Hosea13
1כְּדַבֵּר אֶפְרַיִם רְתֵת נָשָׂא הוּא בְּיִשְׂרָאֵל וַיֶּאְשַׁם בַּבַּעַל וַיָּמֹת2וְעַתָּה יוֹסִפוּ לַחֲטֹא וַיַּעְשׂוּ לָהֶם מַסֵּכָה מִכַּסְפָּם כִּתְבוּנָם עֲצַבִּים מַעֲשֵׂה חָרָשִׁים כֻּלֹּה לָהֶם הֵם אֹמְרִים ⸃ זִבְחוּ ⸂ אָדָם עֲגָלִים יִשָּׁקוּן3לָכֵן יִהְיוּ כַּעֲנַן בֹּקֶר וְכַטַּל מַשְׁכִּים הֹלֵךְ כְּמֹץ יְסֹעֵר מִגֹּרֶן וּכְעָשָׁן מֵאֲרֻבָּה4וְאָנֹכִי יַהְוֶה אֱלֹהֶיךָ ⸋ בֹּצֵר שָׁמַיִם וְקוֹנֵה אָרֶץ אֲשֶׁר יָדָיו בָּרָא כֹּל צְבָא הַשָׁמָיִם וְלֹא הִרְאִיתִים לְךָ לָלֶכֶת אַחֲרֵיהֶם וְאָנֹכִי הַעֲלוֹתִיךָ ⸌ מֵאֶרֶץ מִצְרָיִם וֵאלֹהִים זוּלָתִי לֹא תֵדָע וּמוֹשִׁיעַ אַיִן בִּלְתִּי5אֲנִי ⸃ רְעִיתִּיךָ ⸂ בַּמִּדְבָּר בְּאֶרֶץ תַּלְאֻבוֹת6כְּמַרְעִיתָם וַיִּשְׂבָּעוּ שָׂבְעוּ וַיָּרָם לִבָּם עַל כֵּן שְׁכֵחוּנִי7וָאֱהִי לָהֶם כְּמוֹ שָׁחַל כְּנָמֵר עַל דֶּרֶךְ אָשׁוּר8אֶפְגְּשֵׁם כְּדֹב שַׁכּוּל וְאֶקְרַע סְגוֹר לִבָּם וְאֹכְלֵם שָׁם כְּלָבִיא חַיַּת הַשָּׂדֶה תְּבַקְּעֵם9שִׁחֶתְךָ יִשְׂרָאֵל כִּי בִי בְעֶזְרֶךָ10אֱהִי מַלְכְּךָ אֵפוֹא וְיוֹשִׁיעֲךָ בְּכָל עָרֶיךָ וְשֹׁפְטֶיךָ אֲשֶׁר אָמַרְתָּ תְּנָה לִּי מֶלֶךְ וְשָׂרִים11אֶתֶּן לְךָ מֶלֶךְ בְּאַפִּי וְאֶקַּח בְּעֶבְרָתִי {פ}12צָרוּר עֲוֺן אֶפְרָיִם צְפוּנָה חַטָּאתוֹ13חֶבְלֵי יוֹלֵדָה יָבֹאוּ לוֹ הוּא בֵן לֹא חָכָם כִּי עֵת לֹא יַעֲמֹד בְּמִשְׁבַּר בָּנִים14מִיַּד שְׁאוֹל אֶפְדֵּם מִמָּוֶת אֶגְאָלֵם אֱהִי דְבָרֶיךָ מָוֶת אֱהִי קָטָבְךָ שְׁאוֹל נֹחַם יִסָּתֵר מֵעֵינָי15כִּי הוּא בֵּין ⸃ אָחִים ⸂ יַפְרִיא יָבוֹא קָדִים רוּחַ יַהְוֶה מִמִּדְבָּר עֹלֶה ⸃ וְיִבַשׁ ⸂ מְקוֹרוֹ וְיֶחֱרַב מַעְיָנוֹ הוּא יִשְׁסֶה אוֹצַר כָּל כְּלִי חֶמְדָּה
Stephen L. Brown