Keremiyaxi14hch_wb2

Kememɨte'u'iwatsi, haakaxa meta 'ixipara

1'Ikɨ Yawé niukieya kanihɨkɨtɨni Keremiyaxi hetsɨa munua, kemɨtikuwanikekai hepaɨtsita:2«Kura kaniyuhiweriekakiekariteya kanikwiximeni,hiwerika kanixuaweni mɨkɨ kwieyaritsie,meta Kerutsaremetari wa'aiwari kana'eniɨriɨkɨni.3Memɨxikutsixi yuteɨterima hanɨiyakɨ mekaniwanɨ'aka,mɨkɨ putsu matineniere mekanekɨkani,Peru haa mepɨka'ukaxexeiya.Meyutetewiyatɨ mehɨxiyatɨ,mekanakununuwani xarite 'uyewawakime me'uhapatɨmeta yumu'utsie meheutimetɨkaitɨ.4Kwiepa kaniutsinini,mɨka'ukawiwiyekɨ 'ikɨ kwieyaritsie.Mekaniyutetewiyani memuka'etsa,yumu'utsie meheutimetɨkaitɨ.5Maxatsi yeutayuniwema mepɨwaruku'e'eiriwa 'ɨxa mumawekɨ.6Puxuri yeutari hɨri mɨmetsetsie me'u'uwatɨ,meta wahɨxite tiwaxɨaximekaku,yawixi wahepaɨ mekateniu'iweni hakakɨtupiriyate mumawekɨri».
7Tsepa ke'axatemɨte'uyuri tahetsie mɨrahɨpa,peru 'ekɨ Yawé, 'aixɨa pemɨramamatiwanikɨ yaketineuyuri,waɨkawamekɨ yatepɨkatekahu,'ahepaɨtsita 'axatepɨte'uyuri.8'Ekɨ pekanihɨkɨtɨni, 'ixaheritsixi wawikweitsitɨwame meta memɨmatsitakwewie'uximatɨarika xuawekaku,¿titayari yeikame hepaɨ petiyɨane 'ikɨ kwieyaritsie,'ateewa yeikame hepaɨ yɨwikɨta xeikɨa manuhupu?9¿Titayari petihɨxiya,kuya mɨkayɨwe mɨtiyutawikweitsitɨani hepaɨ?Yawé, 'ekɨ tahamatɨa pepuyeika,kepemɨtitewa mɨpaɨ tepɨtematiwa,pepɨkatatsi'uku'e'eiriwani.10Yawé mɨpaɨ kanaineni 'ikɨ teɨteri wahepaɨtsita:«'Ikɨ teɨteri puwanake memeu'uwanikɨ,yɨ'ɨkate mepɨkamaniyatɨa.'Ayumieme ne nepɨkawanaki'erie,matsi ne nekaniwaraye'eritɨamɨkɨ ke'axamemɨte'uyurihikɨ nekatiniwakwinitɨamɨkɨ mɨkɨkɨ».11Hikɨ Yawé mɨpaɨ kanetiniutahɨawe: «Pepɨkanetsiwawirieka 'ikɨ teɨteri wahetsiemieme 'aixɨa memɨtetenikɨ.12Tsepa memuyuhakie, wahiwari nepɨka'enieni, tsepa mawari taiyariyari memɨnetsiwewirie meta hatsite mawariyari nepɨka'itanaki'erieni. Ne nepuwakwini yurikɨ, 'ixiparakɨ, haakakɨ meta kwiniyakɨ».13Peru neta mɨpaɨ nekatinitahɨawe: «Yawé nekakaɨyari. Hipatɨ 'aniukamete mɨpaɨ mepɨtewakɨhɨawe kename 'ixiparakɨ mekatakwi'iwa meta kename mekahaakakwini, matsi kename 'ekɨ kayuwatɨ pewapitɨani mɨixa 'ikɨ kwieyaritsie».14Yawé mɨpaɨ kanetiniuta'eiya: «Kaniyakɨtɨni kememɨtekuxata mɨkɨ Kakaɨyari niukametemama kename nehetsiemieme meyɨa metekuxatatɨ. Ne nepɨkawarutanɨ'a, ne nepɨkatiwata'aitɨawe, meta nepɨkawatahɨawiwe. Tita memɨtexehekɨatɨa kememɨtenieritɨarie 'irɨmari kanihɨkɨtɨni, yakɨ temaiwawemete mepɨhɨkɨ, yakɨ xeikɨa yuhetsiemieme mepɨteku'eriwa.15'Ayumieme Yawé mɨpaɨ kanaineni: “Yakɨ Kakaɨyari niukametemama nehetsiemieme memɨtekuxata ne nekawanɨ'akaku, meta mɨpaɨ memutiyuane kename katiyutakwini, haakaxa kahayani 'ikɨ kwieyaritsie, mɨkɨ haakakɨ mekanikwikuni meta 'ixiparakɨ.16Meta teɨteri memɨte'utaxatɨarie Kerutsareme kayeyari 'utɨma menixɨrietɨkɨnikuni haakakɨ meta 'ixiparakɨ, pumaweni kemɨ'ane mɨkɨ mɨwakateuku, wa'ɨitama, waniwema 'ukitsi, meta waniwema 'ukari, mɨpaɨ nepɨtiwarakapitɨani ke'axamemɨte'uyurikɨ”.
17»'Ekɨ mɨpaɨ pekatiniwaretahɨawimɨkɨ:»“Ne 'ukai ke'uhapanenitukarikɨ meta tɨkarikɨ, nekatihayewatɨ,neteɨterima waniwe 'uka 'ɨimaripɨtiuka'eniwa waɨkawa,tɨrɨkaɨyemekɨ kaniuweiyani.18Xɨka 'ɨtsita neheyani, teɨteri mekwikwi'imenepɨwaxeiya 'ixiparakɨ memukwi'iwaxɨ,xɨka kiekaritsie neheutahani, haakakɨmemɨtekukuye nepɨwaxeiya.Kakaɨyari niukameya meta mawari wewiwame,'ikɨ kwieyaritsie ku'uwamete mekanihɨkɨtɨni 'atsimekatemaitɨ kememɨteyurie”».
19¿Kamɨtsɨ yemekɨ Kura perehɨari?¿Tsiyuni petixani'erie?¿Titayari mɨya petatikwinitɨamatsi temɨta'uayemaniri tepɨkayɨwawe?Tukari kayuwatɨ muma tepɨtakwewiekai,peru tixaɨtɨ 'aixɨa mɨti'ane tepɨkate'ukaxei.Tukari tepɨtakwewiekai 'aixɨa teteheu'erietɨ temakɨnekɨ,peru tahetsie marika xeikɨa kaninuani.20Yawé, tame ke'axatemɨte'uyurikɨ tepayukumate,meta tapaapama ke'axamemɨte'uyuri,tame 'axatepɨte'uyuri 'ahepaɨtsita.21'Aixɨa pemɨrahɨawarɨwanikɨ pepɨkatatsihexɨrɨwani,'a'uweni mɨmariwe pepɨkananaimaka.Kenaye'eri tɨratu kepemɨtiuwewi tahamatɨa.Pepɨkaheihɨpani.22¿Kamɨtsɨ tiyɨwe xewitɨ kakaɨyari wewiyakametɨtɨwiyeri manayenɨ'ani?Yawé meta pemɨtakakaɨyari,¿tamɨ 'ekɨ pekatihɨkɨ wiyeri pemeyenɨ'awa,muyuawi yuxaɨta pɨkayɨwe?Naime 'ekɨ 'ikɨ pepɨtiutawewi,'ayumieme tepɨta'ikwewa 'ahetsie.
expand_more
Search