Pelesa13
1Se ni geni daba da butu a siki totolo riki. E mani koho gom nja kiya bokwe; E mani lende a kowoni koho, se a kowoni kiya e yi e man seni de su rubuta ni nene Mirikisi.2Daba de ma kankye tamusu, seni yi ma kankye ni kere bikiya nja baki yi ma kankye ni zaki. Ododo de ma kankye Meshi mu ba daba ni sori yi, nja kingbolo solota yi, nja girima yiko yi.3Kiya ni da a siki daba mani minki totolo de zi suwo soseyi, sede minki worikye. Se guru durinya sua zi mamanki sua biya daba.4Ntani sua bowuta totolo mesi de yaa sa womba kankye <drago> mu sobon e ba daba yiko yi. Se sua bowuta daba mu, sua nkye, <<Waa ma kankye daba mu? Waa na ma yi yaa yi yanki nja shi?>>5Su bila daba mu yaa dege dolo yaa la kankye ema Mirikisi, nja yaa mani dama ni yi yiko ni shekera wuku ni wonta shida.6Se daba ni bashi Mirikisi, nja e bashi seni Mirikisi. E kwa bashi anya de Mirikisi yaa zunwa, nja guru worede sua ma a bisi nja Mirikisi.7Su bila daba ni de e yi yanki nja ntani Mirikisi Nsuseki se e yi nasara a kiya su. Se su kwa beyi yiko a kiya guru yare, nja arishiya, nja kesa, ntani durinya.8Guru ntani de sua zunwa a durinya sua bowuta yi, sede worede kapi kapa durinya seni asu ma a siki takada leyi ni yaa Timshiya ni Mirikisi de su kisa yi.9<<Ku zi! Du nsude mani kuni zi! e zi!10Du nsude sua bila keyi dole na su ka yi; du nsude sua bila kisa yi ni tokopi dole na su kisa yi ni tokopi. Sukwa mu e ma ni nsu kaa dishiya ni ankuri nja beigaskye ni ntani Mirikisi.>>11Se Ni sakye geni woni daba, de e butu a siki kesa. E ma ni koho bi kankye ni Yaa Timshiya Mirikisi, se yaa yi beta kankye daba de ma kankye meshi sua sukwa yi dragon.12Yaa yi ampani ni guru yiko ni daba nsu sa womba ni pari de yi solota nja su amomoko daba nsu sa womba ni pari agebe yi. E sa dole durinya nja guru worede sua ma a sika yi sua bowuta daba nsu sa womba ni pari, de okpoto yi worikye.13Daba ni bi mu yi totolo mbo mamanki. E sa wuta butu dege bisi zo a kisi a durinya a geba ni kowon nseda.14Daba nsu sa womba ni bi mu shishirigye guru ntani durinya te anya mbo mamanki de su bila yi de yi a geba daba nsu sa womba ni pari. Daba nsu sa mu gye ntani durinya guru nkye su gina gunki daa de sua beyi girima te nja daba nsu sa womba mu de e zi suwo ni tokopi nzun yomu e man leyi.15Su saki beyi dama ba daba ni bi nsu sa womba de e pula amunshi ni leyi a siki gunki daba ni pari nsu sa womba mu, sobon de gunki ni e yi beta nja de e kisa du nsude ki bowuta yi.16Daba nsu sa womba mu sa ntani de dole su yi ntani lomba, yaya dende nja toree, nsu mbo nani nja potoruwa, bunwa nja nsu yenshi, de su man lomba a nani dama ko agaa su.17Ba nse da de yaa see ko yaa la mbodaa nde e mani lomba ni ba, wato, seni ni daba mu de ma lomba ni seni yi.18Yi anpani ni simi ke de ki gane mbo mu. Du nsude e man shina ko simi yaa gane maana alama ni daba nsu sa womba mu. Sobon lomba mu e ma seni nse beki na. alama ni seni e yi e ma 666.
The Word for the World International