Kuwi31hch_wb2
1»Ne nehɨxitekɨ tɨratu nepuwewiekaikapa 'uka ne'uxeiyakɨ ne'ihiwe'erietɨ.2¿Kakaɨyari 'amutewi hetsɨa timieme ketita neranunakekeyu?¿Ketita netiyetuiriyarienikeyu Naimekɨmɨtɨrɨkaɨye hetsɨa timieme 'emeutitewatsie?3'Axateyuruwamete memɨka'unarienikɨ kaniwahetsiemiemetɨnimeta 'axamekani'itɨariekuni 'axamemɨte'u'iyari.4¿Kamɨtsɨ Kakaɨyari kanetixeiya kenemɨtiuyeikameta kati'inɨata kenemɨtiumiekɨ?5»Xɨka 'axa'anemekɨ ne'uyeikani,yatɨni kwamanarikakɨ xeikɨa neyumexɨitɨaka,6Kakaɨyari kenetsi'u'inɨata ti'inɨnɨatame 'aixɨa mɨ'anekɨ,hikɨ 'ana yapɨretimani kename 'atsinemɨkatiuyuri nehɨkɨ.7Xɨka kenemɨtiuyeikakɨ ne'uku'eirieni,xɨka ne'iyari nehɨxite tita mɨtihiwe'erie 'anukuweiya,yatɨni nemamakɨ mɨirikɨa tewinɨari netihɨniyani,8mekete'utikwani hipatɨ tita ne nemɨtiuka'e,meta naitɨ ne'etsari kereuyehɨiyani.9»Xɨka xeime 'ukaratsikɨ netiu'irɨwiyarieni,xɨka nehepaɨ tewi kitenie ne'utihupakaitɨni,10kamɨtsɨ ne'ɨya xeime 'uki 'ikuya ke'ukatɨxɨ,meta hipatɨ 'ukitsi hamatɨana meke'ukahini.11Mɨkɨri yemekɨ tewiyarika pɨhɨkɨtɨnikeyu,'axamɨti'ane mɨkɨkɨ nemutaxanetsiewekaikɨ.12'Ɨkwari mɨreuyehɨani hepaɨ pɨtimatsiɨkɨnike.Naime mɨrakɨxɨtsitɨa tita nemɨtiuka'e nanayari 'ɨarime hepaɨ.13»Xɨka neyuta'imani 'aixɨa nemɨtiyurienikɨnete'uximayatsiriwamete 'ukitsi meta 'ukari wahetsiemieme,kepauka memɨnetsi'anati'eiyakaitsie,14¿keri netayɨni kepauka Kakaɨyari mɨnetsita'iwawiyatsie?¿kenehaineni kepauka mɨnetsitakwewienitsie?15Mɨkɨ Kakaɨyari nemaamatsie mɨnetsiyeweriyaxɨmɨkɨtatsiere mɨwarutiwewi kanihɨkɨtɨni,tamaamama wahetsie teyetekaku kataniutiwaweriya.16»Hatsuaku nepɨkatiuhayewaxɨ memɨteheuyehɨwa wa'iwaurika ne'enietɨ,meta wiuraxi nepɨkawaruhayewaxɨ mekwiximeme,17hatsuaku paa nexaɨta nepɨka'utakwai,meta nutuite nekatiwakweririetɨ.18Nemɨtemaikɨtɨkaitsie paitɨ ne wahetsiemieme wapaapa nepɨhɨkɨ,nunutsiyari paitɨ wiuraxi nemuwaruwitɨxime nepɨhɨkɨ.19Xɨka xeime ne'uhayewa yu'ixuriki kahexeiyatɨ mɨmɨnikɨ,yatɨni xewitɨ mɨreuyehɨwa mɨranakatɨni karexeiyani,20xɨka mɨkɨ yu'iyarikɨ 'aixɨa kahaineninemuxatsi wahuxarikɨ newarutikemaritɨaku,21yatɨni xɨka nutuite wahetsiemieme nemama ne'utatserawaɨkawa nemɨyɨwekaikɨ heitseriekamekɨ yanemɨtayɨnikɨ 'itsɨkame nehɨkɨtɨtɨ,22nemamate kehewayexɨnixɨani nenaiparita,mɨrewayewiyatɨkatsie kehewayetekixɨani.23Yuheyemekɨ ne Kakaɨyari yamɨtiwarakapitɨwakɨ nepɨmakaxe,mɨkɨ ti'aitame mumariwe hɨxie nepɨkayɨwe nemɨyɨxɨna.24»¿Kamɨtsɨ tuminitsie xeikɨa netita'ikwewa,yatɨni huru 'aixɨa mɨ'ane mɨpaɨ nerehɨawe: “'Ahetsie nepɨtiwiya”?25Piinitɨarika waɨkawa kenemɨrexeiyakaihatsuaku mɨkɨkɨ nepɨkaheyuta'ɨrixɨ.26Tau xawatɨriyaya mariweme nepɨkahayeitɨwa,yatɨni metseri xawatɨriyaya,27'awietɨma nepɨkawarayexeiya,meta 'itsiya netenie mieme nepɨkawarenɨ'airiwa.28'Ikɨ 'axamɨti'anekɨ yaxeikɨata nepɨtaxanetsienikeyu,Kakaɨyari muyuawitsie makawe nepuku'eirienikekai.29»Hatsuaku nepɨkayukatemawi mɨnetsi'aye'unie 'atiweku.Meta tiuka'eniwakaku.30Hatsuaku neteta 'axanepɨka'utayɨ xeime hetsiemieme'axakehe'itɨarieka nehaitɨ.31¿Kemɨ'ane nekiita pɨka'utahuxai,kemɨ'ane nemexatsie mɨrapikai pɨkatiutikwai?32Hatsuaku yeikame nekitenie nepɨkareunamiri,hatsuaku nemɨka'imate yɨwikɨta kaye'utɨa pɨkahekatei.33Hatsuaku ke'axanemɨtiuyuri nepɨka'anukana,hipatɨ teɨteri wahepaɨ,nehetsie mɨkarahɨiwanikɨ nepɨkahanukanakai,34hipatɨ 'axamenete'utahɨawekɨ.Hatsuaku kayuwatɨ nepɨkatiuya meta nekiita nepɨkaheuyunakainewamakatɨ ne'iwama memunetsinenixeiyanikɨ.35»Matsi yemekɨ yanepɨra'eriwakaku xɨka Kakaɨyari netsi'u'enienike.'Ena netseyu nepaumani:Naimekɨmɨtɨrɨkaɨye kenetsi'uta'eiya.Xɨka mɨkɨ netsimiemɨkɨni,mɨpaɨ mɨkɨ yakeraka'utɨani.36Mɨkɨ xanetsika nenaiparitsie nepikɨtɨneni,meta kuruna hepaɨ nekanenamakamɨkɨ.37Hɨxiena nepɨtakeni nemanuyeka nemɨhɨkɨtɨni hepaɨ,meta nepɨtitaxatɨani xexuimekɨ kenemɨtiuyeikakaikɨ.38»Xɨka nekwie nehepaɨtsita hahiwani,meta naitɨ xurukuyari xɨka 'utitsuanani,39xɨka xeime 'itsanarieya ne'utikwani nekatipitɨaka,yatɨni xɨka wakutsiyarima memɨkayuwaɨriyanikɨ newaru'uximatɨani,40hikɨ nekwiepa tɨriku hetsiemieme xuya pɨta ke'utinexɨani,meta tupiriya tsewara hetsiemieme».Mɨpaɨ Kuwi 'utayɨka katinanunɨni tikuxatatɨ.