Kuwi12hch_wb2

Kuwi naurieka kemutayɨ

1Mɨkɨ hepaɨtsita Kuwi mɨpaɨ katinita'eiya:2«Xeme xɨari kiekari xemanukuhana xepɨhɨkɨ.Kepauka xeme xemɨkwini, timaiwetɨ xewitɨ pumaweni.3Neta xehepaɨ nekatinimaiweni,xeme xeikɨa waɨkawa xete'uyemaikame xepɨkayu'erieka.Neta mɨkɨ tinaime nekatinakumaika.
4»Ne, Kakaɨyari nepɨkɨhɨawekai mɨkɨta pɨnetsiku'eiyakai,hikɨri nehamikuma netsi'atsemete memɨhɨkɨtɨnikɨ nepayuyeitɨa,ne 'atsieriwame nepɨhɨkɨ, heitserie nemexeiya nehetsie mɨkarahɨiwa.5Teɨteri 'aixɨa 'iyari memeutitei mɨpaɨ meputiyuane:“Kemɨ'ane mɨtiukwinitɨarie tawari peuyewetse waɨkawa mɨnɨitɨarienikɨ”,“Kemɨ'ane matiwexime, pauyewetse matitaimarieni”.6Tenawayamete 'aixɨa 'iyari yukie mepeutitei,'aixɨa 'iyari mepu'uwa Kakaɨyari memɨhaxɨatɨamɨpaɨri mepɨteku'eriwa me'ikemakame meyu'erietɨ.
7»Matsi tewaxi yeutari keniwaruta'iwawiya,mɨkɨ mekamenayehɨtɨakuni,wikixi memawɨwawe keniwaruta'iwawiya,mɨkɨ mepɨmatetaxatɨani,8kwie matɨa ketineutaxata, mɨkɨ pɨmatita'ɨkitɨani,ketsɨte haramaratsie memɨye'uwa wahamatɨa ketineutaxata, mɨkɨ mepɨmatsi'aye'eritɨani.9Mɨkɨ yunaitɨ mɨpaɨ mepɨtemateYawé muwarunetɨakɨ yɨtɨrɨkariyakɨ.10Teyunaitɨ temayeyuyuri mɨkɨ tɨrɨkariyayatsie tetewiyatɨ tepɨte'ane,meta teyunaime ta'iiya pɨtatsipitɨa temɨtɨrɨkawinikɨ.11Naka niuki kani'enieka 'i'inɨatatɨ kemanɨyɨneneni 'ikwai kemɨra'inɨnɨata hepaɨ.12Mɨtimaiwenikɨ mɨ'ayumieme 'ukirawetsixi wahetsie kanixuaweni,meta mɨixa wiyari 'uyeikatɨ peiti'enietɨyani.
13»Kakaɨyari hetsɨa puxuawe mɨtimaiwenikɨ mɨ'ayumieme meta tɨrɨkariya,'ɨxatsi meta meiti'enietɨyani mɨkɨ pɨtipiinieya.14Tita mɨkɨ mɨtika'una, xewitɨ pɨka'enukuketɨani,kemɨ'ane manutahɨani, xewitɨ pɨkayɨwe mɨwayexɨna.15Xɨka mɨkɨ wiyeri kaheyenɨ'ani, pɨtitiwauke,xɨka 'i'eirieni tsepa muwiye, naitɨ kwie pukayuyuipike.16Tɨrɨkariya hetsɨana kanimiemetɨni meta ke'aixɨa mɨti'aitakɨ,memukwamanarie meta memɨteyukwamana kaniwakemaka.17Teɨteri 'ɨxatsitamete puwatewiyatsitɨa mekaheukemaritɨkaime pɨwarayeitɨameta 'itsɨkate mekatemaiwaweme kaniwarayeitɨwani.18Te'aitamete wa'itsɨ pɨwakunawairiwa puwaranakaxɨrɨwa,waɨriyarika te'uximayatamete wahepaɨ me'aneneme puwarayeitɨwa hanika meheukaweratɨkaime.19Mawari wewiwamete pɨwatewiyatsitɨa meka'ukakaikame pɨwarayeitɨa,meta waɨkawa memeuka'u puwaratixɨrɨwa.20'Ɨxatsitamete watenitsie muwiere pɨyɨwemeta 'ukirawetsixi mekatemaiwaweme muwarayeitɨani.21Memeu'enieriekai 'aixɨa mekatexeiyariekame puwarayeitɨwa,meta memeuka'u titatsie memɨteyukɨtɨrɨkariya puwakunawairiwa.22Pɨtikuhekɨata tsepa yɨriya taɨta timieme,hekɨaripa pɨti'atɨwa waɨkawa yɨwipa timieme.23Nuiwarite memamariwaweme puwarayeitɨwa yatɨni puwaka'una,metehexeiyame puwarayeitɨwa yatɨni naitsarie puwataxɨrɨwa.24Kiekaritsie memanuyetei mekatemaiwaweme puwarayeitɨwa,makumawetsie hau'erietɨ meku'uwame puwarayeitɨwa.25Yɨwipa mekaniu'uwani mete'anawiwiyatɨ,meta mepɨtakeitsarietɨkɨka tarɨwekarixi wahepaɨ.
expand_more
Search