Kuwi15hch_wb2

'Eripaxi hutarieka kemutayɨ

1Merikɨte 'Eripaxi Temani kiekame Kuwi mɨpaɨ katiniuta'eiya:2«Mɨtimaiwe 'atsimɨkatimate hepaɨ pɨkatiyu'eiyameta 'ekaniuki pɨkawewie.3Meta niukikɨ yakɨ xeikɨa 'utaitɨ pɨkayumienemeta niukikɨ tixaɨtɨ mɨkatiyunaki'erietɨkakɨ.4'Ekɨ matsi 'ahetsie pekanihayewani Kakaɨyari pe'ayemakatɨ,meta waɨkawa peka'eyexeiyatɨ mɨkɨ kemɨtinake.5'Axamɨti'ane petipitɨakaku 'ateni yakatinihekɨatani,yaxeikɨa pepɨtiuxaxata teyukwamanamete wahepaɨ.6'Aniukikɨ pekananuyutahɨpani, nekɨma hawaikɨ,'Ateni yakatinikuxatani 'ahetsiemieme.
7»¿'Ekɨmerikuta tewi pemutinuiwaxɨ petihɨkɨ?¿'Ekɨmerikuta petiutinuiwaxɨ yemurite kanewekaku?8¿Petiu'enaxɨ kuta Kakaɨyari waxeɨrietɨ kemɨtiwa'ɨxatsitɨatsie?¿'Ekɨxeikɨa kamɨtsɨ petiuyemate?9¿Kepetimate 'ekɨ tame temɨkate'uyemate?¿Kepereti'ena 'ekɨ tame mɨpaɨ tekate'i'eniekaku?10Tame tekanimutuxatɨkani meta waɨkawa wiyari tekanexeiyatɨkani,tame matsi waɨkawa tekateniuxeiya keyuri 'apaapa.11¿'A'iyaritsie pɨkareuyeyeika tsepa Kakaɨyari matsinɨtɨameta metsikɨhɨawetɨ 'aixɨa 'anemekɨ?12¿Ketitayari haxɨakɨ xeikɨa perayeika?¿Ketitayari 'ahɨxitekɨ petiutimerɨka?13¿Ketitayari Kakaɨyari hɨxie xeikɨa petiha'ameta 'aneni pepɨkapirenutɨa pepitatua xeikɨa?
14»¿Ketita tihɨkɨ tewi 'aixɨa 'aneme muyu'erieka,meta 'uka hetsie yenuiwakatɨtɨ heitserie muyupitɨanikɨ?15Xɨka Kakaɨyari te'i'uximayatsiriwamete memɨpatsie wahetsie yuri kati'erieka,meta muyuawi tɨma 'itiyakame pɨka'ayeitɨa,16ketiyɨwe matsi tewi hetsie yuri mɨte'eriekakɨ,mɨxani'eriwa 'axatiyurienetɨ meta yu'iyaritsie heuharimɨkɨkaku 'axamɨti'anekɨ.
17»Keneneu'eni, kenemɨtayɨni,ketita nemɨtiuxei yanepɨtayɨni,18Mɨkɨ kanihɨkɨtɨni temaiwawemete memihekɨataxɨ,tixaɨtɨ mekate'anukanatɨ yupaapama wahetsie tita memɨtehetima.19Mɨkɨxeikɨa kwie mepɨyetuiriyarie,xewitɨtɨma teewa kiekame wahixɨata pɨka'uyetɨa.20Kakaɨyari mɨka'ayexeiya pɨtiuka'eniwani kepaɨmexɨa muyeikani,mɨkatiyukanenimaya tukarieya kaniuti'inɨatsiyarieniri.21Mariutsika kani'enieka.Kepauka kayuwatɨ muma, tenawayamete hetsɨana mekaniye'axeni.22Makɨyɨwitsie xɨka 'uyani pɨkahakunuani pɨtiku'eriwa,'ixiparakɨ mumieriemɨkɨkɨ.23Hau'erietɨ pukuyeika, wirɨkɨxi puwa'ikwai xeikɨa,pɨtimate hetsiena maye'aximekɨ yɨriya tukariyari.24'Aixɨa mɨkatiyuriekɨ meta mɨtiuka'eniwakɨ marika piwewirie,yumariutatɨ ti'aitame mitamierieximeni hepaɨ,25Kakaɨyari mu'unikɨ heu'u'urawitɨ,Naimekɨmɨtɨrɨkaɨye hepaɨtsita mariweme mayuyeitɨakɨ.26Yɨkɨipi heitserie 'anukuhanatɨ Kakaɨyari mutamikɨ,'atsutsuime 'a'ɨtɨ yuheima nunuwame mɨtɨrɨkawi.
27»Tsepa yɨhɨxie mayewaiya wiyakɨ,meta mɨranayuhayewa wai manayuhɨayatsie,28kiɨripa kanetayerɨmɨkɨ,kiita hipatɨ memɨkahayeteita,kii matixɨriximeta.29Waɨkawa kemɨrexeiyakaikɨ katiniku'eirimɨkɨ, pɨkareutere tita mɨrexeiyakemɨrexeiya kwiepa manukatsie tɨma pɨkatitaxiɨni.30Makɨyɨwitsie 'uyeikatɨ muyuta'unakɨ pɨkayɨwe,yɨrarimeyari kanitayɨnarimɨkɨ tai xɨriyarikɨKakaɨyari 'iiyaya kanitaxɨtsitɨamɨkɨ.31Mɨkɨ pɨkayukwamanani meta niuki yakɨ mainetsie yuri pɨkati'erieka,mɨpaɨ yɨanetɨ tixaɨtɨ pɨkatiukaxeiya.32Meripaitɨ yapɨrakapitɨarieni kahaye'awekaku 'akuxi kemɨtiyurienikekaikɨ,meta xawariri pɨkatitsitsiɨraxɨani.33Kaxie nanari takariyari mɨtsitsiɨrawi mɨrauyewe hepaɨ kaniyɨmɨkɨ,huriwu mɨkatixuturuwe hepaɨ kaniyɨmɨkɨ.34Kakaɨyari memɨka'ayexeiya wanɨtɨ 'aixɨa mɨti'ane pɨkatiukaxeiya,'itarikakɨ tumini memɨ'iwakuwakii taikɨ kanitixɨtsitɨariemɨkɨ.35Tita mɨkatiheitserie yuhetsie mepɨpitɨa meta 'axamɨti'ane mepɨtiniweya,wahetsie kwamanarika kanayeneikani memitiniweyani hepaɨ».
expand_more
Search