Temaiwawemete9hch_wb2

Mɨtimaiwenikɨ mɨ'ayumieme kemɨti'inie meta mɨkatimaiwe

1Mɨtimaiwenikɨ mɨ'ayumieme 'uka hepaɨ yukii kaniutawewienimeta 'atahutame mituikatɨka kaniutiwewieni.2Hikɨ 'ixɨarari kaniukuha'aritɨani, kaxie winuyari kaniukawewienimeta mexatsie 'aixɨa katiniupini.3Kaniwarutanɨ'ani 'ukari mɨtiwa'aitɨa, 'emanutitewatsiekiekaritsie mɨpaɨ memɨteheukahiwakɨ.4«Nehetsɨa xekeneu'axɨa xemɨkatemaiwawe,xeme temari peuyewetse xemɨtemaika.5Xekenakɨni, nepaa xekena'inɨatameta kaxie winuyari nemikawewi.6'Atsixekatemaitɨ xeketeneuhayewa, hikɨ 'ana xekanayenenierekakuni,timaiweme huyeya 'utɨa xekeneuhuni.
7»Kemɨ'ane mɨtiyuyuriya mɨta'ɨxatsitɨani mɨkɨ pɨtatierieni xeikɨa,kemɨ'ane mɨtiyukatawe'erie mɨtaheitseritɨani mɨkɨ pɨtananaimarieni xeikɨa.8Mɨtiyukatawe'erie pepɨka'ɨxatsitɨaka kapa metsi'uti'uxiwe'erieni,'aixɨa pɨyɨni xɨka mɨtimaiwe pe'uta'ɨxatsitɨani, mɨkɨ hɨrixɨa matsinaki'erietɨ payani.9Mɨtimaiwe keneuta'ɨxatsitɨa, hikɨ mɨkɨ waɨkawa timaiwetɨ kanayeimɨkɨ,heitserie yamɨtikamie ketineuta'ɨkitɨa, hikɨ mɨkɨ waɨkawa timaitɨ kanayeimɨkɨ.
10»Kemɨ'ane timaiwetɨ meuyeimɨkɨ ke'itsutɨani meri Yawé 'ayemakatɨ,xɨka Kakaɨyari Mɨpatsie maika mɨkɨ pɨtimaiweni.11Nehetsie petiwiyakaku, 'atukari nepɨtimɨiriya,nehetsie petiwiyatɨ waɨkawa wiyari pepɨtihuni.12Xɨka petimaiweni, 'a'iwarika kanihɨkɨtɨni pemɨtimaiwenikɨ,xɨka memɨtemaiwawe pewatawe'erieka mɨkɨkɨ 'ekɨ pekatinika'eniexɨamɨkɨ».
13'Uka mɨka'uka'iyari, 'axakatiniuka'iyarini,mɨkayɨkɨhɨawe meta pɨkayukatewiya.14Yukitenie kanayeyeixani,xɨkata kiekaritsie 'uyeikani waɨkawa teɨteri memaxuawetsie kaniyeixarini,15meta kaniwa'iniwani kɨkameteyuhuyeta mɨheitserietsie me'uhukaku.16«Nehetsɨa xekeneu'axɨa xeme temariyakɨ xeikɨa xemɨteyurie.17Haa 'inawariekame matsi yemekɨ witsipa'ane.Paa matsi witsikana'aneni xiete hepaɨ xɨka 'itikwani 'awie».18Perɨ mɨkɨ 'atsimepɨkatemate xɨka kiitana mɨki 'ayekani,mɨkɨ 'inierimama 'atsimepɨkatemate xɨka mɨki teukiyata meheukaxɨrɨweni.
expand_more
Search