Kuwi11hch_wb2

Tsupaxi matɨari kemutayɨ

1Mɨpaɨta kaniutayɨni Tsupaxi Namati kiekame:2«¿Tekate'ita'eiya mɨkɨ niuki mɨya mɨpaɨme?¿'Ikɨ kwinie mɨtiyuniuwie kamɨtsɨ 'atsikatiyuruwame?3¿Naitɨ mɨkɨ niuki mɨya mɨpaɨme teka'utiniukame tarayeitɨani?Peti'ata'ɨreni xewitɨ tawari kamatsitatieyu.4'Ekɨ mɨpaɨ peputaine: “Ne heitseriemekɨ 'anepuyeika,Kakaɨyari hɨxie ne 'axanepɨkatiyuriwe”.5Kenetinakekeyu xɨka Kakaɨyari 'utaniunike,'ahepaɨtsita mieme tikuxatatɨ6mɨmatsitahekɨatɨanikɨ tewi kemɨkatimaiwe,mɨkɨ matsi hɨrixɨa 'ayemɨiremekɨ katinimaika.Hikɨ 'ana yapepɨretimanikeyu waɨkawa 'axapetiuyuriekutɨtɨKakaɨyari 'etsiwa xeikɨa mɨmatikwinitɨa.
7»¿Petiyɨwekuta Kakaɨyari ketɨtɨ mɨtiyuriene pemɨretimani,yatɨni Naimekɨmɨtɨrɨkaɨye heitserie kemɨrexeiya pemanuku'axe?8¿Ke petiuyuriwe?Muyuawitsie kemeutitewa matsi reuyeta kaneutitewani.Kemeukatewa mɨkite memeukaxɨriwatsie matsi reuhetɨa kaneukatewani.Hatsuaku mɨkɨ pepɨkaretimani.9Kwiepa kemakuyewa matsi reuyeta kaniyeuka,naitɨ haramara kematayewa matsi reuyeta kanatayeuka.
10»Xɨka nuame, metsi'anutahɨani,meta metsi'uta'iwawiya kepemɨtiuyurikɨ,¿kepaikɨ pɨyɨwe mita'imaiyakɨ?11Kakaɨyari pɨwamate teɨteri tewiyarika memɨkahexeiya,kepauka 'axamemɨteyurie, mɨkɨ pɨkatiwareuyehɨwirie.12Tewi mɨkayɨkɨhɨawe timaiwetɨ payanikepauka puxu yeutanakatsie tewi mayenuiwa.
13»Matsi xɨka 'a'iyari pe'iyetuirienimeta xɨka 'amamate hetsɨana peheutatsera,14xɨka ke'axapemɨtiuyurikɨ petiuhayewameta 'akie 'axamɨti'ane peka'upitɨani,15hikɨ 'ana pekayutewiyatɨ pepayaniheitseriemekɨ pe'uyeikatɨ meta pekaheumatɨ.16'Aheyemekɨ pekatinatɨmaiyamɨkɨ kepemɨtiuka'eniwa,yatɨni haa manuyetɨa hepaɨ xeikɨa pekatini'erimɨkɨ.17'Ana 'atukari waɨkawa hekɨatɨ payani keyuri tau tukamieme hepaɨ,meta yɨriya ximeri mieme hepaɨ pɨyɨni.18'Aixɨa 'iyari pepuyeikani, 'akuxi muxuawekɨ pemɨta'ikwewanikɨ,'ahetsie nunuwame 'apuweni meta pekayu'iyaritɨatɨ pepeukukutsuni.19Pepuka'uxipiweni xeime peka'ayemakatɨ,meta yumɨiretɨ mepɨ'axɨani 'ahetsɨa pemɨwaparewienikɨ.20Peru 'axamemɨte'u'iyari wahɨxite kanitɨxɨamɨkɨ,memɨyuta'una mepɨkayɨwekaxɨani.Tixaɨtɨ mepɨkatetakwewie, memɨkwini tukariyari xeikɨa mepɨtakwewie».
expand_more
Search