Kuwi6hch_wb2

Kuwi hutarieka kemutayɨ

1Hikɨ Kuwi mɨpaɨ katinita'eiya:2«Matsi 'aixɨa pɨyunikeyu kenemɨtiukakukuine xɨkati'inɨnɨatametsie 'uti'inɨatsienike meta naitɨ kenemɨti'uximatɨarie.3Xɨari haramara xiekari mɨtika kemɨkarahete reuyeta pɨreuhaniwe.'Ayumieme hau'erietɨ nemutaniuni hepaɨ xepɨnete'u'eni.4Naimekɨmɨtɨrɨkaɨye 'ɨrɨteya kanetinikwinitɨaka,ne'iyari mɨkɨ 'uayeya mɨmɨya kani'ukweni.Kakaɨyari marika nehetsie kaneyenɨ'ani.5¿Puxu yeutanaka xɨka yu'ikwai hexeiyani tiutatsuaka?¿Tuuru kepauka yu'ikwai mexeiya tiutamuwa?6¿'Ikwai ka'unamatɨ hahamuritɨ tiyɨwe mɨkwaiyanikɨ?¿Tawári hetsie mɨyeka manuyehekɨa keha'ane?7Matsi yanepɨkara'eriwa neme'inɨatakɨ,nepɨtiutakwikwine mɨkɨ 'ikwaikɨ.
8»Matsi xɨka Kakaɨyari netsiyetuirienike tita nemɨtiwawirie.Kakaɨyari xɨka tita nemɨreuyehɨwa netiyetuirienike.9Xɨka Kakaɨyari naime netsi'utimuraxɨanike,xɨka yumama mɨtɨrɨkaɨye nehetsie 'utatuanike, netsi'ukumaweriyake.10Ne mɨyatɨtɨ 'akuxi 'ipaɨ nepɨtinenɨtɨakakeyu,tsepanetɨ kenemɨtiuka'eniwakɨ waɨkawa netiukakukuinetɨ:Kakaɨyari Mupatsie niukieya nepɨkahehɨa.
11»Tawari tɨrɨkari pɨkayuhayewane nemɨta'ikwewanikɨmeta tixaɨtɨ nepɨkatitakwewi ne'ayeyuritɨ nemuyeikanikɨ.12¿Tete mayetse'i kuta netihɨkɨ?¿Wurunitse waiyariyari kuta nerexeiya?13¿Kenetiyɨwe nekɨmana nemuyuparewienikɨ,naimeri netiunawaiyarieka tita nemɨrexeiyakai?
14»Tsepanetɨ xewitɨ Naimekɨmɨtɨrɨkaɨye 'ayemakatɨ mɨtiuhayewaxɨ,hamikuya pɨka'iku'eiri yurikɨ yatiparewietɨ.15Matsi ne'iwama 'aki hayari kemɨtiyukupata hepaɨ mekani'aneneni,'uhanetɨ watahautsitɨwatɨ:16kepauka 'ɨwi mɨkakukenitsie waɨkawa 'akananutinenereni,kepauka 'ɨwi mɨtipare 'apatayeyeure,17matsi 'uhanetɨ katinikuhayeikawani mɨtiuwakinitsie,mukɨxɨxɨretsie yuhuyeripa kanakumamawereni.18Kɨkamete xaɨtsie pɨta mekaniukɨkani,makumawetsie mekanekɨkani, muwa mekanetakukuweni.19Kɨkamete Temaha kiekatari haa mekaniuwauximeni,yuharerutamete Tsawa kiekatari meta'ikwiewatɨ haa mekaniuwauximeni.20Yuri kememɨte'eriekai mekani'u'uxeni,kepauka mana memu'axɨa mepu'iyɨri.21Yaxeikɨata xeme kaxetiniyurieka:xɨka tixaɨtɨ mariweme xete'uxeiya xekaniutimamaweni.22¿Kemɨ'ane pɨxetiutawawiri tixaɨtɨ xemɨneteminikɨ,yatɨni yutuminikɨ xemɨteyutuanikɨ nehetsiemieme?23¿Kemɨ'ane pɨxetiutawawiri xemɨnetsixɨnakɨ memɨnetsi'aye'unie wahetsɨa,yatɨni memɨkate'uyukanenimaya wahetsɨa xemɨnetsitawikweitsitɨanikɨ?
24»Kenetineuta'ɨkitɨa, 'anari nepɨkataniuni,ketitatsie 'axanetiuyuri keneneuxeitsitɨa.25Niuki 'aixɨa manɨyɨne 'axapɨkatiyuyuruwa,matsi tixaɨtɨ pɨkatiyunaki'erie 'axakexemutiyuane xeikɨa.26¿Neniukikɨ nehetsie xete'ahɨani,'atsixekatemaitɨ xewitɨ mɨwaɨripie hetsie mayeneikakɨ 'eka hepaɨ 'anetɨ?27Xeme matsi xekaniyuwaɨriyani nutui hepaɨtsita xemuyuta'iwakɨ,meta yuhamiku xekaniutuawaweni tsepa titakɨ.
28»Xekeneneuxeiya nehɨxie,¿Nexetiku'itaiyame xenete'erie?29Xekeneutimaixɨa hau'erietɨ xepɨkateyurieka,mɨpaɨ xeketenetimati, ne 'axanepɨkatiuka'iyari.30¿'Axaniuki kuta nehetsie tixɨawe?¿kamɨtsɨ neneni katimate tita 'aixɨa mɨti'ane meta 'axamɨti'ane?
expand_more
Search