Kuwi16hch_wb2

'Auxɨwirieka Kuwi kemutayɨ

1Mɨkɨ hepaɨtsita, Kuwi mɨpaɨ kaniutayɨni:2«Niuki 'ipaɨ 'anuyɨtɨkaime waɨkawa nepeye'eniwari,xeme matsi, xenetsinɨtɨanike xepɨnetsi'uximatɨa pɨta.3¿Kamɨtsɨ xekatehayewa kayuwatɨ xe'umatɨ?¿Ketitakɨ kuta 'axanetixematɨa xemɨnetsiye'eiyarɨmenikɨ?4Netatsiere yaxeikɨa nekatinixe'utahɨawiwenixɨka xeme nehepaɨ xetekukuyenike.Netatsiere xehepaɨtsita kexemɨte'uka'eniwanikɨ witsi'anemekɨ yanepɨtikuxatanike,nemu'u ne'uyuitɨwatɨ nexeheunanaimatɨ.5Neniukikɨ nekanixe'anutanieritɨawenike,nekanixe'ɨnɨtɨanike netenikɨ.
6»Xɨka ne'utaniukani, nekukuiniya pɨka'anukanunuwa,xɨka neka'utaniuni, yaxeikɨata tsiere pɨkaheunuani.7Yurikɨ Kakaɨyari pɨnetsi'uka'unaxɨ,netɨɨriyama puwarutayuniyaxɨ.8Pɨnetsi 'anutinama xeikɨa, nehepaɨtsita pɨtihekɨata,pɨnetsi'utawatsiɨxaxɨ mɨyane'anetɨ nekɨmana xeikɨa katinikuxaxatsiwani nehetsie pɨrahɨiya yakɨxeikɨa.
9»Ha'atɨ Kakaɨyari pɨnetsi'uweiya pɨnetsititsana,nehetsiemieme yutamete putixikauteke,mɨnetsi'aye'unie kwi pɨnetsixeiya xeikɨa.10Teɨteri nehetsimieme waɨkawamekɨ mepɨnetsinanaima,teyuyuriyamete ne'auritapa mepɨnetsihautiwaya,yunaitɨ meyɨnɨtɨ nehepaɨtsita xeikɨa mepeuniuka.11Kakaɨyari 'axamemɨte'u'iyari wahetsɨa xeikɨa pɨnetsiyetɨa,'axamemɨte'u'iyari wahetsɨa pɨnetsi heutahɨa.12Ne 'aixɨa 'iyari nepuyeikakai, mɨkɨ pɨnetsiheutitsanaxɨa,nekɨipitɨa 'awiereka pɨnetsiheutimuraxɨa,nehetsie puyuta'iwiri mɨnetsitamienikɨ.13Tupikɨ temɨmɨmete hetsɨana miemete mepɨnetsi'anutina.Mekate'uyukanenimayatɨ nemumete mekananuyexuni,meta nenema meta netsiɨrika payewiwi kwiepapaitɨ.14Waɨkawa pɨnetiukwinitɨa 'akuxi pɨnetikwinitɨa,pɨnetsi'anukuwei yumemiwame mɨhɨkɨtɨni hepaɨ.
15»Newaiyari heiwerika kamixayari pɨhɨkɨ,Nekana tumuanaripa peuyune.16Waɨkawa ne'utatsuatɨ nehɨxie nepayexeta,tsuarikɨ nepɨwatiyɨyɨwi nehɨxitetɨa,17matsi nemamakɨ 'axanepɨkatiuyuri nepeu'itiyatɨka,kenemɨtiyunenewie pɨheitserie.
18»Xɨa'ui kwie, nexuriya pepɨka'anukanarɨmani.Nehiwari maununuwanikɨ pepɨka'ipitɨaka.19Hikɨtɨtɨ muyuawitsie xewitɨ kanenixeiyani,'ahautitewakaku neheima nunuwame kaneyeikani.20Nehamiku pɨhɨkɨ nehetsiemieme metaniuni,mɨkɨ hɨxie waɨka nekaniyuhiwerieka,21Kakaɨyari hɨxie nehetsiemieme mɨtaniunikɨ,xewitɨ yuhamikuma wahetsiemieme xeime hɨxie maniuka hepaɨ.22Yapaɨmexɨa wiyari xeikɨa kananukayeimɨkɨmexixi ne nekaheyeiwe nemɨkahakunuanitsie.
expand_more
Search