Pelesa16
1Se ni zi totolo murinya dege laki Mirikisi meyi beta meleku bokwe mu nkye: <<Ku juyi kosoko bokwe ni anwashi Mirikisi mu a durinya!>>2Meleku ni pari te juyi mbode ma a siki kosuko yi a durinya. Se mumungu okpoto nsu zapi butu a nki worede su man alama ni daba mu nja worede su ma bowuta sapi yi.3Se meleku ni bi juyi mbode ma a siki kosuko yi a totolo riki. Riki juyi ma kankye zini nsebeki de e muntu, se guru mbo nsu leyi de ma a siki riki muntu.4Se meleku ni wuku juyi mbode ma a siki kosuko e yi nya a ndan miya nja totolo riki, se su juyi ma zini.5Ni zi meleku de ma kpanku riki nkye, <<Shiriya ma gaskye la, E ke Nsuseki, e ke de ki ma a kwanki mu ki kwa ma a kwanki de bise!6Su nya zini ntani Mirikisi nja nsu anebi a kisi, nkayomuwa ki ba su zini de su sha. Su ma keleba nani wuta ni mbode su yi!>>7Se Ni zi murinya butu dege siki bagedi nkye, <<Obagizi Mirikisi nsu pi Girima! shiriya ke e ma Gaskye nja gangasi la!>>8Se meleku ni wuru juyi mbo de ma a siki kosuko e yi nya a nana, su bila de nana e suwuta ntani ni zapi yi.9Zapi mu suwuta ntani, na su basi seni Mirikisi, nsu de mani yiko a kiya mbo woromu. Sede su ki juyi bila lepi asu de su bowuta Mirikisi.10Meleku ni biyari juyi kosuko yi nya a kingbolo solota ni daba mu. Se dopuwa ripe solota ni daba mu kpataka, ari ntani sua suku arishiya su ni ankuri sobon Genbeki,11nja su basi ni Mirikisi bisi a kiya Genbeki nja suwo de sua zi. Sede su bila turiki mumungu asu ba.12Se meleku ni shida juyi kosuko nya a totolo riki ni Yupiretis. Ndan riki mu kyekeri, de e gyala salaki turiki nsu de butu anse.13Se ni geni mungu aworo guda wuku de su ma kankye anzuani. Se mungu aworo yaa butu a siki baki ni gazimari, nja baki ni daba mu nja baki ni anebi nsu yaruwa.14Su ma aworo ni arizeni de yaa yi mbo mamanki. Aworo guda wuku mu su butu te anya guru Salaki ni durinya, de su zo nsu anya daa sobon yanki a totolo nana shiriya ni Mirikisi nsu de pi yiko.15<<Ku zi! Na zo kankye bolowa! Nsu perisiki na nsude yaa kpanku keyi, sobon kede e yi tepiya totombolo de e zi kumnya a siki ntani!>>16Se Aworo tala Salaki anya daa de Yawudawa sua sukwa yi Amagedon.17Se meleku ni bokwe juyi kosuko yi te nya akusuka. Murinya daa butu nsori a kingbolo ni solota, nkye e yaa ka.>>18Se mu geni waliwali ni wuta, nja kala ni aradu, na riki nja totolo burunwa kesa de tunde su yi nsebeki; burunwa kesa nsum na e pi guru!19Totolo geri mu e laba gizi wuku, nja geri ni guru kesa su juru. Mirikisi turunwa ni totolo kesa Babila Mirikisi sayi sha riki a sika koshiya ni anwashi e yi.20Guru kesa de riki gyowe su beeta, guru ogbo su beeta.21Totolo dunsi, de loni su yaa keyi kankye kilo deri, puari dege bisi a kiya ntani, se su basi Mirikisi a kiya mbode paru, sobon mbode paru mu e yi mungu soseyi.
The Word for the World International