Kuwi10hch_wb2
1»Nepuwaɨripieri nepu'uxe ne'ayenieretɨ.'Ayumieme nepenatituaya ne'uximatɨarika,ne'iyaritsie 'axamɨti'ane ratsiwime nemɨrexeiya.2Kakaɨyari mɨpaɨ nepɨrahɨawe: nehetsie pepɨkatiuhɨpani.Tita kuta nehepaɨtsita perayexeiya yakeneutayɨki.3¿Pemɨnetsinanaimakakɨ 'aixɨa ti'anemeta 'amamakɨ pemitawewi pemɨxani'eriekamexi 'aixɨa petiwaxeiya'axamemɨte'u'iyari kememutekuxata yamemɨteyurienikɨ?4Tewi mɨmɨwe hepaɨ 'ahɨxite pɨka'anene,tewi kemɨtiniere hepaɨ 'ekɨ pepɨkatiniere.5Tatukari 'atukari hepaɨ pɨka'ane,kepemɨreuteriwe tewi mɨpaɨ pɨkatiteriwe 'a'uyeikatɨ,6pemɨtiwaunenikɨ titakɨ nehetsie mɨrahɨiwanaime nehetsiemieme peku'iwawatɨ 'axakenemɨtiuyurikɨ.7'Ekɨ pepɨtimate nehetsie pɨkarahɨiwa,'ahetsie nemuyuye'unakɨ nepɨkayɨwe.8»'Ekɨ 'amamakɨ pepɨnetsi'utawewi,'ekɨ yane'aneme pepɨnetsi'ayeitɨa.¿Hikɨta penetikumaweriyanetukariri mana pe'u'atɨanike?9Kena'eriwani 'ekɨ pepɨnetsi'utawewi, haxukɨ.¿Hikɨta tumuanari penerayeitɨani?10'Ekɨ pekatiniuyurieni retsi hepaɨ pemɨnetsiheyeuri,meta pemɨnetsi'utakerɨanariyaxɨ kexiu hepaɨ.11Wai meta nawikɨ 'ekɨ pepɨnetsi'utiketɨa,pepɨnetsi'utawipaxɨ ne'umete pepaukunaxɨa meta netatayari.12'Anaki'eriyakɨ heima pepuwewi tukari pepɨnetsi'upitɨa,penetsi'ɨwiyatɨ pepɨnetsiyetuiri ne'iiya.13»Matsi tixaɨtɨ pepɨti'awietakai,meta mɨpaɨ nepɨtimate 'ekɨ yapepɨtimaikai:14'Ekɨ pepɨnetsixeiya, xɨka 'axanetiuyurienimeta pepɨkanerauyehɨwirieni 'axakenemɨtiyurienitsie.15Xɨa'ui xɨka nehetsie rahɨiyaka,Xɨka nehetsie karahɨiyaka nemumatsi'anutaxeiya nepɨkayɨwe.Tewiyarikakɨ waɨkawa nepɨhɨne,netiku'eriwatɨ kenemɨtiuka'eniwa.16Xɨka ne'anukukeni, maye hepaɨ xeikɨa pepɨnetsitahupie'etsiwa xeikɨa xɨka ne'ukuyuani 'atɨrɨkariya nepuku'eniwa.17Nehetsiemieme pepɨwahekɨata hipame hekwamekɨ memɨtetahekɨatakɨ,nehetsiemiemeri 'ahaxɨa pepɨtimɨiriyarɨme.'Akuyaxima mepɨnetsimietɨwe yameyupapaɨmetɨ.18»¿Titari penetiupitɨa nemɨtinuiwakɨ?Nemɨniɨmɨkaitɨniri mexi xewitɨ kanetsixeiyawekai.19Matsikutari nemɨkaniuyeikanike,nemɨniukateukiekaitɨni nemutinuiwaxɨtsie.20'Imatɨrieka netukari kemɨti'inɨatsie 'ari kanaye'ani.Neyutemawietɨ 'akuxi 'etsiwa 'ena nemuyeikanikɨ kenenepitɨaka21mexixi nekaheyeiwe nemɨkahanuanitsie,kwie 'etsiwa makuhekɨatsie meta 'etɨpiwari hepaɨ mɨ'anetsie,22kwiepa waɨkawa makɨyɨwitsie,kwiepa meta 'etɨriya hepaɨ 'anu'atɨkaikaku meta muyuxamurietsie,hakewa hekɨariya yɨriya hepaɨ me'anetsie».