Hiwerika1hch_wb2
1Xɨa'ui, yuxaɨta puyuhayewaxɨ,kiekari meripaitɨ witsimɨ'anekai teɨteri warexeiyatɨ.'Ukaratsi wiura hepaɨ pɨtiyuxexeiya,meripaitɨ mumariwekai yunaime nuiwarite watsata.Meripaitɨ wamaama mɨhɨkɨtɨkai.Hikɨri waɨriyarika ti'uximayatame pɨhɨkɨ wahetsiemieme.2Tɨkakɨta kwinimieme tiutsuatɨ kaniukatariyarɨwani,'ukaiya 'aurieyatsie kaniukakɨkani.Nixewitɨtɨma muwanaki'eriekaihikɨ pɨkahenɨtɨwa.Hamikumama yunaitɨ mekaniku'eirieni,me'eye'unietɨ pɨta mekanakɨne.3Tixaɨtɨ karayeitɨarieka, tepɨa kaunariyarikɨ 'uwiwitɨarieka,Kura kanehanieni 'ateewa paitɨ.Hipame nuiwarite watsata meyuhayewakɨ,hikɨ 'uxipiya pɨkahekaxeiyawe.Yunaitɨ memiweiyakai mekanenuku'axe,pɨkaheixeiyari kemɨ'ane miparewieni.4Kerutsareme huyeyarite 'utɨma 'umietɨ puhiweriyɨkɨ,nixewitɨri patsiekamekɨ 'ixɨararipa memuyukuxexeɨriwatsie pɨkaheta'axe.Kiekari kitenieyarite yuxaɨtame puyuhayewaxɨa:mawari wewiwamete meputi'aiwa,'ukari 'ɨimarixi mekaneu'erietɨweni,mɨkɨ yunaitɨ 'atsiwimekɨ mekaniu'uwani.5Memɨwaraye'uniekai metewa'aitɨatɨ mekanakɨne,kayuwatɨ mekaniu'uwani memɨwaraye'unie.Yawé kaniwaru'uximatɨani,waɨkawa 'axamemɨte'uyurikɨ.Waniwema mekanewitɨkieni 'ateewa paitɨ,memɨwaraye'unie hau'erietɨ mekaniwaruhapaximekaitɨni.6Kerutsareme witsikemɨ'anekainaime witsikemɨtiyuxexeiyakai katineuyehɨani.Mana memɨte'aitakai maxatsi wahepaɨ mekani'aneni,'ɨxa memɨwautɨwe hakewa meheikaxeiya.Mekaniyuta'unani mekayɨwawetɨri,memɨwaruweiya wahɨxie.7Paye'eriwa Kerutsareme,kepauka yɨxaɨta nutuixietɨ 'amuyeikakai,meripaitɨ waɨkawa kemɨrexeiyakai pɨra'eriwameripaitɨ mɨtipiinieyatɨkai.Kepauka memeye'unie hetsɨana memɨye'axɨa,nixewitɨ 'ana pɨkanua 'iparewienike.Memeye'unie mepixei kepauka matiwe,'ana mɨkɨ mepi'atsekai me'inanaimatɨ.8Kwinimieme 'axapɨtiuyuri Kerutsareme,'ayumieme ka'itiyatɨ kanayani.Meripaitɨ 'aixɨa memɨte'ixeiyakai hikɨ mepi'uxiwe'erie,maweme memɨxeiyakɨ,'ayumieme mɨkɨ putatsuaka,meta puyutewiya hɨxiena xɨka 'ixeiyamɨkɨni.9Kemarieya kaniutatɨnire,'atsipɨkareitimaitɨya 'arike hetsiena kemɨtiyɨnikekai.Kemɨratiwe pɨkatimaritɨa,kaniumawekaitɨni kemɨ'ane 'inɨtɨani.«Yawé, keneneuxeiya kenemɨtiuka'eniwa.Pɨnetsi'a'iwaxɨ mɨnetsi'aye'unie».10Meye'unie naime pɨtiyukapiinitɨanaime mɨraye'atɨka Kerutsareme mɨrexeiyakai,meta mɨkɨ puwaruxei tukita kepauka memeutahaxɨahipatɨ teɨteri Kakaɨyari memɨka'ayexeiya,'ekɨ pemɨkawapitɨakai,muwa 'ateɨterima memɨwayutixexeɨriwatsie memeutahakeni.11Yunaitɨ teɨterimama mekaniutitsuanani,meta mekaniku'uwani 'ikwai meheuwautɨkaitɨ,yupiinite mɨraye'atɨkakɨ mekatenipatani 'ikwaikɨmemayeyuyurinikɨ 'akuxi.«Yawé, neuxei keneu'a'ɨwiyakehepaɨ memɨnetenanaima».12«Xeme huyeta xemuyekɨka, xekeneuyu'ɨwiya:¿Kamɨtsɨ xekateyu'iyaritua nehetsiemieme?¿Hakewa xewitɨ nehepaɨ 'aneme 'uximatɨarika pexeiya,Yawé 'uximatɨarika mɨnetsiyetuiri hepaɨ 'anekame?Yawé kepauka muyeha'a nehamatɨa,'ikɨ 'uximatɨarika kaneyenɨ'ani nehetsiemieme.13»Muyuawitsie Yawé tai kaneyenɨ'ani,mɨkɨ ne'umeyari 'ɨarime kaniutitaiya.Winiyari kaniukeni nehɨxie,hikɨ mɨpaɨ kanetiniukunuitɨani.Kaneniuku'eirieni yuheyemekɨ,tukarikɨ yanekatineumɨmɨkɨni.14»'Axakenemutiuyuri pahete nehetsie yuku hepaɨ,Kakaɨyari katiniuyurieni mɨnetsi'utitɨtɨa.Nekɨipitɨa kanenakatɨtɨani,'ariri kɨmana nekani'uxeni.Kaneniyetuani 'iya teɨteri wahetsɨakemɨ'ane nemɨkawakema nemɨwatanewieni wahetsɨa.15»Nekiekaritsie Yawé nekuyaximayunaime pɨkawaruparewi,hipame pɨta kuyaxi kaniwarukuxeɨrieni memɨnetsitamienikɨ,meta netɨɨriyama memɨwarakuxɨtɨanikɨ.Yawé kanitapɨna yukiekari minaki'erie 'ɨimari Kura niweya,kaxie kemɨtipɨnarɨwa winu mayanikɨ hepaɨ.16»'Ikɨ naitɨ pɨnetsitsuaritɨa,hiwerikakɨ nepɨkaheuniereri.Xewitɨ 'ahurawa pɨka'uyeika mɨnetsinɨtɨanikɨ,meta mɨnetsituikakɨ.Neniwema mekaneutaxɨriexɨanimɨtatsi'aye'unie mɨtatsi'a'iwaxɨkɨ».17Tsiyuni pahiwa parewiya ha'iwawatɨ,peru pumawe xewitɨ minɨtɨanikɨ.Yawé mɨpaɨ tiuta'aitakuKakuwu 'aurie mematetɨkatei hikɨ mepeye'unie,hikɨ Kerutsareme kanihɨkɨtɨnixatsi xeikɨa meta mɨka'itiya.18«Yawé heitserie kanexeiyani,peru ne 'aitsikateyatsie yanepɨkatikatɨa.Xekeneu'enana, xeme hikɨ teɨteri,kenemɨtiuka'eniwa xekeneuyu'ɨwiya.Mekanehapanieni 'ateewa paitɨnehetsɨa miemete temari meta 'ɨimarixi.19»Meripaitɨ nemɨwanaki'eriekai nekaniwarutahɨawe,peru mɨkɨ mekaneniuku'eirieni.Mawari wewiwamete meta 'ukirawetsixi nehetsɨa miemeteyunaitɨ kiekaritsie mekaniukwini,'ikwai mekuwautɨwetɨ,'akuxi memayeyuyurinikɨ.20»Yawé, keneneuxeiya nepɨtiuka'eniwa.'Ari nepi'enie nepɨmɨxime.Ne'iyari pɨkayumaiwe,kwinimieme nemɨkaheu'enakaikɨ.Netɨɨriyama mekaniukwi'iwa takwa,'upaitɨta mɨɨya xeikɨa kanixuaweni.21»Teɨteri netsuari mekani'enieka,xewitɨ kaniumaweni mɨnetsinɨtɨani.Yunaitɨ memɨnetsi'aye'unie mekatenimaika kenemɨtiuka'eniwa,mekaniyutemamawieka nehetsie kepemɨtiuyurikɨ.'Ari kenanɨ'a 'uximatɨarika kepemutayɨ,mɨkɨta mɨpaɨ memɨte'uka'eniwanikɨ ne kenemɨtiuka'eniwa.22»'Ahetsɨa paitɨ keheye'anitita ke'axamemɨte'uyuri.Kepemɨnetiupitɨa 'uximatɨarika ke'axanemɨtiuyurikɨ,mɨkɨta mɨpaɨ ketiniwarupitɨa.'Ari pɨmɨire kenemɨtiutatsuaka,meta ne'iyari 'ari pɨkɨmɨmɨkɨ».