Kitsariyaxi40hch_wb2

Nɨtɨarika Kakaɨyari teɨterimama wahetsiemieme

1Xekenewanɨtɨaka, neteɨterima xekenewanɨtɨaka—wakakaɨyari mɨpaɨ kanaineni—.2Kerutsareme witsixeketenekɨhɨaweni,mɨpaɨ xeketeneutahɨawi'ari mekatenaye'atɨani mete'uximayatɨ,'axamɨtiuyurikɨ 'ari katiniuyutuani,'ari Yawé kaniwaru'uximatɨani'axakememɨte'uyurikɨ matsi waɨkawa hepaɨna paɨmemekɨ.
3Xewitɨ kanahiwani:«Makumawetsie huye xekeneukuha'aritɨaYawé hetsiemieme,mu'ayepariyatsie kwie xekeneutihɨniyahuye 'aixɨa xekeneuyuri takakaɨyari hetsiemieme.4Mayeweweritsie kwie ke'utihɨne,meta hɨri matitei 'akuweritɨ pɨta kehayani,'aki manuyeheitɨkatsie ke'akuparekuremeta 'aki 'amɨpapa manuyeheitɨkatsie.5Hikɨ Yawé yuxawatɨriya kanihekɨatamɨkɨ,yunaitɨ kwiepa memɨtama mekanixeiyakuni.Yawé yɨkɨmana mɨpaɨ kaniutayɨni».
6Niuki mɨpaɨ kanaineni: «Keneutahiwani».Neta mɨpaɨ neraine: «Kehepaɨ netiuhiwani kuta».«Yunaitɨ teɨteri tupiriya hepaɨ mepɨ'anene,meta witsikememɨ'anene tuturi yeuta mieme hepaɨ kani'aneni.7Tupiriya kaniutawaukeni, tuturi kaniutayɨnareni,Yawé 'iiyaya wahetsie mɨye'axekɨ.Yurikɨ, teɨteri tupiriya mekanihɨkɨtɨni.8Tupiriya kanitiwaukeni meta tuturi kanitiyɨnareni,matsi takakaɨyari niukieyayuheyemekɨ kanayeniereni».
9Tsiyuni, niuki 'aixɨa manɨyɨne xaxatame,hɨri 'a'utewime hetsie keneutiye'a.Kerutsareme, niuki 'aixɨa manɨyɨne tuayame,karima keneutahiwa.Keneutahiwa, pepɨkamaka,kiekarite Kura kwieyaritsie mukumane mɨpaɨ ketiniwarutahɨawi:«'Ena puyeika xekakaɨyari».
10Neuxei, Yawé naimekɨmɨyɨwe kaniye'aka waɨkawa tɨrɨkaɨyetɨ,yutɨrɨkariyakɨ katini'aitani.Teɨterimama mekaniweiyani,tita mɨra'iwaxɨ hamatɨana kaniumieni.11Muxatsi wahɨweme yumuxatsima kemɨtiwa'ɨwiya hepaɨ,muxatsi tɨɨrixi kaniwaratɨkɨni,yutawie kaniwarutiyatsani,meta memɨhehekwa niwetɨka wakweriwayurietɨ kaniwaruwitɨximeni.
12¿Kemɨ'ane haramara pu'inɨatawe yumama meuwewerikɨ,meta kemɨ'ane yu'itɨwametekɨ muyuawi naime pu'inɨatawe?¿Kemɨ'ane kwie tumuanariyari kiriwata pu'inɨataxɨ?¿Kemɨ'ane hɨri panuyewi ti'inɨnɨatametsie?13¿Kemɨ'ane Yawé 'iyarieya ketewamɨ'axe pi'inɨataxɨ,yatɨni kemɨ'ane 'i'ɨxatsitɨwameya payeiwe?14¿Yawé kemɨ'ane hetsɨa pɨye'a ta'iwaunike yamɨtiyurienikɨ,kemɨ'ane huye mɨheitserie pixeitsitɨa?¿Kemɨ'ane mɨtimaiwenikɨ pipitɨayatɨni kemɨ'ane mɨtimaiwenikɨ huyeyari pixeitsitɨa?
15Kakaɨyari hɨxie,haa tsuniyari wariteta meukatsuke hepaɨ nuiwarite mepɨ'anene,ti'inɨnɨatame mɨranuyewɨwɨtɨwatsie tumuanari 'etsipetɨ matikani hepaɨ.Yawé kwie haa hixɨapa mɨyetei ti'inɨnɨatemetsie kananuyewɨwɨtɨwanikwie kwi mɨmiyuanini mɨhɨkɨtɨni hepaɨ.16Riwanu kɨyexiyarikɨ xɨka hatinaini mawari taiyame heuyewetɨ 'akuxi payani,meta tewamamakɨ mawari taiyariyari xɨka 'uwewieni mepeuyeweka 'akuxi.17Yunaitɨ nuiwarite hɨxiena tixaɨtɨ mepɨkatehɨkɨ,mepɨkate'aye'atɨka hetsiena mieme.
18¿Kemɨ'ane Kakaɨyari hepaɨ 'aneme mepayeitɨani?¿Kehepaɨ mete'iwewieni?19Tiwewiwame kakaɨyaritɨme kanitawewimɨkɨ,hurukɨ tiwewiwame huru pikawiriwameta pɨrata kukayari pitiwewiriwa.20Kemɨ'ane tixɨatɨ mɨkarexeiya mawari mɨyetuanikɨkɨye kaniutiwawani mɨkapɨniwe,meta kwinimieme mɨreutawewiwe kaniutiwawanikɨye kakaɨyariyari mɨtawewienikɨ ka'atiwautseme.
21¿Kamɨtsɨ xeme mɨpaɨ xekatemaikai?¿Mɨpaɨ xekatehetimaiwawekai?¿Mɨpaɨ xakate'utahɨawarie matɨari paitɨ?¿Mɨpaɨ xekatehetima kwie muyukamatsie paitɨ?22Mɨkɨ katini'aitani muyuawi taheima muyema hetsie,mana teɨteri memu'uwa 'utsikari wahepaɨ mekateniyuxexeiyani.Mɨkɨ muyuawi kaniutawerani 'ixuriki xamaruyari hepaɨ,meta 'aixɨa katinikuwerani muwa mayekanikɨ.23Mɨkɨ memɨtɨrɨkawi kaniwarexɨrɨwani,meta 'ena kwiepa memɨte'aita tixaɨtɨ pɨkatiwarayeitɨwa.24Yu'aweri 'iteɨriyarikɨ mekaniukayatsarieni,hikɨke mekaniuka'etsieni,kwiepa wananayari katiniwiyaxɨaximenike,kepauka wahepa mɨreutahɨtsiwatsie mɨkɨ mekanitiwaukeni,hikɨ 'eka mɨtɨrɨkaɨye xatsi hepaɨ kaniware'enitsitɨwani.
25«¿Kamɨtsɨ kemɨ'ane hepaɨ kename ne'ane xepɨtiyuani?¿Kemɨ'ane nehepaɨ pɨ'ane?», mɨpaɨ kanaineni Mɨpatsie.26Teikɨ xekenenenieri, muyuawi xekeneutixeiya:¿Kemɨ'ane mɨkɨ naime pɨtiutawewi?Kemɨ'ane xurawetsixi memuyumɨire 'aixɨa mɨtiwakuyayatsa yuxexeime,meta mɨwakɨhɨawe waterɨwatɨ yuxexuime.Kanimariweni tɨrɨkariyaya, kanitɨrɨkaɨyeni tɨrɨkariyaya,tixaɨtɨ wapaitɨ pɨkareuyewetse.
27¿Titayari Kakuwu petiniukixie?¿Titayari 'Ixaheri peha'atɨ mɨyapetiutaine:«Yawé nehuye pɨkaxeiya,nekakaɨyari heitserie kenemɨrexeiya pɨka'imate»?28¿Kamɨtsɨ pekatimate?¿Kamɨtsɨ mɨpaɨ pekaretimaiwe?Yawé yuheyeme Kakaɨyari kanihɨkɨtɨni,naime kwie manu'atɨka mutawewi.Mɨkɨ pɨka'uxiwe meta pɨkawaɨripiwe,meta kemɨtiuyemate yemekɨ pɨkayumainɨa.29Mɨkɨ kemɨ'ane mu'uxe tɨrɨkaɨyeme payeitɨwa,meta kemɨ'ane memɨwerarani puwatɨrɨkariyatɨa.30Temari 'akuxi meputi'uxike, meputiwaɨripiwe,tɨɨri mehetixɨtemɨriketɨ mepekaxɨrɨwe,31peru Yawé hetsie kemɨ'ane memɨtewiyatɨrɨkariya hekwamekɨ mepukaxexeiya,kwixɨri wahepaɨ mepɨtiwɨxɨani:mepɨtinautsa mepɨkatiwaɨripieni,mepuhuni mepɨkati'uxe.
expand_more
Search