Temaiwawemete29hch_wb2
1Kemɨ'ane mɨixa tierikayarikɨ mɨkaheu'enayapauka kanika'unariemɨkɨ kanenimayatsietɨ.2Kepauka heitseriemekɨ yamemɨtekahu memɨte'aitani teɨteri mepuyukatemamawieni,kepauka 'axateyuruwamete memɨte'aitani teɨteri mepɨte'uka'eniwa.3Kemɨ'ane mɨtimaiwenikɨ muyuwaɨriya, mɨkɨ yupaapa pɨtemawieritɨa,kemɨ'ane 'ukari 'axateyuruwamete wahamatɨa muyeika, mɨkɨ yutumini pɨxɨtɨa.4Kwiepa ti'aitame xɨka kemɨtiheitserie ti'aitani 'aixɨa pɨti'ane kiekariena,kemɨ'ane tuminikɨ memɨtehayukatuayanikɨ xeikɨa muwawawirie kiekari kanika'unani.5Kemɨ'ane yuhepaɨ tewi witsimɨtikuxaxatɨwa ti'itaiyatɨ,winiyari hɨxiena puteika.6'Axatiyuruwame ke'axamɨtiuyurikɨ pekawautse,matsi heitseriemekɨ yamɨtikamie yutemawietɨ putakwika.7Heitseriekamekɨ 'amuyeika puyu'iyaritɨa kememɨte'uka'eniwa tixaɨtɨ memɨkatehexeiya wahetsiemieme matsi waheima kaninuaka,matsi 'axatiyuruwame 'atsipɨkatimate ketita mɨtixatsiwa.8Memɨteyukatawe'erie kiekari mekanixamurieka,memɨtemaiwawe matsi waɨkawa kayuwatɨ mekaniwapitɨaka.9Kepauka mɨtimaiwe meta yutemawietɨ 'axamɨtiyuriene hamatɨa memuyutakwini,tsepa mutanawe yatɨni muyeha'a mɨkɨkɨ 'aixɨa pɨkatiyɨni.10Memɨteyumemiwa mekaniwa'uxiwe'erieka teɨteri 'aixɨa memɨte'u'iyari,meta heitseriemekɨ yamemɨtekahu mekaniwakwika.11Tewi mɨkayuwaɨriya hipame muwaparewienikɨ yuhaxɨa pɨkawahana,matsi kemɨ'ane mɨtimaiwe katinakumaika kemɨtiuyunɨtɨani.12Kwiepa ti'aitame xɨka memɨte'itawa xeikɨa wareu'enieka,yunaitɨ te'i'uximayatsiriwamete 'axamekateniu'iyarikakuni.13Tewi tixaɨtɨ mɨkarexeiya meta mɨtiyukananaima hamatɨa yaxeikɨa mekani'aneneni:Yawé mɨkɨ yuhutame kaniwapitɨaka memayenenierenikɨ.14Kwiepa ti'aitame heitseriekamekɨ xɨka 'aixɨa tikuyuruwani tixaɨtɨ memɨkateheuxeiya wahetsiemieme,mɨkɨ meta xiɨyarimama yuheyemekɨ heitserie mekanexeiyakakuni memɨtewata'aitɨanikɨ yuteɨterima.15Tewi xɨka ti'ɨkitɨarieka kuweiwatɨ timaiwetɨ kanayeimɨkɨ,matsi kemɨ'ane mɨkaheu'ena yumaama kanitewiyatsitɨaka.16Kepauka 'axateyuruwamete memɨyumɨire 'axamɨti'aneta kaniwaɨkawani,matsi teɨteri heitseriemekɨ yamemɨtekahu mekaniwaxeiyakuni kememɨte'atixɨriyani.17'Aniwe ketine'ɨkitɨaka, xɨka mɨpaɨ petiuyurieni 'arike 'aixɨa 'iyari pepuyeikani,'ana temawierika pepexeiyani 'a'iyaritsie hetsienamieme.18Hakewa teɨteri 'atsimemɨkatehemate Kakayari kemaine, mekaneuyexɨrɨweni,'aixɨa mekani'itɨarieka yamemɨtekahu 'inɨari niukiyaritsie.19Hawaikɨ niukikɨ xeikɨa pɨkayɨwe ti'uximayatame mɨtiti'ɨkitɨanikɨ,tsepa mumetsi'enie yapɨkatikayani.20¿Tewi petimate kemɨ'ane kaheitimaixɨame mutaniuka?Tewi mɨkayuwaɨriya muwaparewienikɨ hipame mɨkɨ hetsie matsi katinitakwewiyaka keyuri mɨkɨ.21Kemɨ'ane tiyu'uximayatsiriwame mɨkaheitseritɨakai kepauka mɨkɨ mununutsitɨkaitsie,'arikeke mɨkɨ yapɨkatikayani kemɨtita'aitɨani.22Tewi mayu'eriya 'imieri xeikɨa kanixuawitɨaka,meta kemɨ'ane mayumiewe waɨkawa 'axapɨtiyurie.23Kemɨ'ane muyuta'ɨre tixaɨtɨ pɨkarayani,matsi kemɨ'ane tixaɨtɨ mɨkarayuyeitɨa matsi mariwetɨ kanayeitɨariemɨkɨ.24Xɨka tenawayamete pewanɨka, 'ekɨ 'akɨmana pekani'a'uxiwe'erieka,kepauka memɨtiwiyarienitsie, 'itsɨkame hɨxie 'ahetsie pɨrahɨiyani, 'ekɨ 'atsipepɨkatayɨni.25Pewamakatɨ teɨteri 'akɨmana pepɨ'awiniya,kemɨ'ane Yawé hetsie yuri mɨti'erie kaniwikweitsitɨarieka.26Yumɨiretɨ parewiya ti'aitame hetsɨa mekanikuwautɨweni,matsi Yawé xeikɨa kanihɨkɨtɨni teɨteri heitserie muwapitɨani yuxexuime.27Yamemɨtekahu mekaniwa'uxiwe'erieka 'axamemɨteyurie, yaxeikɨata 'axateyuruwamete heitseriekamekɨ 'amemu'uwa mekaniwa'uxiwe'erieka.