Kitsariyaxi41hch_wb2

'Ixaheri kemɨtiuparewiya

1«'Ateewa haramara tetsita xemɨtitei, nehɨxie kayuwatɨ xekeneumaka.Nuiwarite, yutɨrɨkariya xekenehekwariyani.'Ahurawa xekenakɨneka xeketenekuxatani,tepɨtaxeɨrieka nemɨxetaxanetakɨ.
2»¿Kemɨ'ane pita'ini 'iya yuheyemekɨ yamɨrayu'iwatau manatineika kiekame?Mɨkɨ yumamatsie nuiwarite kaniwakuhɨweni,mɨkɨ hɨxie te'aitamete mekaniyuyetuayani.Yu'ixiparakɨ tumuanari kaniwarayeitɨwani,yutupikɨ kaniwata'enitsitɨwani xatsi memɨhɨkɨtɨni hepaɨ.3Hikɨ 'aixɨa 'iyari kaniwaranukuweweiyanimɨkɨ huye 'utɨa hatsuaku mɨka'uyetɨatsie.4¿Kemɨ'ane 'ikɨ pɨtiuyuri? ¿Kemɨ'ane yamɨtiyɨnikɨ yapainekai?¿Kemɨ'ane nuiwarite puwarutahɨawixɨ tsutɨa paitɨ?Ne, Yawé, mexɨakame nekanihɨkɨtɨni,meta mɨkɨtsiere nekanihɨkɨtɨkamɨkɨ 'imatɨrieka tukaritsie».
5Haramara tetsita kiekatari mekanixeiya, mekanimamaka metakwie manuye'atɨkatsie kaniwatayuaneni.'Ari 'ahurawa mekanahuni, 'umekanahuniri.6'Iwamarixi yunaitɨ mekaniyuparewieka,yu'iwamatɨ mɨpaɨ mekateniyutahɨaweni: «Kenetɨrɨkaɨyeni».7Mɨreutawewiwe yuwaɨriyame kanayeitɨaka hurukɨ tiwewiwame,meta titsunamekɨ mɨtitiweriritamɨpaɨ tepɨa hetsie tiwerime mɨrayeitɨwa pɨrahɨawe:«'Aixɨa pɨ'ane tepɨa mɨtiwiyatsitɨwani»,hikɨ kakaɨyari wewiyakame pukɨrapuximamɨkawatayuanenikɨ.
8«Peru 'ekɨ, 'Ixaheri, neti'uximayatsiriwame,'ekɨ Kakuwu, nemɨmatsi'anayexei,'Apɨrahami nehamiku nuiwarieya.9Kwie manu'axetsie paitɨ nepɨmatsiyewitɨ,kwie manuye'atɨkatsie paitɨ nepɨmatsi'utahɨawixɨ,mɨpaɨ nekametiniutahɨawe: “'Ekɨ neti'uximayatsiriwame pekanihɨkɨtɨni”.Ne nepɨmatsi'anayexei, nepɨkamatsi'utixani'eri.10'Ayumieme pepɨkamaka, netsɨ 'ahamatɨa nekaniuyeikani,pepɨka'a'uximatɨaka, ne nepɨ'akakaɨyari.Nepɨmatsitɨrɨkariyani meta nepɨmatsiparewieka,ne nepɨmatsituikani nemamakɨ 'aixɨa mɨtiyuriekɨ.
11»Yunaitɨ kemɨ'ane memuyeha'awe 'ahepaɨtsitayurikɨ mekanitewiyatsitɨariekuni nitixaɨtɨ mepɨkate'akɨne,kemɨ'ane memɨmetsi'aye'unie mepukumawere,wa'atɨtɨ mepɨkate'u'uwakai.12Tsepa pemɨwarutiwau memɨmetsi'aye'unie,pepɨkawataxeiya.Kemɨ'ane memɨmatsimietɨwe nitixaɨtɨ mepɨkatehakɨne,wa'atɨtɨ mepɨkate'u'uwakai.13Netsɨ Yawé nekanihɨkɨtɨni, 'Akakaɨyari,'amamá 'atserie mieme mutuika,Ne nekanihɨkɨtɨni mɨpaɨ nemɨmerahɨawe:“Pepɨkamaka, ne nepɨmatsiparewieni”.14Kakuwu kwitsi, pepɨkamaka, 'Ixaheri 'etsipemɨpe―Yawé mɨpaɨ kanaineni―,yaxeikɨa netsiere nekamaniparewimɨkɨ,Mɨpatsie 'Ixaheri hetsiemieme matsiwikwetsitɨwame kanihɨkɨtɨni.
15»'Ekɨ tipɨname nekamanayeitɨamɨkɨpehekwame meta pe'atamɨariekame, hutakɨa peheutixikakaunime.Hɨri pepɨtipɨna, tumuanari pekaneyeitɨamɨkɨ,hɨri 'amanutitɨtɨ mɨaxa pepayeitɨani.16Pekaniwarexɨrimɨkɨ, meta 'eka kanenu'enitsitɨamɨkɨ,'eka mɨtɨrɨkaɨye kaniwataxɨriexɨamɨkɨ.Peru 'ekɨ Yawé hetsie petiwiyatɨ pekaniyutemawiekamɨkɨ,'Ixaheri hetsie Mɨpatsie kɨmana pekani'ata'ɨrimɨkɨ.
17»Tixaɨtɨ memɨkatehexeiya meta memɨteheuyehɨwa haa mekanikuwautɨweni,matsi mepɨka'itaxeiyawawe,harimɨyakɨ waneni pɨwawaki.Peru ne, Yawé, nepɨwata'eiya,ne, 'Ixaheri Kakaɨyarieya, nepɨkawaku'eirieni.18Haa nepanetɨaxɨani hɨrite muwawakitsie,meta mayeweweritsie haixa nepetinetɨaxɨani.Makumawetsie haa xuaweme nepayeitɨani,meta makuwakitsie haixa xuaweme nepayeitɨani.19Makumawetsie nekatinikayatsamɨkɨ,kariuxa, meki, tsikwai kɨyeyari meta huriwu.Kwie muwakitsie huku mɨxexeurawi nekanikayatsamɨkɨ,huku yunɨkame metatsiere kwetsi kɨyeyari,20teɨteri memɨnenierekɨ meta mɨpaɨ memɨtemaikakɨ,meta kwi memɨyɨ'ɨwiyakɨ meta mɨpaɨ memɨtehetimamatenikɨ,Yawé tɨrɨkariyaya mɨyamɨtiuyurikɨ,'Ixaheri Kakaɨyarieya mɨpatsie mɨtiutawewikɨ.»
21Yawé mɨpaɨ kanaineni:«Yuhetsie xekeneutanua,xeketeneuhekɨata naime kexemɨteheima —Kakuwu ti'aitɨwameya mɨpaɨ kanaineni—.22Hurawa xekenakɨni meta xeketenekuxatanikemɨtiyɨni,meta kemɨtiɨyɨ meripaitɨ,mɨpaɨ temɨtemaikakɨkehepaɨ mɨtiyeyɨximekai.Xeketateneutaxatɨa kemɨtiyɨni 'uxa'awarie.23Yaxekeneutiyua 'uxawarietɨni kemɨtiyɨni,'ana mɨpaɨ tepɨtehetimani kename xeme xekakaɨyarixi.Yɨkɨ xeketeneuyuri, 'aixɨa ti'aneme yatɨni 'axati'aneme,temɨnenierekɨ meta temɨtimamanikɨ.24Yurikɨ xeme nitixaɨtɨ xepɨkatehɨkɨ,metatsiere tixaɨtɨ yɨkɨ xemɨte'uyurieni xepɨkayɨwawe.Kanixani'eriwani xeikɨa kemɨ'ane mɨxe'anayexei.
25»Tayeta xeime nekaniuta'inieni,hikɨ kaninuani ne'itahɨaweku,tau manatineikatsie kanenahɨaweni.'Iwewame hepaɨ yɨ'ɨkakɨ haxu katiniɨpɨnani,te'aitamete haxu hepaɨ katiniwarupɨnani.26¿Kemɨ'ane yaputayɨ meripaitɨ,yatemɨtemaikakɨ?¿Kemɨ'ane meri yaputayɨ,mɨpaɨ temɨtiyuanikɨ: “Yurikɨ painekai”?Nixewitɨ yapɨka'utayɨ,nixewitɨ pɨka'u'enierie niuki kuxatatɨ.27Ne mexɨakame nekanayani Tsiyuni mɨpaɨ nemɨtiutahɨawixɨ:“Neuxei, mekaniu'axɨaniri”.Ne Kerutsaremetsie nemeiyenɨ'a nekanihɨkɨtɨnitupiri niuki 'aixɨa 'anuyɨneme mukuxata.28Nekananuyeneniereni watsata, nixewitɨtɨma pumawe,mana watsata 'ɨxatsitawetɨ,nixewitɨ pɨkanetsiku'eiya nemɨwaku'iwawiyatsie.29Mɨkɨ yunaitɨ te'itawamete mepɨhɨkɨ.Kememɨteyurie tixaɨtɨ pɨkatihɨkɨ,wakakaɨyarixi 'eka xeikɨa mepɨhɨkɨ, teyu'uximatɨwamete.
expand_more
Search