Kitsariyaxi1hch_wb2

1Kemɨtiunierixɨ Kitsariyaxi 'Amuxi nu'aya Kura nuiwariyari hepaɨtsita meta Kerutsareme, 'Utsiyaxi, Kutani, 'Akatsi meta 'Etsekiyaxi, Kura kwieyaritsie te'aitamete mete'aitakaku.

Kura, nuiwari mɨkaheu'ena

2Muyuawi, xekeneu'enana. Kwie, meta keneu'ena.Yawé mɨpaɨ kanaineni:«Ne tɨɨri nekaniwarutiwaweriya 'ameyumateme nekaniwarayeitɨani,peru mɨkɨ menetsi'aye'unietɨ mekanakɨne.3Tuuru kwietsaname yukutsiyari kanimatenimeta puxu kanemarieka hakewa kutsiyarieya mɨreitimikwa,peru 'ixaheritsixi mɨpaɨ mepɨkatemate,neteɨterima mepɨkaheu'enana».
4Xɨa'ui nuiwari 'axateyuruwamete,teɨteri xehetsie mɨrahɨiwa,'axateyuruwamete nuiwariyari,tɨɨri heitseriemekɨ yaxemɨkateyurie.Yawé xekaniuku'eirieni.Mɨpatsie 'Ixaheri hetsiemieme tixaɨtɨ tihɨkɨtɨme xepɨka'ayeitɨa.Yu'ɨtɨma xekanekɨne.
5¿Ketitayari tawarita xetetiweiwani?¿Ketitayari xete'iyeweiyani xe'eye'unietɨ?Naitɨri'amu'u kaniweiyaka,naitɨri 'a'iyari katinikuyeni.6Xeketatetsie tsutɨtɨ xeyekɨrita paitɨ ye'atɨnaitsarie xepɨteheukukuye:mɨkɨ naimetsie xepeukuweiyatɨka, xepeukuyuyuawi,meta haiya hayepietɨkaime xepexeiya,nixewitɨ pɨkaxeti'uayemawe meta pɨkaxe'anakɨhɨaxɨawe,nixewitɨ hatseitikɨ pɨkaxeka'uayemawe.
7Xekwieyaritsie kanakumaweni,kiekariteya tai harakunayari kanihɨkɨtɨkani,metanenierekakutɨtɨkɨkamete wa'etsarita timieme mekateniukaxɨrɨwani,wakwie kanakumaweni,'ateewa kiekatari memɨwaruka'una hepaɨ.8Tsiyuni witsimɨti'ɨimarixamaru 'ewiweme harawerita mieme hepaɨ kaniuyɨni,pinixi ma'etsietsie 'etɨpiweme hepaɨ kaniuyɨni,kiekari manutinamieka hepaɨ kani'aneni.9Xɨka Yawé Naimekɨmɨtɨrɨkaɨyehipame kawaruhayewake me'ayeneniereme,hikɨ xɨari Tsuruma hepaɨ pɨraku'anenike,meta xɨari Kumuxa hepaɨ tepauyewenike.
10Yawé niukieya xekeneu'eni,xeme Tsuruma hetsie xemɨte'aita.Xekeneu'eni takakaɨyari 'ɨkitɨarikaya,Kumuxa kiekatari.11Yawé mɨpaɨ kanaineni:«Tixaɨtɨ pɨkatihɨkɨ waɨkawa memɨnetemawirie.Muxatsi 'ukitsi wamawari taiyarikakɨ 'ari nepɨwaɨripierimeta tewaxi memɨwaiyatɨka wawiyayarikɨ,tuurutsixi, muxatsi meta tsipuriwaxuriya pɨkanetsinake.12¿Titayari nehɨxie xete'axe?¿Kemɨ'ane pɨxe'uta'aitɨa tewaxixemɨwa'atɨwanikɨ netuki takwa memɨte'akuketsinanikɨ?13Xepɨkanetsi'atɨiriwaniri mawari tixaɨtɨ mɨkatihɨkɨ,'ɨkwa witsimu'ɨa nekanixani'erieka.Metsa manatiwenitsie, 'uxipiya tukari, mɨrayutixexeɨritɨretsie,nepɨkayɨweri nemɨtinewieka yakɨ xeikɨa kememɨnete'ayexeiya.14Metsa 'ixɨarariyari meta wa'ixɨarari naime ne nepɨxani'erie,xekaneniuti'ikatɨaninetinewietɨri nepu'uxe.15Kepauka teikɨ xemememe,ne nepɨkaxexeiyaniri,tsepanetɨ yunenewieri xemɨmɨiriya,ne nepɨka'i'enieni,yumamatetsie naitɨ xemeuxuxurekɨ.16Xekeneuyuhauxixɨa, xekeneuyu'itiexɨa.Nehɨxieri 'axaxepɨkateyurieka.'Axaxeteyurietɨ xeketeneuhayewa.17'Aixɨa mɨti'ane pɨta xeketenemaika.Mɨtiheitserie xekeneutiwawa, mɨtiuyukananaima xekeneutati'a.Nutui hetsiemieme xekeneutaniu meta wiura hetsie xekenenuaka».
18Yawé mɨpaɨ kanaineni:«Xekenakɨni, 'aixɨa tepɨtayurieni 'ahekɨakamekɨ,¿'Axakexemɨteyuriekɨ xuriya muweka hepaɨ ti'ane?'Ɨwi hepaɨ tituxatɨ kanayeimɨkɨ.¿'Axakexemɨteyuriekɨ tixeta mɨyɨtsikimaɨyeni hepaɨ?Muxa huxarieya mutuxa hepaɨ kaniyɨmɨkɨ.19Xɨka xeme xeyuwaɨriyani yaxemɨtekakɨnekɨ,kwiepa timieme 'aixɨa mɨti'anene xekatenikwakakuni.20Xɨka xekayuwaɨriyani meta 'akuxi xeheye'unieka.'Ixiparakɨ xekanikwi'iwakuni».Yawé mɨpaɨ kaniutayuni.
21Kiekari pemɨkawatayuanekai hikɨri xeime hamatɨa tuminikɨ pepukahupu.Meripaitɨ 'aixɨa ti'aneme waɨkawa pepɨrexeiyakai.Mɨtiheitserie hetsiena puyuhayewakai,hikɨ matsi teyumiekate xeikɨa mepuyuhayewatɨwe.22'Apɨrata temɨxikitɨ kanayani,'akaxie winuyari 'aixɨa ma'ane, haa kanayani.23Te'aitamete 'ahetsɨa miemete mepunetsi'aye'unie,tenawayamete mepuwa'iwama,yunaitɨ 'itarikakɨ metekuxatatɨ memɨtepitɨariekakɨ mepɨnaki'erietixaɨtɨ xeikɨa mepɨte'iwaku.Nutui hetsiemieme mepɨkahaniutɨka,meta wiura hetsiemieme.
24'Ayumieme Ti'aitame mɨpaɨ kanaineni,Yawé Naimekɨmɨtɨrɨkaɨye, mɨtɨrɨkaɨye 'Ixaheri hetsiemieme:«Kenemɨtiha'akɨ yanepɨtiyurieni memɨnetsi'aye'unie wahetsie,nekatiniwarakapitɨamɨkɨ mɨkɨ kememɨnetsi'uyuri.25Tawarita netɨrɨkariya xehetsie nepɨtatuani,temɨxikiyari xapunikɨ nepuku'itienimeta naime nekanakuyeitɨamɨkɨ titakɨ pemɨkati'itiyakaikɨ.26'A'itsɨkate 'aixɨa nekaniwatiyurimɨkɨ matɨari hepaɨ,meta 'a'ɨxatsitɨwamete matɨari hepaɨ.Hikɨ 'ana “Kiekari heitserie mexeiya” pekatinitewakamɨkɨ,“Kiekari mɨkawatayuitɨariwa”».
27Tsiyuni pɨnanaiyani mɨtawikweitsitɨarienikɨ tika'eniexɨame,meta tita mɨtiheitseriekɨ, kemɨ'ane mɨtihayewa 'axatiyurienetɨ.28Peru kemɨ'ane memɨkayuwaɨriya meta 'axamemɨteyurie mekanikumaweriyariekuni,meta mekanikwikuni kemɨ'ane Yawé memuku'eirieni.29Xekanititewiyakuni xiu kɨyeyari kwinimieme xemɨtenaki'erie,tuturite muwa'iteɨtsietsie memenayexei wahetsiemieme tewiyarika katinayeimɨkɨ.30Xiu kɨyeyari xawariyari muwawaki hepaɨ kanitiyɨmɨkɨ,haraweri tuturi mɨwa'etsietsie mɨka'ukahatuiyarɨwa hepaɨ.31Tewi mɨtɨrɨkaɨye mɨaxa hepaɨ kaniyɨmɨkɨ,meta 'uximayatsikaya tai tsipɨrikiyari hepaɨ,'axeikɨa hutatɨ kanititaimɨkɨ,xewitɨ pumaweni mitɨnikɨ.
expand_more
Search