የሱስይ ሙሴዘንካ ስገድባብ ማትና
1ኮካንታ የተረ ጉጅሰረ ሳብካ ኤልምስባብከስ ሳብካንታ ፋስምስባብ አመንድባብከሶ! ዎንታ አሜንንጎካ ኦይትምስባብኬ ቄሰንከስታ ገችንባብ ማችባብ የሱሰም ገቀርከቴ።2ሙሴ ሳብታ ኤሄናር ሙዳ አሜንምስባብ ማትሶ Ꮊቃንግንዳ የሱሰረ ይም ዶርስባብ ሳብካንታ አሜንምስባብ Ꮊቄ።3ኤሄንም ዎድባብ ኤሄንዘንካ ስግስሶ አንድር ቦንቻ ክትካንታ ዶቅድንግንዳ ሙዳ የሱሰመረ ሙሴዘንካ ስግስሶ አንድር ቦንቻ ክትካንታ ዝግዝድንዳ ማቼ።4ኬት ዋልቃ ዋልቃባብከስካንታ ኤሄን ዎድባብ ዶቅዴ፥ ሙዳ ሪን ፍክስባብ ማቼ ሳብዬ።5ኦስ እሪ ከዝም ዝግዝድን ሪንካንታ ማርካ ማተሮ በድ ሳብታ ኤሄናር ሙሳ አሜንምስባብ ፍክስንባብ ማትሶ Ꮊቄ።6ክርስቶስ ማቼ ሳብታ ኤሄናር አሜንምስባብ ክትማቻንዳ ይንችግንዳ ማትሴ፥ ኤሄነረ ዎቶቴ፥ ክታ ኤሀ ዎ ማድንደረ ዎ አሜንምድን ሪንኬ ዎ ጋይሪምድን ጉርምንም ዳቅስሶ ዎ የጃን ማቼ ማዴ።አሜንምክሳ ነግዳን ዎርሰንካንታ እምምሳን ኤግዝምስ
7ኮካንታ አያን ጭልና ጋይድንግንዳ“ታካ ሳብታ ኡፍስንም ኤሰርደቶ፥8ዴል ቆቼናር እም የንታ ባቤንከስ ጰጫንደትኬ ከት ግርዳንደትግንዳየንታ ቡደንም ኤእዳክንዳ Ꮊይማሰቴ፥ አነረ እንካ Ꮊይ ጋይችመቴ።ቃስቴን ቦንዳ ስለናር እስታ ፍክስንም ሰደኬ” ጋይዴ ሳብ።10“ኮካንታ ከትኬና አጥርንዘን ሰነርስቶ፥‘ኬታ ቡደና ሙዳᎺይካ ኮተርዴ፥እስታ ጎግንመረ ኤሳከኬ’ ጋይሳቴ”።11ጉጅሰረ፥“ ‘እ ከትካንታ እምድን Ꮊዉስ ካርናር ቦድሶ አርዳየኬ!’ ጋይስቶእስታ ሰነርንካ ጫቅትቴ”።12እስታ ገርነንከሶ፥ የንታ ዎክያርንካ Ꮊየነረ ዶቅንት ሳብንዘንካ ጎተርዝድን ዳቅልኬ አሜንዳክን ቡዳ ዶቅተራክንግንዳ ካርስምከቴ።13ስግስሶ የንታርንካ ጎመካ ገስምሶ ኤእዳክን ቡዳ ይንታ ማሳይንግንዳ “ታካ” ጋይምሶ ኤልምሳንዳ ሰጫ ዶቅድን የለልታ ሙዳᎺይካ ክክ ክክ ዛብስከቴ።14እሪምሶ ዎንታ ዶቅድን አሜንን በእንታ የለልታ ዛብስሶ ዎ የጄ ክርስቶስካ ክክን ባንችምን ተይዶቴ።15ኮነረ “ታካ ክታ ኡፍስንም ኤሰርደቶኮትኮ ግር ሰጨናይካ የንታ ባቤንንከስ ይሳንግንዳ የንታ ቡደን ኤእዳክንዳ Ꮊይ ማሰቴ”ጋይምሶ ኬዝምሳንግንዴ።16ማታጋካ ዳት ከታኬና ክታ ኡፍስንም ኤሰርሳንደታ ቡር ግርድባብ Ꮊይከሰረ? ከተረ ሙሴ ከትም ጎርዝድንካ ግብጻርንካ ዉተድባብከስ ሙደና ካየኮ?17ሳብም ቃስቴን ቦንዳ ስላ ሙዳ ሰነርሳᎺቅባብ ከታ Ꮊይከሰረ? ኬታ ኬነና ጎማ ፍክስባብከስኬ ከት ደእስንካ ኬታ ለይስና ዴል ቆቼናር ዋችሶ ነገድባብከስ ካየኮ?18ጉጅሰረ ከትከን ክትማክባብከስም ማታክንዳ ማቼ “እስታ Ꮊዉስ ካርናር አርዳከቴ” ጋይሶ ጫቅምሳንዳ አብ Ꮊይከስ ካንተረ?19ይና ከት አርድክሳ ነገዳንዳ አሜንክሳ ከታ ነግንጎካ ማትንተን ኤዝዶቴ።