ROMAWA15
1Omu de mu man sori a siki beigaskye e kamata de mu sua worede man sori ba nto a siki ni reshi sori su. Kede mu jima kiya mu2E kamata, konwawa e yi mbode jima yayuwa sobon kyakyawu yi, sobon de su gina beigaskye su.3Sobon Kiristi yi mbode jima kiya yi ba. Yiride rubutu a siki takada Mirikisi nkye, <<Basi ni nsu basi ku e kuma puari a kiya na.>>4Sobon guru mbode e ma rubutu a siki takada Mirikisi su rubuta e yi na de e kokoyi mu, de mu man sadishiya te anya takuwa nja ja sori guyam de takada Mirikisi ma kokoyi mu.5Bila de Mirikisi, nsu beyi takuwa nja ja sori guyam, e sa ku de ku mani yeda ni nkyaku de ku biya seni ni Kiristi Yesu,6de guru ku ku yobo Mirikisi Adaa ni Obagizi mu Yesu Kiristi ni murinya daa.7Ku keleba nkiyaku nnani bi, yiride Kiristi keleba ku nnani bi, sobon yobo dereja Mirikisi.8Sobon eni gye ku nkye Kiristi ema bunwa amomoko yawudawa la, de e nana nkye Mirikisi e ma nsu aminshi la, de e sa anikowori yi de yi nsu adaatolo su e ma gaskye,9de e sa ko worede su ma Yawudawa ba su yobo Mirikisi sobon aniyeriyi. Yiride takada Mirikisi pala nkye,<<Nkayom na yobo ke a siki ni worede su ma Yawudawa ba;Na yi wonka yobo te nja ke.>>10Takada Mirikisi kwa pala nkye,<<Oku de kuma Yawudawa ba ku yi peri siki nja ntani Mirikisi!>>11Jaja e kwa pala nkye,<<Ku yobo Obagizi, guru worede kuma Yawudawa ba;ku yobo yi, guru ntani!>>12Jaja, anebi Ishaya pala nkye,<<Nseda dege siki juriya Yesi yaa zo;yaa zo de yi solota ni worede su ma Yawudawa ba,sua sadishiya su nja shi.>>13Bila de Mirikisi, de ma tutiri sadishiya, e sika ku ni guru perisiki nja selema te anya beigaskye nja shi, de sa dishiya ku e sigeba ni yi girima te anya sori Aworo Nsuseki.14Yayuwa na: E ni nkyiyana ni aminshe nkye kuma ni kiriki soseyi, ku kwa mani shina soseyi, nja kwa yi yaa kokoyi nkyaku.15Sede a siki takada mu Ni butu a pili ba womba mma yi beta a kiya worosu su mbo de ni turunwa ku nshi. Ni yi ku yomu ba womba sobon aniyeri de Mirikisi yi ni shi la16de sa ni mma bunwa ni Kiristi Yesu de ni yi worede su ma Yawudawa ba ANKI. Mma yi ANKI kankye pirisi te anya beyi manki kyakyawu ni Mirikisi, de worede su ma Yawudawa ba sua ma sedeka mbo keleba anya Mirikisi, de su munka su te anya Aworo Nsuseki.17A siki zumunshi na nja Kiristi Yesu, Na dege dolo ni ANKI na de ni mayi Mirikisi.18Na yi sori dishiya de ni yi beta a kiya mbode Kiristi yi te anya na de ni ja worede su ma Yawudawa ba de su beyi girima te nja Mirikisi. E yi mbom te anya beta nja ANKI na,19te anya sori ni mbo mamanki nja alama, nja te anya sori ni Aworo Mirikisi. Yomuna, dege Wurishelima ari kyewe Ilirikum, ni beyi manki nabari kyakyawu ni Kiristi.20A kowoni kwanki niyana e shiya ma de ni beyi manki nabari kyakyawu a guru anya de su tuku zi beta Kiristi woba, de kede ni yi gini a kiya tutiri de nseda mbom na sa.21Yiride e ma a rubutu a siki takada Mirikisi nkye,<<Worede su taba gye su beta a kiya e yi ba sua geni,worede su taba zi ba sua gane.>>22E shiya sa de su nana ni a kwanki nyowa de ni zo anya ku.23Sede Kuzukam de Ni gama ANKI na a siki gunduma worosu mu nja tunde Na bila de ngenku a shekera nyowa de sua zo,24Ni sadishiya de Ni kwa geni ku kuzukam. Na bila de Ni geni ku a kwanki de Ni ma te a kesa Sipen, de ku sua Ni nto nde na te anya ni, a beyi de Ni zi dadi zunwa nja ku ni kwanki piri.25Kuzukam, Ni ma te a Wurishelima Ni ma keyi ntani Mirikisi de su ma anya ni sua nto.26Sobon nsubiya Yesu de su ma a Makidoniya nja Akaya su beyi kyawuta su de su sua nsu potoruwa ntani de su ma a Jeriselen nto.27Tunani mu e ma na su la; sede, gaskye e ma ANKI su la de su sua su nto. kode worede su ma Yawudawa ba su samu lobo ni anabirika su ni aworo dege anya Yawudawa la, sobon yomu e kamata de worede su ma Yawudawa ba su sua ba su anabirika ni keyi nani su.28Nde Ni gama ANKI mu na kwa ba su guru gyolo de su tala sobon nsu, Na kuma te a Sipen de Ni gesheku ayan.29Nde Ni zo anya ku, Ni shina nkye Na zo ku ni sisika anabirika ni Kiristi.30Mma ologba ku, yayuwa, sobon Obagizi mu Yesu Kiristi nja sobon so de Aworo yi mu: ku sua ni nto yi lepa soseyi ta anya Mirikisi.31ku yi lepa de ni samu sila dege worede su beigaskye ba de su ma a kesa ni Judiya nja de ANKI na yaama mbo keleba anya ntani Mirikisi.32Yomuna na zo anya ku ni perisiki, nde e ma nupi Mirikisi la, de nsamu pushe nja ku.33Bila de Mirikisi nsu beyi selema, e ma nja ku guru. Ema yomu
The Word for the World International