Kitsariyaxi37hch_wb2

Yawé Kerutsareme hetsie kemɨtiutanua

1Kepauka ti'aitame 'Etsekiyaxi mɨpaɨ mɨtiu'enaxɨ, yukamixa kaneukatsana, hiwerika kamixayari 'anakatɨka Yawé tukita kaneyani.2Metatsiere 'Eriyakini paratsiyuta mɨti'aitametɨkai, meta kemɨtiuyɨ ti'utɨwame Tsewina metatasiere 'ukirawetsixi mawari wewiwamete kaniwarenɨ'ani, yunaitɨ mɨkɨ hiwerika kamixayari me'anakatɨtɨkaime, Kakaɨyari niukameya Kitsariyaxi 'Amuxi nu'aya hamatɨa memɨtehetixatakɨ.3Mɨpaɨ mekatenitahɨawe: «'Etsekiyaxi mɨpaɨ kanaineni: “Hikɨ 'ikɨ tukaritsie nutuixiya tukariyari kanihɨkɨtɨni meta kukuiniya metatsiere 'axatekaniu'itɨarieni, kepauka nunutsi yumaamatsie mɨka'anuyeyeiwe tinuiwake hepaɨ, matsi maamaya mɨkaheutɨrɨkaɨye mitinuiwitɨanikɨ.4Heiwatɨ Yawé 'Akakaɨyari kuyaxi tiwa'aitɨwame niukieya 'u'enieni, ti'aitɨwameya 'Atsiriyatsie ti'aitame meinɨ'a, Kakaɨyari mayeniere 'axamɨretahɨawekɨ. Yawé 'Akakaɨyari ketiwarukwinitɨani niuki mɨya'aneme mɨwaru'enirikɨ. Hikɨ keneyutanenewi, teɨterimama memuyuhayewatɨwe wahetsiemieme, 'akuxi 'amemu'uwa”».5Kepauka ti'aitame 'Etsekiyaxi te'uximayatsiriwamete Kitsariyaxi memɨtehekuxatɨa,6mɨkɨ mɨpaɨ katiniwarutahɨawe: «Tixe'aitɨwame mɨpaɨ xeketenetahɨawi Yawé mɨpaɨ kanaineni: “Pepɨkamaka mɨkɨ niuki 'axamanɨyɨne pemu'enikɨ, meta kemutayɨ nehetsiemieme ti'aitame 'Atsiriya kiekame nɨ'arieya.7Neuxei, ne xeime 'iyari hetsiena nekanikayemɨkɨ, kepauka mɨ'ena kename kereyɨ kaniyemieni yukwieyaritsie. Muwapaitɨ yanekatiniyurimɨkɨ 'ixiparakɨ memierienikɨ”».8Kepauka kuyaxi tiwa'aitɨwawe mɨretima kename 'Atsiriya kwieyaritsie ti'aitame kiekari Rakixi mɨrakutewatsie 'ayeyakai, 'ayumieme kaneyani, hikɨ ti'aitame kanetaxeiya yumieneme Riwina hamatɨa.9Metatsiere Tsenakeheri katiniutaxatɨarieni kename Tiraka, ti'aitame Kutsi kiekame, hayeyakai 'itamienike. Hikɨ mɨpaɨ retimaka niuki tuayamete 'Etsekiyaxi hetsɨa kaniwarenɨ'ani10mɨpaɨ memɨteheitahɨawekɨ: «'Ekɨ 'Etsekiyaxi, ti'aitame Kura kwieyaritsie: 'Akakaɨyari hetsiena yuri pemɨti'erie nɨkatɨ metiu'itaiya, mɨpaɨ matikɨhɨawetɨ: “Ti'aitame 'Atsiriya kiekame Kerutsareme pɨkaka'una”.11Pekatinimaikari kememɨte'uyuri te'aitamete 'Atsiriyatsie miemete hipame kwieyaritsie, yunaime mepɨwarakumaweriyaxɨ. ¿Kamɨtsɨ 'ekɨ petitawikweiya?12¿Kamɨtsɨ netutsima memɨwaruka'unaxɨ: Kutsani, Karani, Xetsepi meta Hereni kiekatari Teratsaxi memɨtamakai, wakakaɨyarima wahetsie mete'utanua?13¿Kamɨtsɨ hakewa mepe'uwa te'aitamete, Kamati kiekame, 'Axipari kiekame, meta Tsepariwahini kiekariyaritsie kiekame, yatɨni Hena kiekame meta Hiwa kiekame?»

'Etsekiyaxi nenewierieya

14'Etsekiyaxi yutupiritsixi waxapa 'anuhurieka, mɨkɨ kanekaterɨwa. Hikɨta Yawé tukita kaneyani, Yawé hɨxie 'itawenaka,15mɨpaɨ katiniyunenewieni Yawé hɨxie:16«Yawé Naimekɨpemɨtɨrɨkaɨye, 'Ixaheri Kakaɨyarieya, 'ekɨ 'uweni pemexeiya 'ateɨtamete wahetsie: 'ekɨ xeikɨa te'aitamete kwiepa memɨtama pepɨwakakaɨyari. 'Ekɨ muyuawi peputawewi meta kwie.17Keneta'enani, Yawé, keneu'ena, kenanutanieri, Yawé meta keneniereni, naime niuki keneu'eni Tsenakeriwi kemɨtiunɨ'a Kakaɨyari pemayeniere 'axapemɨtitahɨawarienikɨ.18»Yawé, kaniyuritɨni te'aitamete 'atsiriyutsixi yunaime 'ikɨ nuiwarite mekaniwarakumaweriya meta wakwie.19Wakakaɨyarixima taipa mekaniwareuxɨrieni meta mekaniwaruti'una, mɨkɨ memɨkakakaɨyarixitɨkaikɨ matsi xeikɨa kɨyexi meta tetexi memɨhɨkɨtɨkaikɨ, teɨteri wawewiya.20Merikɨte hikɨ, Yawé, takakaɨyari, ketaneutawikweitsitɨa mɨkɨ memɨtatsi'uniekɨ, yunaitɨ nuiwarite kwiepa memɨtama mɨpaɨ memɨtehetimanikɨ kename 'ekɨ xeikɨa Yawé, Kakaɨyari pehɨkɨ».

Tsenakeriwi kemɨtiɨmɨ

21Hikɨ Kitsariyaxi 'Amuxi nu'aya 'ikɨ niuki 'Etsekiyaxi kanenɨ'airieni: «Yawé mɨpaɨ kanaineni, 'Ixaheri Kakaɨyarieya: “Kepemɨnerawawiriwa Tsenakeriwi hepaɨtsita, 'Atsiriyatsie ti'aitame,22'ikɨ niuki kanihɨkɨtɨni ne Yawé kenemutayɨ hetsiena mieme:»”Tsiyuni niweya 'ɨimarikamenixani'erieka meta kaniutanaweni 'ahetsiemieme.Kerutsareme niweya 'uka matsixeiyatɨyumu'u kaniuyuitɨwani pemɨ'ata'unaxɨkɨ.23¿Kemɨ'ane 'axapepɨranutahɨawixɨa?¿Kemɨ'ane hetsiemieme 'axapeputayɨ?¿Kemɨ'ane pepanutahiwiexɨameta kemɨ'ane hɨxie pepuyuta'ɨrixɨ?Mɨpatsie 'Ixaheri hetsiemieme hepaɨtsita.24Te'a'uximayatsiriwamete pepɨwarenɨ'aYawé 'axamemɨtehetahɨawekɨ, mɨpaɨ pe'utaitɨ:‘Nekaxetate yukukuyamete memɨyɨmɨirekɨhɨri 'amɨtɨtɨtsie nepanutitɨa,Riwanu mukɨatsie.'Iteɨrieya kariuxa 'amutɨtɨ nepawitexɨa,hukuya mɨxexeurawi 'aixɨa mɨ'anene.Hɨriteya 'amanutitɨtɨ nepanuku'axixɨa,muhukuyatɨka witsimɨtiu'anene.25Haputsu neputiwewi 'ateewa kwie mukumanetsie,haa mana mieme nepanuhari.Neketatekɨ'Ekipitu hatɨayarite nepayewatsiɨxaxɨa’.
26»”¿Mɨpaɨ pekaretimaiwe?Mɨixa wiyari panuyemieri ne nemɨtiukuha'aritaxɨ.Ne meripaitɨ yaneputayɨ,hikɨta nepeye'atɨa,'Ayumieme 'ekɨ pepɨwaruka'unaxɨkiekarite mɨtɨrɨkawi.27Mana kiekatari, mepɨkatɨrɨkawi,meputimama meta mepuyutetewiya.Kɨyexi 'ɨtsita mieme hepaɨ mepɨ'ane,'ɨxa mɨyɨra hepaɨ,Kii heima tupiriya mɨnewe hepaɨkataweriwetɨ mutawauke.
28»”Ne nepɨtimate kepauka pemanukayeixa,kepauka pemeutahake, kepauka pemɨwayeyeika,meta kepauka nehepaɨtsita pemuyeha'arɨwe.29Nehepaɨtsita pemuyutahaxɨatɨakɨhau'erietɨ pe'utaniuku 'aniuki nemu'enikɨ,'atsuritsie tixikɨraɨyeme nepɨtiuyewieni'ateta nepɨmatsi'utapirenutɨani,kemɨ'ane huye 'utɨa pemunuamɨkɨ 'utɨa nepɨmatsi'anunɨ'ani.30»”'Etsekiyaxi 'ikɨ pɨ'inɨaritɨni 'ahetsiemieme:»”'Ikɨ wiyaritsie xepɨtetikwani tita mɨtitineni yuxaɨta,hutarieka wiyaritsie manatsiere mɨtitinexɨani.Peru hairieka wiyaritsie xepɨka'eni meta xepɨka'itsana,kaxie haraweri xepɨka'eni meta 'ikwaxiyari xepɨtikwani.31Tawarita Kura xiɨyarimama 'amemu'uwamepananayataxɨani, meta mepɨkaxuawere.32Kerutsaremetsie hipatɨ memuyuhayewaxɨ,Tsiyuni hɨriyaritsie hipatɨ mepukuwikweni.'Ikɨ ne'ɨtetsari mɨyapɨtiyurieni,Yawé Naimekɨmɨtɨrɨkaɨye 'ɨtetsarikaya.33»”Ne, Yawé, mɨpaɨ nekanaineni ti'aitame 'Atsiriya kiekame hetsiemieme:»”'Ikɨ kiekaritsie pɨkaheutahani,meta 'ɨrɨ hetsɨana tɨma pɨkaheutahɨani.Kuya muyukunarɨma 'a'ɨtɨ hetsɨana pɨkaye'ani,meta kurarutana meukatsunakɨ pɨkatiwewieni.34Ke'aneme huye 'utɨa munua mɨkɨ 'utɨa kaniyemieni,'ikɨ kiekaritsie pɨkaye'ani.Ne, Yawé, mɨpaɨ nekanaineni.35Nekɨmana neminaki'eriekɨ, meta Rawiri neti'uximayatsiriwame nemɨnaki'eriekɨ,'ikɨ kiekari hetsie nepɨtanuani meta nepitawikweitsitɨani”».36Hikɨ Yawé niuki tuayameya muyuawitsie mieme kanayeyani xeitsienituyari heimana nauka tewiyari heimana 'auxɨwi miriyari (185.000) kuyaxi 'atsiriyutsixi memakutekatsie kaniwarukwini. 'Uxa'arieka ximeri memanuku'ui hipatɨ wa'iwama, mana yunatɨ mɨkite mepukuhetei.37'Ayumieme Tsenakeriwi, ti'aitame 'Atsiriya kiekame, manukateitsie kaneyani. Niniwe kiekariyaritsie kaninuani mana kaniyuhayewa.38Peru kepauka, tukita yunenewienekaku yukakaɨyari 'ayexeiyakaku Nitsiruki, niwemama 'Aruramereki, Tsaretsexi hamatɨa mekanimieni 'ixiparakɨ, mɨya mete'uyurieka mekaniuyuta'una 'Ararati kwieyaritsie paitɨ. Hikɨ nu'aya 'Etsaxikaruni 'utɨmana ti'aitame kanayani.
expand_more
Search