmeme hepaɨ, pepɨreuyehɨpa tita memɨtehiwe'erie.Xeihɨtsiyari xeikɨa kanihɨkɨtɨni tewi mɨmɨwe.12»Yawé, nenenewieri keneu'eni,nehiwari keneu'eni,ne'utatsuakakaku 'anakata pepɨkaheuyukanarɨmani.'Ahɨxie ne pemɨkanetsimate nepɨhɨkɨ,yeikame nekanihɨkɨtɨni, netutsima wahepaɨ.13Pepɨkaha'aka, nenetemawiekame kenenayeitɨamexi nekamɨwe meta 'ena ne'uyeika».