Nɨawari16hch_wb2
Rawiri kwikarieya.
1Kakaɨyari kenene'ɨwiyani, 'ahetsie xeikɨa nemɨne'awietakɨ.2Ne Yawé mɨpaɨ nepɨmarahɨawe: «'Ekɨ pepɨnekakaɨyari.Nexaɨta nepɨkayɨwe, 'ahetsie xeikɨa netiwiyatɨ 'aixɨa ti'aneme nepɨrexeiya».3Kwiepa miemete memɨpatsie,memɨmamariwawe wahetsie nepɨnetemawie.4Peru kemɨ'ane kakaɨyarixi memuwarayexeiyaniwaɨkawa mepɨtekwineni.Ne hatsuaku newarayexeiyatɨ nepɨka'ayani wakakaɨyarixi meta mawari nepɨkawawewirieni,meta kememɨtetetewa nepɨkawakuxatani.5'Ekɨ, Yawé, ne'ikwai pekanihɨkɨtɨni meta tita nemɨti'ie,'ekɨ yapekatinimaika kemɨnetiyurieni netukari hepaɨtsita.6Witsimɨraku'anetsie nepɨnehayewaxɨ yarainekaku,'imikieri witsiti'anetɨ nehetsie pɨtiunakixɨ.7Yawé hepaɨtsita 'aixɨa nepaineni mɨneti'ɨkitɨakɨ,tɨkarikɨ pɨnetsihayehɨtɨwa ne'eriwametsie.8Ne Yawé neheyemekɨ yanepɨranuyeyetsa,mɨkɨ netserieta 'utiwekaku, xewitɨ pɨkanetsi'atihɨani.9'Ayumieme ne'iyaritsie nepuyutemawie,netaɨta naitɨ nepuyutemawie,'ayumieme ne'iyarikɨ yuri neti'erietɨ 'anepuyeika.10'Ekɨ pepɨkanetsiku'eirieni mɨkite wateukiyapa,'ekɨ pepɨkanetsipitɨani nemɨtapɨnekɨ 'aparewiwame yanemɨtikamie.11Pepɨnetsi'uxeitsitɨa huye tukari nemexeiyanikɨ,waɨkawa pepɨnetsihetemawieritɨani kepauka 'ahɨxie nemeta'ani,'atserieta meta yuheyemekɨ yanepɨreyutemawieka.