Nɨawari109hch_wb2
Teyuitɨwamete wa'ukiyari. Rawiri nɨawarieya.
1Kakaɨyari, ne nepɨmetsinɨawa,kayuwatɨ pepɨka'umaka.2Neuxei teɨteri memɨkametsimate memɨte'itawanehetsie mepɨtehahɨa menetsi'itatɨ,waniuki mɨtiyukwamanakɨ 'axamepɨnetekuxata,3yemekɨ kwinimieme meneteheuhekatɨ mepɨnetsixaneta,peru yakɨ xeikɨa mepɨtekuxata.4Newanaki'eriekakutɨtɨ 'axamepɨnetekuxata,peru ne mɨkɨ nepɨwayetua neyunenewietɨ 'ahetsɨa.5Tsepa ne 'aixɨa nemɨtiuka'iyari wahetsiemieme mɨkɨ 'axa'anemekɨ mepɨnete'akapitɨwa,menetsinaki'eriekakeme, mepɨnetsixani'erie pɨta.6Xeime 'axamɨtiuka'iyari keneutanɨ'a hetsiena mɨrahɨanikɨ,tserietana kehayerɨni mitaxaneta.7Hetsiena kerahɨiyani kepauka mɨtaxanetsieni,meta 'itarikayatɨtɨ hetsiena kerahɨani.8Tukarieya yapauka keneunawairi,meta xewitɨ pɨta 'uximayatsikayatsie ke'uyehani.9Tɨɨriyamama nutuite meke'akɨne,'ɨyaya wiuratɨtɨ ke'uyuhayewa.10Tɨɨriyamama meheu'uwatɨ xeikɨa meke'akɨne meta meteku'iwautɨwetɨ,teteɨxɨmete meke'akɨne kii mu'u'unita.11Memɨte'iniɨtɨakai piiniteya yupiinite meketehayeitɨani,teɨteri teewatari tipiiniteya mekete'unawani.12Mɨkɨ nutuite xewitɨ pɨkawanenimayaka,meta pɨkawanaki'erieka.13Mɨkɨ nuiwariyari ke'ukumawere,meta nuiwari hekwatɨ 'umamietsie ke'umaweniri.14Yawé, kena'eriwani paapaya ke'axamɨtiuyuri,meta maamaya kemɨtiuyuri.15Yawé yaketiwaxeiyani,meta mematɨmaiyarienikɨ 'ena kwiepa yaketiuyurieni.16'Aixɨa tiyurienetɨ mɨratɨmaikɨ,tixaɨtɨ memɨkatehexeiya, memɨteheuyehɨwa meta yu'iyaritsie memu'uximatɨarie,pɨwarutawei meta pɨwarukwi.17Pinakekai xeime 'axamuyurienikɨ,hikɨ 'axamɨ'itɨarienikɨ hetsiena ketiunake.Mɨka'inakekaikɨ xeime 'aixɨa muyurienikɨ,'aixɨa mɨ'itɨarienikɨ hetsiena mieme keheteewani.18'Axamutayɨkɨ kaniyuta'eimayukamixa manakatɨni hepaɨ,mɨkɨ waiyarieyatsie ke'anuyeneni haa hepaɨ,'umeteya hetsie paitɨ keheye'ani hatseiti hepaɨ.19Mɨkɨ 'axamɨti'ane ke'ita'eima 'ixuriki hepaɨ.Karima ke'itahɨani hɨiyame hepaɨ.20Yawé mɨpaɨ ketiwarakapitɨani kemɨ'ane memɨnetsixaneta,kemɨ'ane memɨnetsi'ita meta 'axamemɨnetekuxata.21Yawé neti'aitɨwame 'aixɨa pemɨtiuka'iyari, 'ekɨ 'ahetsiemiemekɨ'aixɨa kenetinexeiyani,keneneuparewi 'anaki'eriya mɨmariwekɨ meta 'aixɨa pemɨtiuka'iyarikɨ.22Ne tixaɨtɨ nepɨkarexeiya, nepɨreuyehɨwa,ne'iyari yemekɨ pu'uximatɨarie pɨtiuka'eniwa.23'Anɨari nepɨtaparirɨme 'etɨri yɨwikɨta mieme hepaɨkɨpi hepaɨ nepɨ'ane 'anateya mɨtsatsani 'ekakɨ.24Haakakɨ nepɨkakewe ne'ɨkate pɨwerarani,ne'umete kaniyuhekɨkɨaka newaiyaritsie.25Teɨteri kepauka memɨnetsikuxexeiya mepɨnetsinanaima,menetsikuxexeiyatɨ, yumu'u meputitsike.26Yawé, nekakaɨyari, keneneuparewi,'anaki'eriya mɨmariwekɨ, keneneutawikweitsitɨa.27Mɨpaɨ meketehetimani'ikɨ 'ekɨ pɨta pemɨnetsiyurienekɨ, Yawé.28Tsepa mɨkɨ 'axamemɨnetsi'uyuri.'Ekɨ matsi 'aixɨa keneneuyuri.Tsepa memaye'axɨa nehetsɨa, 'ekɨ matsi pepɨwatewiyatsitɨani,neta ti'a'uximayatsiriwame nepɨnetemawieka.29Nehetsie memɨtehahɨpa meke'utewiyatsitɨarieni waɨkawa,meke'uyutitetewiya yemekɨ.30Ne matsi Yawé, pamɨpariyutsi nekamenipitɨakamɨkɨ,nekameninɨawakamɨkɨ yumɨireme watsata.31Mɨkɨ haweri memɨyɨa mɨwawikweitsitɨwame,hetsiena waɨkawa rahɨiwakaku mierieximekaku.