Temaiwawemete26hch_wb2
1'Ɨwi taxarixa pɨkamieme,meta witari 'itsanaxa pɨkamieme,meta 'aixɨa pɨka'ane mɨkayuwaɨriya hipame muwaparewienikɨ hepaɨtsita 'aixɨa mɨraniuwani.2Wiiki mukuwiene xeikɨa yatɨni 'itsitame yu'itɨa mɨkahexeiya hepaɨ,mɨpaɨ kani'aneni tewi 'axamɨ'itɨarienikɨ yamɨtiutawawie matsi hetsiena pɨkaye'ani.3Kwitaxi kawayutsixi wawayame kanihɨkɨtɨni,meta pirenu puxu hetsiemieme kanihɨkɨtɨni,yaxeikɨata mɨkayuwaɨriya hipame muwaparewienikɨ kaneuyeweka mukuweiyaxɨanikɨ.4'Axamɨtiyuriene yutemawietɨ kemɨtiuniuka mɨpaɨ pepɨkatiku'eiyani,kapa 'ekɨta hepaɨna petiyurienetɨ pe'ayani.5Tewi mɨkayuwaɨriya muwaparewienikɨ hipame keneuta'eiya kemɨreuyewetse,yɨkɨmana waɨkawa timaiweme mɨkayu'eriekakɨ.6Mɨkayuwaɨriya hipame muwaparewienikɨ nɨ'ari pexɨka'ayeituani,yɨ'ɨkatsie yuxiteka mɨtiukakukuineni hepaɨ 'anetɨ payani.7Tewi mɨkayuwaɨriya hipame muwaparewienikɨ 'ɨxatsieya tixaɨtɨ pɨkatiyunaki'erie,mɨka'uyeiwe 'ɨkateya tixaɨtɨ mɨkatiyunaki'erie hepaɨ kani'aneni.8Mɨkayuwaɨriya hipame muwaparewienikɨ 'aixɨa mɨrahɨaweni tixɨatɨ pɨkatihɨkɨ,tete texɨpametsie 'atatɨarietɨ mehɨiyani hepaɨ katinimatsiɨkɨni.9Mɨkayuwaɨriya hipame muwaparewienikɨ kemɨtikuxata,tawekame xuya mamayatsie mutatseni hepaɨ kani'aneni.10Tupikɨ timɨmɨme watamɨmɨtɨ mɨtiwakukuinitɨwa yunaime mana memuyekɨka hepaɨkani'aneni kemɨ'ane mɨkayukuhɨawe muta'ini yukie.11Tsɨkɨ 'ukunuaka tawarita yuhayari kemɨtiukukwa'a hepaɨ,mɨpaɨ kani'aneni mɨkayuwaɨriya teɨteri muwaparewienikɨ yaxeikɨa kemɨtiyuriene.12¿Tewi petimate kemɨ'ane timaiweme muyuxata?Tewi mɨkayuwaɨriya muwaparewienikɨ hipame mɨkɨ hetsie matsi katinitakwewiyaka keyuri mɨtiuyemate.13Muyu'ɨraxie mɨpaɨ kaniutaineni: «Huyeta tiyukwa'ame kaneyeikani.Kaye'utɨma maye kaneyeikani 'akuxɨnitɨ».14'Itupari kemɨranakuwautse mɨrawiyatɨkatsie,yaxeikɨa muyu'ɨraxie mɨpaɨ yu'itaritsie ta'aurie katinawautseni.15Mɨyu'ɨraxie xakɨtsie xeikɨa kanikameka,matsi 'akuxi kaneiyehɨaka mɨramikiwanikɨ yuteta paitɨ.16Mɨyu'uraxie kwinimieme timaiweme kaniyuxatani,kename 'atahutame temaiwawemete waruta'ɨxatsitɨawe.17Kemɨ'ane mɨrayukwitɨnetsie meuyehake ka'inierietɨ,tsɨkɨ nakateyatsie tiwietɨ manukuhana hepaɨ kani'aneni.18Xewitɨ heuyuyehɨatɨ mɨtiutatuaxa hepaɨ,'ɨrɨ tatɨkaimekɨ watakukuyatɨ,19mɨpaɨ kani'aneni kemɨ'ane yuhamiku mɨkwamana mɨpaɨ rehɨawetɨ:«Netɨ nepɨka'imainekai».20Tai pɨtɨni xɨka kɨyexi ka'anutanetɨarieni,niuki peraixi memɨkahaxuawetsie 'imieri kanikumawerimɨkɨ.21Tɨxari tɨɨ kanayeikani, kɨyexikɨ tai kananutatataweni,tewi haxɨa mawauwe 'imieri kanitsutsutɨwametɨni.22Niuki perai niukieya yemɨkɨ witsikatini'enierieka,wataɨta paitɨ kaniye'axeni.23Kwitame pɨratakɨ muwewiya haxu xariyari hetsie muyeka,tewi mɨpaɨ kani'aneni yu'iyaritsie mɨtihɨniya 'axamɨti'ane.24Kemɨ'ane mɨtiyuka'uxiwe'erie yuniukita katini'awietani,matsi yutaɨta 'axakatiniyurimɨkɨni.25Kepauka witsimetikuxaxatɨwa yuri pepɨkati'eririeka,'iyarieyatsie 'axamɨti'ane mɨtihɨnekɨ.26Tsepa 'uxiwe'erika muti'awietaxɨ yuhetsie,matsi mɨkɨ mɨirikɨa memayuxeɨrietsie katinitahekɨatsiemɨkɨ ke'axamɨtiuyuri.27Putsu xɨka 'utawewieni muwa kaneukawemɨkɨ,meta tete 'amɨnena xɨka hakaina yuhetsie kanikahɨamɨkɨ.28Mɨti'itawa kemɨ'ane 'axamɨtikɨhɨawe mɨkɨ kani'uxiwe'erieka,witsimɨtiuxaxata wakwamanatɨ kaniwarekaxɨriemɨkɨ.