Kitsariyaxi
56
/
hch_wb2
Wikweitsitɨarika hipame wahetsiemieme
1
Yawé mɨpaɨ kanaineni:
«Tita mɨtiheitserie xeketenexeiyani,
heitseriemekɨ yaxeketeneu'uwaniri,
newikweitsitɨarika 'ari kaninuaximeni,
mɨtiheitserie nehetsɨa mieme matsiɨkɨtɨ kanayeimɨkɨ.
2
'Aixɨa ke'itɨarieka kemɨ'ane mɨpaɨ mɨtiuyeika,
kemɨ'ane yu'iyarikɨ meye'atɨa,
kemɨ'ane 'uxipiya tukari ma'eriwa kapatsiekame ka'ayeitɨatɨ,
kemɨ'ane mɨyɨ'ɨwiya 'axamɨkatiyurienenikɨ».
3
'Ateewa kiekame yɨkɨmana
Yawé hetsie mɨtiwiyanikɨ muyuyetua mɨpaɨ pɨka'utaineni:
«Yawé yuteɨterima watsata pɨnetsi'anuyeweiya».
Meta ti'aitame ti'uximayatsiriwame mɨkaneɨke mɨpaɨ pɨka'utaineni:
«Kɨye muwaki xeikɨa nepɨhɨkɨ».
4
Karikɨ Yawé mɨpaɨ kanaineni:
«Teɨteri te'aitame te'uximayatsiriwamete memɨkaneneɨke
xawati 'uxipiya tukariyari mema'eriwa,
yameketeyurieka kemɨnetinake,
netɨratutsie meketewiyani,
5
ne yanepɨtiyurieni kememɨtetetewa mema'utsienikɨ
netukita meta nekiekaritsie,
mɨpaɨ matsi 'aixɨa pɨ'ane tɨɨri 'ukitsi 'ukari keyuri mewarexeiyatɨ.
Meta nepɨwatiterɨwa yuheyemekɨ miemekɨ
mɨkɨ hatsuaku pɨkahakayeitɨarieni.
6
'Ateewa kiekatari Yawé hetsɨa memu'axɨa
memɨte'i'uximayatsiriekakɨ,
Yawé memɨnaki'eriekakɨ,
meta memeyexeiyanikɨ,
yunaitɨ mɨkɨ 'uxipiya tukari mema'eriwa kapatsiekame meka'ayeitɨatɨ,
meta netɨratutsie yamemɨtekahu,
7
nehɨri mɨpatsietsie nekaniwaranutiwitɨmɨkɨ,
nenenewieri kiiyarita temawierika waɨkawa nepɨwapitɨani.
Nepitanaki'erieni mawari taiyariyari meta hipame mawarite
memitimawani nemawari taiyametsie,
nekiitsɨ mɨpaɨ katinitewakamɨkɨ
nenewieri kiyari yunaitɨ teɨteri wahetsiemieme».
8
Yawé mɨpaɨ kanaineni naimekɨmɨyɨwe,
kemɨ'ane muwakuxexeɨriwa 'ixaheritsixi memeutaweiyariexɨa:
«Neteɨterima nepɨwakuxeɨrieni hipame teɨteri meyunɨkame,
meta 'akuxi hipame nemuwarukuxeɨri».
Kakaɨyari kemɨtiwaxaneta 'axateyuruwamete
9
Yeutari meta teyukwa'amete 'ɨtsita miemete,
xeyunaitɨ xekenakɨni xeketeniwarutikwa'i.
10
Yunaitɨ 'ixaheritsie memɨtetahɨ mepɨkaheuneniere,
nixewitɨ mɨkɨ pɨkatimate.
Yunaitɨ mɨkɨ tsɨikɨri memɨkaniuwawe mepɨhɨkɨ,
memɨka'utihe'ewa.
Mepuhe xeikɨa meteheinɨtɨ,
mukutsuni puwanake.
11
Tsɨikɨri kwinie memɨteyukwaiwawie mepɨhɨkɨ,
hatsuaku mepɨkahuxaiwawe.
Muxatsi wahɨwemete mekanihɨkɨtɨni 'atsimekateheitimaitɨkɨkatɨ,
yuxexuitɨ kemɨtiwanake xeikɨa mekaniu'uwani.
Nitixaɨtɨ mekateha'eriwatɨ,
yu'iwarikakɨ xeikɨa mepuyumexɨitɨa.
12
«Xekenakɨni, winu tepanukuwauni,
winukɨ tepɨtitarɨweni
—yunaitɨ mɨpaɨ mepɨte'uhiwa—.
'Uxa'ata yaxeikɨa hikɨ hepaɨ tepɨtiyɨni,
peru matsi waɨkawa».
Powered by Seed Bible API
expand_more
Search
All books
Old Testament
New Testament
chevron_left
Previous Chapter
Books
search
Search
explore
Discover
share
Share
chevron_right
Next Chapter