Pelesa6
1Ayani Ni geni Yaa Timshiya Mirikisi bure daa a siki kwaro bokwe ni, se Ni zi daa a siki daba nsu leyi wuru mu dege murinya nsori kankye akpala nkye, <<Zo!>>2De Ni kone, se Ni geni doki peri. Nsude e ma nyunwa doki ni e keyi manta, su beyi lende. E butu te a woze kankye nsude yi yanki de shakiya ntani.3Nkayom Yaa Timshiya Mirikisi bure kwaro ni bi; se Ni zi daba nsu leyi ni bi nkye, <<Zo!>>4Anya ni se doki daa butu jaa zuru. Nsude ma nyunwa yi su beyi sori de e keyi yanki zo nshi a durinya, sobon de ntani su kisa nkiya su. Su beyi totolo obalaba.5De Yaa Timshiya Mirikisi bure kwaro ni wuku jaja; se Ni zi daba nsu leyi ni wuku nkye, <<Zo!>> Nkayom de Ni kone, ni geni doki daa beki, Nsu nyunwa yi keyi gongo gonta a nani yi.6Anya ni Ni zi murinya butu ni kala kankye dege siki ni daba nsu leyi wuru, de nkye, <<Gongo gonta saba alikama ni yowa gyolo de nsu ANKI gyolo yaa samu a nana daa, nja gongo gonta wuku ni saba bali ni yowa gyolo de nsu ANKI gyolo yaa samu a nana daa. Sede kede ki bebeta mayi zetu nja riki ni inabi ba!>>7De Yaa Timshiya Mirikisi bure kwaro ni wuru; ayan se Ni zi daba nsu leyi ni wuru nkye, <<Zo!>>8De Ni kone, Ni geni doki ruwa genya. Nsu nyunwa yi sua sukwa yi nkye Muntu, nja anya zunwa nsu muntu ma biya e yi a beyi. Su ba su yiko de su zo yanki nja nyunwa durinya nja rebi ni daba ni sanwa.9Se Yaa Timshiya Mirikisi bure kwaro ni biyari. Ayan a karishe ni anya de su ma munka sedeka Ni geni leyi ni worede su kisa su sobon kelima beta Mirikisi nja sheeda de su yi.10Se su yi kuruwa nsori su nkye, Obagizi Nsu yiko, nsuseki nja nsu gaskye! Ari woshe la ka yi ntani durinya shiriya nja poro sobon kisa mu de su meyi mu?>>11Konse a siki su su ba su peri riga. Su gye su de su pushe piri, ari su sika aworo ni nsu oboki ankisu nja nsubiya Yesu de su kisa su, su tala yiride su ma.12Se Ni geni Yaa Timshiya Mirikisi bure kwaro ni shida. Se su yi totolo zizika kisi, nana juyi beki kiri kankye beki woriki, wonta juyi jaa kankye zini.13Kem su puari a kisi, kankye yiride yaya ntasi bori de su nunu ba su ma puari dege ntasi nde akusuka nsu sori pula su.14Se bisi beeta kankye yiride su ma lende kalanga nja sukwa butu guru dunsi nja guru anya de riki gyowe yi dege anya de e ma.15Se nsu seleki ni durinya, nja nsu solota nja toree ni shoja, nsu mbo a nani nja nsu yiko nja guru ntani, bunwa nja worede su ma bunwa ba, su boyi nkyasu a siki koga dunsi nja kisi ogbo.16Su mayi kuruwa sukwa totolo ogbo nja dunsi nkye, <<Puari girika mu de ki boyi mu dege pisika ni nsude zunwa a kiya kingbolo nja dege anwashi ni Yaa Timshiya Mirikisi!17Sobon totolo nana anwashi su e zo, waa yi yaa sakisi yi geba nja shi?>>
The Word for the World International