PRO7hch_wb2
Mari'itɨarika xeime 'ɨyaya hepaɨtsita
1Temaikɨ, ne'ɨkitsikatsie yaketinekamieni,meta ne'aitsika keneuti'uta 'a'iyaritsie.2Yaketinekamieni kenemɨti'aita pe'ayenieretɨ 'apekaniuyeikamɨkɨ,ne'ɨkitsika kene'ɨwiyani 'ahɨxi mɨyɨwi kepemɨtikweriwayurie hepaɨ.3'A'itɨwametetsie keneutapietɨkani,kenaka'utɨa 'a'iyaritsie paitɨ.4Titakɨ yapemɨtimaiwe mɨkɨ pumatsiparewieni yaxeikɨa 'akuri hepaɨ,titakɨ kepemɨtimate mɨkɨ pumatsiparewieni kemɨ'ane pemumate hepaɨ.5Mɨkɨ mepɨmatsixɨna 'ukaratsi mɨka'a'ɨya hepaɨtsita,meta 'uka mɨwikie hepaɨtsita pepɨ'a'ɨwiyani witsitikuxatakaku.6Heiwa nekiita ne'ayekaitɨ'itupari 'etsimayewatsie neheunieretɨ,7Nepɨne'ɨwiyaxɨ temari memɨka'u'iyari wahetsie,mɨkɨ temari watsata xeime kwi nepuxeixeime yemekɨ 'atsimɨkatimate.8Kayetsie kananuyani, 'etsikina kaniye'ani,hikɨ 'anɨari 'umietɨ 'ukaratsi kiiya hepa kaneyani.9Hikɨ kanikɨyɨrirɨmekaitɨni.'Ari waɨkawa 'ukuyɨrekuri.10Yapauka 'ukaratsi kanewayeyani 'enukunakeke,'uka tuminikɨ muyuwitɨnɨa hepaɨ reyukukemaritɨatɨ,yuhetsie pɨkamatsiɨkɨkai kemɨtiyurienikekai.11(Mɨkɨ 'uka waɨkawa pɨtikuxata 'utahiwatɨ hipame kawa'enietɨ,mɨpaɨ memɨ'anene 'ukarawetsixi yukiita yemekɨ mepɨkahayetei.12Kaye'utɨma mepu'uwa meta teɨteri memayuxeɨrietsie,meta yamepɨtehupa 'itsikinatsie).13Hikɨ yapauka temaikɨ kananakawiyatɨyani meta kani'itseni,metatsiere kayukatewiyakamekɨ mɨpaɨ katinitahɨawe:14«Nekiita 'aixɨa memɨteyuxeiyanikɨ mawariyari nekanexeiyani,tɨratu nemuwewiekai nekakaɨyari hamatɨa hikɨri nekatinaye'atɨani.15'Ayumieme nepeyetɨa nepɨmatsihekunakixɨ,nepɨmatsikuwaunekai, 'ari nepɨmatsi'ukaxei.16Ne'utatsie nekaneika'itarinu 'ixurikiyari waɨkawa mɨti'utɨka 'Ekipitu miemekɨ.17Nemukahuputsie witsimu'ɨa nekaneukawirieni,mixaxi witsimu'ɨa, 'aruhe meta kanera.18Hikɨmɨ, naki'eriya tekɨxi winuyari naime tepanu'ieni,naki'eriyakɨ tepuyutitemamawieni tsepa temukatariyarie.19Nekɨna yukie pɨka'uka,kanayeyani hikɨ 'ateewa paitɨ.20Yutumini waɨkawa kane'ɨni,kwitɨwa pɨkanuani xeimetseri kaneyurimɨkɨ».21Mɨpaɨ witsitikuxaxatɨwatɨ,kanikemakaxɨani.22Hikɨ 'ana 'utɨmana kaneyani,tuuru huyeta metɨa hemierienike hepaɨ,maxa winiyaritsie muyewierixɨ hepaɨ,23'ɨrɨkɨ mumɨiya yutawitsie,wiki winiyaritsie muyewierixɨ hepaɨ,'atsikatimaitɨ mana yutukari kanitatɨmaiyamɨkɨ.24'Ayumieme hikɨ temaikɨ, keneneu'eni,neniuki yemekɨ keneu'eni.25'A'iyari xaɨtsie pɨka'uyuyuipikeni 'uka kemɨmetikɨhɨawekɨ,mɨkɨ 'ɨxatsieya huyeyari 'utɨa pepɨkaheuyewautseni,26karikɨ yumɨiretɨ mɨpaɨ mekateniukwini,mepuyumɨire kɨmana memukwi.27Kiitana mɨki teukiyapa kanihɨkɨtɨni,yunaitɨ muwa memɨtahake mepɨtakukuwe.No translations available.