2 Samuel22
1וַיְדַבֵּר דָּוִד לְיַהְוֶה אֶת דִּבְרֵי הַשִּׁירָה הַזֹּאת בְּיוֹם הִצִּיל יַהְוֶה אֹתוֹ מִכַּף כָּל אֹיְבָיו וּמִכַּף שָׁאוּל2וַיֹּאמַר יַהְוֶה סַלְעִי וּמְצֻדָתִי וּמְפַלְטִי לִי3אֱלֹהֵי צוּרִי אֶחֱסֶה בּוֹ מָגִנִּי וְקֶרֶן יִשְׁעִי מִשְׂגַּבִּי וּמְנוּסִי מֹשִׁעִי מֵחָמָס תֹּשִׁעֵנִי4מְהֻלָּל אֶקְרָא יַהְוֶה וּמֵאֹיְבַי אִוָּשֵׁעַ5כִּי אֲפָפֻנִי מִשְׁבְּרֵי מָוֶת נַחֲלֵי בְלִיַּעַל יְבַעֲתֻנִי6חֶבְלֵי שְׁאוֹל סַבֻּנִי קִדְּמֻנִי מֹקְשֵׁי מָוֶת7בַּצַּר לִי אֶקְרָא יַהְוֶה וְאֶל אֱלֹהַי אֶקְרָא וַיִּשְׁמַע מֵהֵיכָלוֹ קוֹלִי וְשַׁוְעָתִי בְּאָזְנָיו8וַתִּגְעַשׁ וַתִּרְעַשׁ הָאָרֶץ ⸃ וּמֹסְדוֹת ⸂ הַשָּׁמַיִם יִרְגָּזוּ וַיִּתְגָּעֲשׁוּ כִּי חָרָה לוֹ9עָלָה עָשָׁן בְּאַפּוֹ וְאֵשׁ מִפִּיו תֹּאכֵל גֶּחָלִים בָּעֲרוּ מִמֶּנּוּ10וַיֵּט שָׁמַיִם וַיֵּרַד וַעֲרָפֶל תַּחַת רַגְלָיו11וַיִּרְכַּב עַל כְּרוּב וַיָּעֹף ⸃ וַיֵּדֶא ⸂ עַל כַּנְפֵי רוּחַ12 ⸃ יָשֶׁת ⸂ חֹשֶׁךְ ⸋ סִתְרוֹ ⸌ סְבִיבֹתָיו ⸃ סֻכָּתוֹ ⸂ ⸃ חֶשְׁכַת ⸂ מַיִם עָבֵי שְׁחָקִים13מִנֹּגַהּ נֶגְדּוֹ ⸃ עָבָרוּ ⸂ גַּחֲלֵי אֵשׁ14יַרְעֵם מִן שָׁמַיִם יַהְוֶה וְעֶלְיוֹן יִתֵּן קֹלוֹ15וַיִּשְׁלַח חִצִּים וַיְפִיצֵם בָּרָק וַיְהֻמֵּם16וַיֵּרָאוּ אֲפִקֵי יָם יִגָּלוּ מֹסְדוֹת תֵּבֵל ⸃ מִגַּעֲרָתְךָ ⸂ יַהְוֶה מִנִּשְׁמַת רוּחַ אַפּוֹ17יִשְׁלַח מִמָּרוֹם יִקָּחֵנִי יַמְשֵׁנִי מִמַּיִם רַבִּים18יַצִּילֵנִי מֵאֹיְבִי עָז מִשֹּׂנְאַי כִּי אָמְצוּ מִמֶּנִּי19יְקַדְּמֻנִי בְּיוֹם אֵידִי וַיְהִי יַהְוֶה מִשְׁעָן לִי20וַיֹּצֵא לַמֶּרְחָב אֹתִי יְחַלְּצֵנִי כִּי חָפֵץ בִּי21יִגְמְלֵנִי יַהְוֶה כְּצִדְקָתִי כְּבֹר יָדַי יָשִׁיב לִי22כִּי שָׁמַרְתִּי דַּרְכֵי יַהְוֶה וְלֹא רָשַׁעְתִּי מֵאֱלֹהָי23כִּי כָל מִשְׁפָּטָו לְנֶגְדִּי וְחֻקֹּתָיו לֹא ⸃ אָסִיר מֶנִּי ⸂24וָאֶהְיֶה תָמִים לוֹ וָאֶשְׁתַּמְּרָה מֵעֲוֺנִי25וַיָּשֶׁב יַהְוֶה לִי כְּצִדְקָתִי כְּבֹרִי לְנֶגֶד עֵינָיו26עִם חָסִיד תִּתְחַסָּד עִם ⸃ גְּבַר ⸂ תָּמִים תִּתַּמָּם27עִם נָבָר תִּתָּבָר וְעִם עִקֵּשׁ תִּתַּפָּל28 ⸃ כִּי אַתָּ ⸂ עַם עָנִי תּוֹשִׁיעַ ⸃ וְעֵינַיִם ⸂ רָמִים תַּשְׁפִּיל29כִּי אַתָּה ⸋ תָּאִיר ⸌ נֵירִי יַהְוֶה וְיַהְוֶה יַגִּיהַּ חָשְׁכִּי30כִּי בְכָה אָרֻץ גְּדוּד בֵּאלֹהַי אֲדַלֶּג שׁוּר31הָאֵל תָּמִים דַּרְכּוֹ אִמְרַת יַהְוֶה צְרוּפָה מָגֵן הוּא לְכֹל הַחֹסִים בּוֹ32כִּי מִי אֵל מִבַּלְעֲדֵי יַהְוֶה וּמִי צוּר מִבַּלְעֲדֵי אֱלֹהֵינוּ33הָאֵל ⸃ הַמְאַזְּרֵנִי ⸂ חָיִל ⸃ וַיִּתֵּן ⸂ תָּמִים ⸃ דַּרְכִּי ⸂34מְשַׁוֶּה ⸃ רַגְלַי ⸂ כָּאַיָּלוֹת וְעַל בָּמֹתַי יַעֲמִדֵנִי35מְלַמֵּד יָדַי לַמִּלְחָמָה וְנִחַת קֶשֶׁת נְחוּשָׁה זְרֹעֹתָי36וַתִּתֶּן לִי מָגֵן יִשְׁעֶךָ וַעֲנֹתְךָ תַּרְבֵּנִי37תַּרְחִיב צַעֲדִי תַּחְתֵּנִי וְלֹא מָעֲדוּ קַרְסֻלָּי38אֶרְדְּפָה אֹיְבַי וָאַשְׁמִידֵם וְלֹא אָשׁוּב עַד כַּלּוֹתָם39 ⸆ וָאֶמְחָצֵם וְלֹא יְקוּמוּן וַיִּפְּלוּ תַּחַת רַגְלָי40וַתַּזְרֵנִי חַיִל לַמִּלְחָמָה תַּכְרִיעַ קָמַי תַּחְתֵּנִי41וְאֹיְבַי תַּתָּה לִּי עֹרֶף מְשַׂנְאַי וָאַצְמִיתֵם42 ⸃ יְשַׁוְּעוּ ⸂ וְאֵין מֹשִׁיעַ אֶל יַהְוֶה וְלֹא עָנָם43וְאֶשְׁחָקֵם כַּעֲפַר אָרֶץ כְּטִיט חוּצוֹת אֲדִקֵּם אֶרְקָעֵם44וַתְּפַלְּטֵנִי מֵרִיבֵי ⸃ עָם ⸂ ⸃ תְּשִׂימֵנִי ⸂ לְרֹאשׁ גּוֹיִם עַם לֹא יָדַעְתִּי יַעַבְדֻנִי45בְּנֵי נֵכָר יִתְכַּחֲשׁוּ לִי ⸃ לְשֵׁמַע ⸂ אֹזֶן יִשָּׁמְעוּ לִי46בְּנֵי נֵכָר יִבֹּלוּ וְיַחְגְּרוּ מִמִּסְגְּרוֹתָם47חַי יַהְוֶה וּבָרוּךְ צוּרִי וְיָרֻם אֱלֹהֵי צוּר יִשְׁעִי48הָאֵל הַנֹּתֵן נְקָמֹת לִי וּמֹרִיד עַמִּים תַּחְתֵּנִי49וּמוֹצִיאִי מֵאֹיְבָי וּמִקָּמַי תְּרוֹמְמֵנִי מֵאִישׁ חֲמָסִים תַּצִּילֵנִי50עַל כֵּן אוֹדְךָ יַהְוֶה בַּגּוֹיִם וּלְשִׁמְךָ אֲזַמֵּר51מַגְדִּיל יְשׁוּעוֹת מַלְכּוֹ וְעֹשֶׂה חֶסֶד לִמְשִׁיחוֹ לְדָוִד וּלְזַרְעוֹ עַד עוֹלָם {פ}
Stephen L. Brown