Ti'ɨkitame7hch_wb2

Hekwamekɨ kepemɨtiuyeikani

1Matsi tewi 'aixɨa peketixeiyarieka,keyuri witsipe'u'ɨatɨ.Matsi katiniyunaki'erieka kepauka temɨkwinitsie,keyuri temɨtinunuiwatsie.2'Aixɨa matsi kani'aneni mɨki makateukienitsie pemumie,keyuri 'ixɨararipa.Temɨkwinikɨ teyunaime teɨteri tahetsie kanimiemetɨni, memayeneniereta matsi mɨpaɨ meketemaika.3Mɨyuhiwerieka kaneuyeweka keyuri mutanaweni,kananakanutuixieka yuhɨxie,matsi 'aixɨa kaniyurieka 'iyarieya.4Mɨtimaiwe kaniku'eriwani kepauka mɨmɨni,matsi 'atsimɨkatimate kaniyu'iyaritɨaka xeikɨa kemɨtiyurienekɨ.5Matsi 'aixɨa kani'aneni mɨtimaiwe mɨratate'anikɨ,keyuri 'atsimɨkatimate niukieya tsi'aneneme 'enietɨ.6Tixaɨtɨ pɨkatihɨkɨ 'atsimɨkatimate kemɨtikuxata, mɨpaɨ xeikɨa katinimatsiɨkɨni, xuya xarita matikateni hepaɨ. Mɨkɨta tixaɨtɨ pɨkatihɨkɨ.7Mɨtimaiwe nanaimarikakɨ katimaiwetɨ kanayeimɨkɨ,tuminikɨ yu'iyari kanikwiemaka.8Matsi 'aixɨa kani'aneni tixaɨtɨ mɨreutiparekɨ,keyuri titsutɨarietɨ.Matsi 'aixɨa kani'aneni mɨtiuka'eniwanikɨ waɨkawakeyuri yu'ariwietɨ.9Haxɨakɨ xeikɨa pepɨka'ayeweni,matsi mɨkɨ 'atsimɨkatimate kani'iyarieyatɨni.10Mɨpaɨ pepɨkahaineni kename meripaitɨ 'aixɨa metiyuriekai. Mɨkɨ kememutiyuane memɨtemaiwawe wahetsɨa pɨkamieme.11'Aixɨa kani'aneni pemɨtimaiwenikɨ tita 'aixɨa mɨti'ane hepaɨtsita, hikɨ memu'uwa wahetsie 'aixɨa mɨti'anenikɨ.12Pekaniyɨweni mɨtimaiwenikɨ 'etɨriyayatsie pemuyeikanikɨ metatsiere tumini 'etɨriyayaritsie, matsi mɨtimaiwenikɨ mɨ'ayumieme tukari kaniwapitɨamɨkɨ kemɨ'ane memeixeiyani.13Kakaɨyari 'uximayatsikaya keneuxeiya: ¿kemɨ'ane pɨyɨwe mitixeurariyakɨ tita mɨkɨ mutiutitunaxɨ?14Kepauka 'aixɨa ti'aneme pemɨrexeiyani, kene'atemawieka, matsi kepauka 'axati'aneme pemɨrexeiya, keneutimaixɨa 'uximayatsika naitɨ Kakaɨyari hetsɨa kanayeneikani, tewi 'atsimɨkatimatekɨ ketita mɨtikaxeiya 'arike.15Hikɨ tukaritsie nemuyeikakai tinaime nepɨtiuxei: teɨteri 'aixɨa memɨte'u'uwa 'aixɨa mɨti'ane kaniwaka'unani, teɨteri 'axamemɨteyurie 'axamɨti'ane 'apɨtiwareuteritɨa.16Kwinimieme 'aixɨa mɨtiyuriene pepɨka'a'erieka,meta kwinimieme mɨtimaiwe pepɨka'ayuyeitɨwani.¿Matsi ketitayari peti'aka'unamɨkɨ'akɨmana?
17'Axapetiyurienetɨ pepɨka'ayuyeitɨwani,meta 'atsimɨkatimate hepaɨ.¿Ketitayari petimɨnikwitɨwa?
18'Aixɨa kani'aneni 'ikɨ peha'eriwatɨ,peka'itatuayatɨ tita pemɨrexeiya.Kakaɨyari kemɨ'ane mayemakaxe,mɨkɨ naimetsie yakatinikamieni.
19Mɨtimaiwenikɨ mɨ'ayumieme matsi mɨtimaiwe kanitɨrɨkariyani,keyuri tamamata te'aitamete xeikiekariyaritsie.20Xewitɨ pumawe 'ena kwiepa 'aixɨa 'anetɨ,'aixɨa tiyurienetɨ hatsuaku 'axakatiyuriwetɨ.21Pepɨkawa'enieka yunaime kememutiyuane, mɨpaɨ matsi peyɨanetɨ mati'uximayatsiriwame pepɨka'enieni kepauka 'ahepaɨtsita 'axamɨtayɨni,22'ekɨta pekatinimaika, heiwa mɨixa 'axapekaniutaineni hipame wahepaɨtsita.

Piinitɨarika kenemɨtikuwaunekai

23Naime 'ikɨ 'aixɨa nekatiniuyurieni netimaiwetɨ, mɨpaɨ nepɨtiku'eriwakai waɨkawa netimatetɨ nepaneyeitɨani, peru mɨtimaiwenikɨ mɨ'ayumieme 'ateewa paitɨ kaniyuhayewakaitɨni nehetsɨa.24'Ateewa yemekɨ 'aheukatewakaku katiniyuhayewa naitɨ tita mɨtixuawe. ¿Kemɨ'ane pɨyɨwe meitimanikɨ?25Merikɨte nekaninuani nemɨtitamarienikɨ meta nemɨretimanikɨ, mɨtimaiwenikɨ mɨ'ayumieme nemɨtixeiyaxɨanikɨ, meta piinitɨarika hetsiemieme, 'ana mɨpaɨ nepɨretima 'atsimɨkatimate hɨkɨtɨtɨ 'axakatiniyurieneni meta mɨka'uka'iyari kanirukuyaneni xeikɨa.26Tixaɨtɨ matsi nekatiniukaxeiya kwimieme ratsiwime keyuri mɨmɨnikɨ: 'uka mɨtiyu'itaiya kanihɨkɨtɨni, wipi winiyariyari kanexeiyani yu'iyaritsie meta yumamatetsie tepɨa kaunariyari kanexeiyani. Kemɨ'ane Kakaɨyari mɨtemawieritɨa kaniyɨxɨnamɨkɨ mɨkɨ hetsɨa, peru 'axamɨtiyuriene mɨkɨ winiyarieyatsie kaniyukahɨamɨkɨ.27Ti'ɨkitameta mɨpaɨ kaniutayɨni: «Neuxei 'ikɨ nekatiniukaxeiya netiutiwauka piinite hepaɨtsita, xexuimetsie:28'akuxi nepɨtiwaune ketita nemɨkatikaxeiyawe, matsi tewi xeime nekaniutaxeiya xeimiriyari wahetsɨa mieme, peru yunaime 'ukari wahetsɨa xeimetɨma nepɨkataxeiyawe.29'Ikɨ xeikɨa nekatiniukaxeiya: Kakaɨyari tewi kaniutawewieni 'aixɨa 'anekame, peru mɨkɨ kanikuwauni yɨkɨ ti'aneneme».
expand_more
Search