Kuwi29hch_wb2

Kuwi yuxaɨta yatiku'eriwatɨ kemutayɨ

1Kuwi tawarita mɨpaɨ kaniutayɨni:2«Waɨkawa metserite manuyekɨ nepuku'eriwa,kepauka Kakaɨyari mɨnetsi'ɨwiyakaitsie.3Yɨkɨxemekɨ neheima pɨnetsikɨxiyakai,makɨyɨwi hekɨariyayatsie nepuyeikakai.4'Iya tukari nepa'eriwa, kepauka yakɨ nemɨnemaikaitsie,'ana Kakaɨyari nekii 'aixɨa pɨyuriekai yunaki'eriyakɨ.
5»Kepauka 'akuxi Naimekɨmɨtɨrɨkaɨye nehamatɨa muyeikakaitsie,meta neniwema ne'aurie memɨtiyaxikekaitsie,6kepauka retsi kuneriyarikɨ neketatetsie nemeyuhauxinakai,meta 'ayeparitsie hatseiti hayari paneikakai,7kepauka nemayeyeikakai kiekari kitenie wa'ɨxatsitɨwame nemɨhɨkɨtɨkai,kepauka yuwaɨkawa memayuxeɨrietsie 'ɨparitsie nemayeixakai,8temari menetsixeiyame hu mepɨkɨkakai,'ukirawetsixi meta mepɨti'uwekai,9memanuyetei metekuxatatɨ mepɨtekuhayeikawakaimeta yumamakɨ yutenie mepɨwɨwɨrekai.10Memanuyetei 'a'inɨkai metekuxatatɨ mepakɨkakai,meta waneni wateta pukuwewerikekai.11Kemɨ'ane memɨnetsi'eniwakai netikuxatakaku, 'aixɨa meputiyuanekai nehepaɨtsita,kemɨ'ane memɨnetsixexeiyakai, 'aixɨa meputiyuanekai.12Tixaɨtɨ mɨkarexeiya xɨka parewiya ha'iwawani nehetsɨa, ne nepiparewiekai,yaxeikɨatatsiere nutui, yuparewiwame mɨkahexeiya.13Tixaɨtɨ memɨkatetakwewie 'aixɨa mepɨnetekɨhɨawekai,nekɨmana temawierikakɨwiuraxi wa'iyari putihiwakai.14Tita mɨtiheitserie kamixayari nepanakatɨkɨkai,mɨkɨ nemata nemuwawiwa pɨhɨkɨtɨkai meta nemu'utsie nemayɨhɨaya heitserie nemexeiyanikɨ.15Memɨkaheuneniere wahetsiemieme wahɨxite nepatɨa,memɨka'ɨkɨniwawe wahetsiemieme, wa'ɨkate nepatɨa.16Memɨteheuyehɨwa wapaapa nepatɨa,meta teewatari wahetsie nunuwame nepatɨa.17'Axamemɨte'u'iyari watamete nepanaye'unaxɨa,watametetsie paitɨ wa'ikwai nepayeha.
18»'Ana mɨpaɨ nepɨtiu'eri: “Nekiita nepɨmɨni,netukari kayu'inɨatsinɨatɨ payani xiekari haramara tetsita mɨtika hepaɨ.19Nenanayarite hata paitɨ pɨreukawiyaxɨani,haɨtsikari tɨkarikɨ mieme nexawaritsie peukayaxe.20Mariweme kenemɨrexeiya nehetsie puyuhayewani witsimɨ'anene,meta netupi yanepɨrakweka”.
21»Teɨteri mepɨnetsi'eniwakai neniuki metakwewietɨ kayuwatɨ metetetɨ me'enukwewienike,kayuwatɨ me'umatɨ ne'ɨxatsi mepuka'ɨnakai.22Ne kepauka nemɨtiutaxaxatakai, xewitɨ 'axapɨka'utainekai nehepaɨtsita,neniuki wanakata pɨtikunanakekai.23Neniuki mepɨtakwewiekai me'enukwewienikexewitɨ wiyeri 'emɨreutetere kemɨtitakwewie hepaɨ.24Xɨka ne nehanaweni newaxeiyatɨ, mɨkɨ yuri mepɨkanete'eririekai,nehɨxie nemakananekɨ mɨkɨkɨ mepɨyuwaɨriyakai.25Huye ke'aneme memuweiyani nepuwaxeitsitɨakai,ne wayeta nepayeixakai,wahamatɨa nepuyeikakai ti'aitame yukuyaxima watsata muyeikani hepaɨ,kemɨ'ane memɨyuhiwerie wanɨtɨwame hepaɨ netiyumaitɨ.
expand_more
Search