Kuwi34hch_wb2

Hutarieka 'Erihú kemutayɨ

1Metatsiere 'Erihú mɨpaɨ kaniutayɨni:2«Xeme temaiwawemete, neniuki xekeneu'eni,xeme 'ɨxatsitɨariekate, yemekɨ xekeneneu'eni.3Naka 'enakareme niuki puwata'inɨnɨata,neni 'ikwai mɨrewata'inɨnɨata hepaɨ.4Teyunaitɨ 'ikɨ mɨyamɨti'ane tepeitimaixɨani,yatepɨtiyuani teyunaitɨ tita matsi 'aixɨa mɨti'ane.
5»Kuwi mɨpaɨ putaine: “Ne 'axanepɨkatiyuruwame,matsi Kakaɨyari nehetsie 'aixɨa mɨtiyurieni pɨkayuwaɨriya.6Mɨti'itawa nekani'eriwanitsɨari,tsepa tewi heitserie nemexeiya nemɨhɨkɨ,'ɨrɨteya 'ari pɨnetsimiexime,tsepa 'axanekatiuyuri”.7¿Hakewa xewitɨ Kuwi hepaɨ 'anetɨ peyeika,yunanaimarika haretɨ haa hepaɨ?8Kaninakeni 'axateyuruwamete muwatemawiekakɨmeta 'axamemɨte'u'iyari muwanɨkakɨ.9Meta mɨpaɨ putaine kename tewi tixaɨtɨ kara'iwaKakaɨyari naki'eritɨatɨ xeikɨa xɨka 'uyeikani.
10»Teɨteri xemɨtemaiwawe xekeneneu'eni:Kakaɨyari 'axamɨtiuyurieni pɨkayɨwe,meta Naimekɨmɨtɨrɨkaɨye kemɨkatiheitseriekɨ yapɨkatiyurieni.11Kakaɨyari tewi kemɨtiu'uximayataxɨkɨ yapɨrekapitɨwa,kemɨreuyewetse hetsiena yapɨtiyuriene.12Mɨpaɨ tepɨkateku'eriwani kename Kakaɨyari kemɨkatiheitserie tiyuriene.Naimekɨmɨtɨrɨkaɨye heitserie kemɨrexeiya pɨka'anutuna.13¿Kemɨ'ane kwiepa tɨrɨkariyaya pipitɨa?¿Kemɨ'ane penukake kwiepa mɨti'ɨwiyanikɨ?14Xɨka mɨpaɨ tiu'erieni kename yu'iyari tatsinawairieni,yu'iiya xɨka tatsi'unawairieni kɨmana tukari temexeiyakɨ,15yunaitɨ teɨteri mekaniukumaweriweni,yunaitɨ tumuanari mekanakɨniwaweni.
16»'Ikɨ ketineu'eni, xɨka yurikɨ petimaiweni,yemekɨ keneu'eni kenemɨtayɨni.17¿Tiyɨwekuta tita mɨtiheitserie tixani'erietɨ mɨtiuta'aita?¿Kamɨtsɨ Kakaɨyari heitserie mexeiya mɨtɨrɨkaɨye hetsie perahɨani,18kemɨ'ane te'aitamete memamariwaweme mɨkawarayeitɨameta memɨtɨrɨkawi yatiwakɨhɨawetɨ 'axakememɨteyuriekɨ?19Kakaɨyari te'aitamete mexɨakate xeikɨa waɨkawa pɨkawaparewie,meta xikutsixi xeikɨa pɨkawaparewie tixaɨtɨ memɨkateheuxeiya kawanaki'erietɨ.Yunaitɨ matsi mɨkɨ 'iwewarimama mepɨhɨkɨ.20Yapauka tɨkari hixɨapa menitakukuweni,teɨteri mekanitiyɨyɨakani marikakɨ mekanitakukuweni,Memɨmamariwawe mekananakaxɨriwaniteɨteri 'atsimekateyuriekaku.
21»Kakaɨyari hɨxiteya teɨteri wahuye pɨwaxeirie,mɨkɨ yuxexuitɨ kememɨte'u'uwa pɨ'ɨwiya.22Pumawe yɨriya meta 'etɨri 'emayetsuye'axateyuruwamete mɨwati'awietakɨ.23Kakaɨyari mitixeiyaxɨani pɨkaheuyewetsekepauka muwata'iwawiyakɨ.24Pɨkati'iwauni 'akuxi memɨmamariwawe muwaranakaxɨrienikɨ,meta hipame pɨta muwaranuti'uitɨanikɨ.25Kakaɨyari naime katinaka'utɨwani kememɨteyurie,yɨwikɨta kaniwaratixɨrɨwani meta kaniwatiketsinani,26putiwaruka'enitsitɨwa ke'axamemɨte'uyurikɨyunaime teɨteri wahɨxie,27me'iweiyatɨ memɨte'uhayewaxɨkɨ'aitsikaya memɨka'anuku'erikɨ.28Hetsɨana paitɨ memiye'atɨakɨtixaɨtɨ memɨkatehexeiya meta memɨteheuyehiwa wahiwari,hikɨ Kakaɨyari kani'enieni.29¿Matsi kepaikɨ hetsiena pɨrahɨawexɨka mɨkɨ kayuwatɨ tiuyerɨni?¿Kepaikɨ pixeiyawe xɨka yunierika 'awietani?Mɨkɨ yunaime teɨteri meta wakiekari waheima pɨkawe,30'axamemɨte'u'iyari memɨkate'aitanikɨmeta teɨterimama waruwiniyakɨ.
31»Xɨka 'ipaɨ petitahɨawe:“Yurikɨ ne'axanepɨtiuyuri, tawariri 'axanepɨkamatitahɨawe.32Yakenetineuta'ɨkitɨa tita 'akuxi nemɨkatixeiya,xɨka 'axanetiuyurieni, tawariri mɨpaɨ nepɨkatiyurieni”.33¿Kakaɨyari metiupitɨawe,'ekɨ kemɨmatinake,tsepa 'ekɨ pemɨka'itanaki'eri?Ne nepɨkahɨkɨ yanemɨtayɨni, matsi 'ekɨ pɨta,'ayumieme yakeneutayɨki kepemɨtiku'eriwa.
34»Memɨtemaiwawe yamekenete'utahɨawemeta xeme xemeti'enatɨkɨka xemɨnetsi'enie:35“Kuwi 'atsikatimaitɨ putaine,niukieyatsie pumawe meitimaitɨyanikɨ”.36Kuwi keheutixeiyariexɨani,'axatiyuruwame hepaɨ kaniutayɨni.37'Axatiuyuriekatɨtɨ tawari 'akuxi mɨkaheu'ena kanayuyeitɨwani,meta 'akuxi tahɨxie kataniyuriyani,metatsiere Kakaɨyari hepaɨtsita waɨkawa 'axakaniutayɨni».
expand_more
Search