Nɨawari38hch_wb2
Rawiri nɨawarieya, mawari hetsiemieme.
1Yawé, kepauka pemɨha'a pepɨkanetsi 'utate'ani,peha'atɨ pepɨkanetikwinitɨaka.2'A'ɨrɨ nehetsie kaniuye'uniri,nehetsie 'atɨrɨkariya kaniukaweni.3Naitɨ newaiyari pɨtikuye pemɨha'akɨ nehepaɨtsitahawaikɨ tɨma newaiyaritsie 'aixɨa nepɨkareu'erie,waɨkawamekɨ 'axanemɨtiuyurikɨ,ne'umete mɨyapɨtiuka'eniwa.4Nepɨka'ikemari 'axamɨti'ane,mɨkɨ 'ika kwinimieme pɨrahete.5Nemɨka'uka'iyarikɨnehaiya kaniyepɨnirɨmeni 'axakaniukɨ'ɨareni.6Nepu'uxeri, waɨkawamekɨ nepɨnemuina,tukarikɨ nenutuixietɨ nepuyeika.7Netaɨta nepɨta'a hɨiyakɨ,naitɨ newaiyaritsie tɨma 'aixɨa nepɨkareu'erie.8Nepɨwerani, nemehɨiyani hepaɨ nepɨreu'erie,ne'iyari puta'aiwa tiuka'eniwatɨ.9Ti'aitame, nepɨmetsiyetuirie yemekɨ tita nemɨreuyehɨwa,'ekɨ 'ahepaɨtsita pɨkati'awietɨ.10Kwinimieme pɨtiɨtɨrarɨka ne'iyari,nepɨkaheutɨrɨkaɨyeri,'ari nepɨkaniereri.11Nehamikuma meta memɨnetsimate nehaiya mekanimakaxeni,ne'iwama 'ateewa xeikɨa mekaniu'uwani.12Winiyari mekaniuwɨwɨtɨwani memɨnetsimieku,kemɨ'ane 'axa'anekɨa memɨnetsihɨaku mepɨkatehayewa yameteku'eriwatɨ,tukarikɨ nehetsiemieme xeikɨa mepɨtekuxata.13Peru ne mɨkaheu'ena nepaneyeitɨwa, nepɨkawa'enie,nekaniuweme nepaneyeitɨwa, 'atsinepɨkatiwaku'eiya.14Memɨkaheu'enana wahepaɨ nepɨ'anemeta memɨyɨkɨhɨani memɨkayɨwawe wahepaɨ.15Yawé, ne nepɨmetsitakwewie,'ekɨ neti'aitɨwame, nekakaɨyari, 'ekɨ pepɨyɨaneni nehetsiemieme pemɨwata'eiya.16Nepɨmetsiwawirie xeikɨa mepɨkanetsinanaimaka,memamariwaweme mepɨka'ayuyeitɨaka kepauka nemekawenitsie.17'Ari nekanimɨximeni,kukuiniya pɨkanetsihayewa 'etsiwatɨma.18Ke'axanemɨtiuyuri nepɨnetahekɨata,'axamɨti'ane pɨnetsi'iyarimɨtsitɨa.19Mepɨyumɨire 'itarikakɨ memɨnetsi'aye'unie,yamepɨte'ane memɨnetsi'aye'unie nitixaɨtɨ karanierekaku.20'Aixɨa nemɨtiyurienekɨ, 'axa'anemekɨ mepɨnete'akapitɨwa,'aixɨa mɨti'anekɨ xeikɨa nemɨnewaɨriyakɨ, 'ayumieme mepɨnetsi'aye'unie.21Yawé, pepɨkanetsi'uku'e'eiriwani,nekakaɨyari, nexaɨtame pepɨkanetsikuhayeikawani.22Neti'aitɨwame netsiwikweitsitɨwame,yapauka keneneuparewi.