Kitsariyaxi28hch_wb2

Xɨa'ui 'Epɨrahini

1Xɨa'ui memuyuti'ɨre wakuruna 'Epɨrahini kiekatari memɨtarɨwe,tutu mɨyɨna witsikemɨtiyuxexeiyakai,hɨri 'ayewerikaku 'aixɨa raye'anekaku muwe.Xɨa'ui winukɨ mematixɨri.2Neuxei, Ti'aitame xeime kanexeiyanitɨrɨkaɨyeme meta mariweme:Mɨkɨ kwiepa katinahɨamɨkɨ rananaimatɨ,tee mukaxɨrieni hepaɨ,'eka mɨtiyuka'una hepaɨ,wiyeri mɨhaikɨrima hepaɨ,haa muwayeneni hepaɨ.3'Epɨrahini memɨtarɨwe wakuruna kɨmana memuyuti'ɨre,kanitaketsinariemɨkɨ.4Mɨkɨ tutu mɨyɨna witsikemɨtiyuxexeiyakai,hɨri 'ayewerikaku 'aixɨa raye'anekaku mɨyewe,mexɨakame xapa mukwaxi kanayeimɨkɨ katika'inɨiyawekaku 'akuxi:xewitɨ 'ixeiyame yapauka 'eka'inɨme,kanitakwaimɨkɨ.
5'Iya tukaritsie Yawé Naimekɨmɨtɨrɨkaɨyekuruna witsimɨtiyuxexeiya kanihɨkɨtɨkamɨkɨ,patsaruxi mutixawatɨrekeyupaɨmetɨ memuyuhayewa mehe'eriwatɨ wahetsiemieme.6Mɨkɨ 'iyari pupitɨani heitseriemekɨ yamɨtiyurienenikɨkemɨ'ane mɨtita'aita,meta kuyaxi pɨwapitɨani memuyuwaɨriyanikɨkiekaritsie mɨranutahakitɨretsie memɨtetahɨkakɨ.
7Metatsiere mawari wewiwamete meta Kakaɨyari niukametemama,kaxie winuyarikɨ mepeukeitsarietɨweni,mepeukeitsarietɨwe winu waɨkawa mɨtɨrɨkaɨyekɨwinukɨ mepɨkaheta'eriwawe,winukɨ mepetiketamɨrike.Kepauka Kakaɨyari mɨtiwaxeitsitɨa mɨpaɨ mepɨkatekuxata,kepauka yamemaitɨka, meputirukuwa xeikɨa.8Puyuri, naitɨ wamexate pɨhayarimatɨka,hawaikɨ tɨma pɨkahanaka'itiyarie.
9«¿Kemetemate kemɨ'ane mepɨteha'ɨkitɨa?¿Kemɨ'ane niuki mepɨtehakuxaxatɨwa?¿Tɨɨri metate'erie hekwamekɨke temutsitsinawaiyarie,hekwamekɨke tatsitsi temuku'eiri?10¿Tɨɨri mɨixamexɨa mɨpaɨ memutiyuane:“a-b-c-d-e, a-e-i-o-u,'etsiwa 'ena, 'etsiwa huma”?»
11Matsitsɨ 'aixɨa kani'aneni, Kakaɨyari 'ikɨ yuteɨterima kaniwatahɨawimɨkɨwayuriyatɨ yɨkɨ niuki 'anuyɨnemekɨ meka'i'eniekamekɨ,12mɨkɨ teɨteri mɨpaɨ mɨtiwarutahɨawekai:«'Ena 'uxipiya maxuawe kanihɨkɨtɨni,kemɨ'ane mu'uxe ke'uka'uxipieni»,metatsiere mɨpaɨ mɨtiwarutahɨawixɨ:«'Ena 'uxipiya tukari kanihɨkɨtɨni».Matsi mepɨka'i'eni.13'Ayumieme Yawé niukieyawahetsiemieme kanayeimɨkɨta:«a-b-c-d-e, a-e-i-o-u,'etsiwa 'ena, 'etsiwa humapaitɨ».Kepauka memɨyekɨne yukutama pɨta me'uhutɨ,memɨtekwinekɨ, winiyaritsie memeyuxɨrienikɨ meta putsuta memeukaxɨrienikɨ.
14'Ayumieme, teɨteri xemɨte'aita xeyuti'ɨretɨ'ikɨ kiekariyaritsie Kerutsareme,Yawé niukieya xekeneu'eni:
15Xeme mɨpaɨ xemutiyuane: «Tɨratu tepuwewi mɨki hamatɨa,mɨki teukiyapa hamatɨa tɨratu tepuwewi.Kepauka 'uximatɨarika munuani,pɨkayɨwe mɨkatatsi'axekɨ,tame tita mɨti'itarika tahetsie nunuwame temayeitɨakɨmeta tita kwamanarika mɨtihɨkɨ tatsi'awiwietame».16'Ayumieme Yawé naimekɨmɨyɨwe mɨpaɨ paine:«Ne Tsiyunitsie tete nepayeni 'inɨatsiekame,tete 'uta'etsikiname witsi'aneme tenaritsie miemetɨme,kemɨ'ane hetsiena mɨtiwiyani 'aixɨa 'iyari puyeikani.17Tita 'aixɨa mɨti'ane ti'inɨnɨatame hepaɨ 'aneme 'anepɨtakeni,meta mɨtiheitserie hetsiemieme, tepɨa mahete hiru manawie.Tee, xehetsie nunuwame 'itarikakɨ mɨhɨkɨ kaneuyehɨamɨkɨ,meta haa hakewa xemeyu'awieta kanikayunitɨamɨkɨ.18Pɨhayewarieni tɨratu xemuwewi mɨki hamatɨa,'atsikapɨtiyɨni tsepa mɨki teukiya hamatɨa xemɨte'utaxa.Kepauka 'uximatɨarika tiyumemiwame 'umamie,mɨkɨ kanixetipɨnamɨkɨ.19Kepauka manuyeyeikani, pɨxehehapanani,ximeri yapɨranuyeyeikani, tukarikɨ meta tɨkarikɨ».Kepauka xemeitimani 'ikɨ niukiyemekɨ xekanitimamakuni.20'Utá 'etsipɨtɨtɨ hetsiena muta'ɨtserita pɨkayɨwe,'ixuriki 'etsipɨyewa kɨmana muyuta'eima pɨkayɨwe.21Kaniyuritɨni, Yawé kananukukemɨkɨ Peratsini hɨriyaritsie hepaɨ,Kemɨtiukuyua Kawahuni mayeweritsie hepaɨ,yu'uximayatsika 'aye'atɨanike xewitɨ mɨka'imaiwe,yu'aitɨarika maye'atɨanikɨ.22'Ayumieme hikɨ, xeketeneuhayewa xeteyukananaimatɨ,kapa matsi kwinimieme tepɨa kaunariyarikɨ xeyutihɨani,Ti'aitame mɨpaɨ mɨnetiutaxatɨakɨ,Yawé Naimekɨmɨtɨrɨkaɨye,'ikɨ kexemɨteheuyehɨiyani hepaɨtsitakemɨtiuxatsie 'ikɨ kwieyari naime hepaɨtsita.
23Xekeneu'enana, neniuki xekeneu'eni,kayuwatɨ xekeneu'enana, neniuki xekeneu'eni:24Kepauka ti'uximayatame mukwietsanane ka'enike,¿ka'uxipietɨ tiyuriene?¿Tukarikɨ kwietsananetɨ meta rakuxexeɨriwatɨ raka'iyuniwa?25Kepauka kwie 'aixɨa makuyurieni,'imɨari witsima'ane meta kuminutsi kanika'emɨkɨ.Tɨriku kaniuka'etsani xuruku tiwewieme,tsewara hakewa maka'etsiwatsie,meta manunenieretsie 'iku kanika'emɨkɨ.26Kakaɨyari kanihɨkɨtɨni kemɨ'ane mɨtikuxaxatɨwamɨti'ɨkitɨa kehepaɨ mɨtiyurienikɨ.
27'Imɨari witsima'ane manuxɨtetɨkakɨ pɨkakaweiwa,meta kuminutsi hetsie kaxeta 'ɨkaya pɨka'uyeyeika,matsi witsimu'ɨa tuturiyari kɨye 'etsipemekɨ kaniweiwani,meta kuminutsi kɨye 'apamekɨ.28'Uriyari kanitiketsinarɨwani, peru waɨkawa pɨkaketsinarɨwa,meta ka'uxipietɨ pɨtiketsinarɨwa.Hetsiena kaxeta 'ɨkaya kaniuyehanietɨyeikani,peru kawayutsixi mepɨka'itɨxiwawe.29'Ikɨtsiere Yawé Naimekɨmɨtɨrɨkaɨye hetsie katinayeneikani,kanimariweni yu'ɨxatsikɨmeta waɨkawa katinimaika.
expand_more
Search