Psalms26
1לְדָוִד שָׁפְטֵנִי יַהְוֶה כִּי אֲנִי בְּתֻמִּי הָלַכְתִּי וּבְיַהְוֶה בָּטַחְתִּי לֹא אֶמְעָד2בְּחָנֵנִי יַהְוֶה וְנַסֵּנִי צְרוֹפָה כִלְיוֹתַי וְלִבִּי3כִּי חַסְדְּךָ לְנֶגֶד עֵינָי וְהִתְהַלַּכְתִּי בַּאֲמִתֶּךָ4לֹא יָשַׁבְתִּי עִם מְתֵי שָׁוְא וְעִם נַעֲלָמִים לֹא אָבוֹא5שָׂנֵאתִי קְהַל מְרֵעִים וְעִם רְשָׁעִים לֹא אֵשֵׁב6אֶרְחַץ בְּנִקָּיוֹן כַּפָּי וַאֲסֹבְבָה אֶת מִזְבַּחֲךָ יַהְוֶה7לַשְׁמִעַ בְּקוֹל תּוֹדָה וּלְסַפֵּר כָּל נִפְלְאוֹתֶיךָ8יַהְוֶה אָהַבְתִּי מְעוֹן בֵּיתֶךָ וּמְקוֹם מִשְׁכַּן כְּבוֹדֶךָ9אַל תֶּאֱסֹף עִם חַטָּאִים נַפְשִׁי וְעִם אַנְשֵׁי דָמִים חַיָּי10אֲשֶׁר בִּידֵיהֶם זִמָּה וִימִינָם מָלְאָה שֹּׁחַד11וַאֲנִי בְּתֻמִּי אֵלֵךְ פְּדֵנִי וְחָנֵּנִי12רַגְלִי עָמְדָה בְמִישׁוֹר בְּמַקְהֵלִים ⸃ אֲבָרֲכֶךָ ⸂ יַהְוֶה {פ}
Stephen L. Brown