Pilimon1

1Manki dege Bulusu, de ma a jaru sobon Kiristi Yesu, nja yayiwa mu Timoti,
Te anya oboki anki mu Pilimon,
2nja nsubiya Yesu de su ma tala a gizi ke, nja yayiwa mu ni mase Apiya, nja yayiwa mu Akibu de ma yi anki kankye shoja ba womba:
3Bila de Mirikisi Adaa mu nja Obagizi Yesu Kiristi e ba ku aniyeri nja selema.
4Yayiwa na Pilimon, guru kwanki de mma yi lepa, mma turunwa nke a siki lepa na mma gbede Mirikisi.5Sobon ni zi nabari so de ki ma nana guru ntani Mirikisi nja beigaskye ke de ki manshi a siki Obagizi Yesu.6Lepa na e shiya ma de zumunshi mu nja ke yiri ni nsu beigaskye gane soseyi a kiya guru mbo anabirika mbo kyakyawu de ma namu a siki Kiristi.7Yayiwa na So ke, e zo ni nyowa perisiki nja sori guyamu! sobon ntani Mirikisi nyowa samu sori dishiya.
8Nkayomua Ni yi sori dishiya, kankye yayiwa ke a siki Kiristi, de Ni gye ke ki yi mbode e kamata de ki yi.9Sede sobon mma so ke, na ni geni e yi kyawu de Ni pata ke. Ni yi yomuna kode Ni ma Bulusu, susupe nse a siki Kiristi Yesu, a kwanki mu ni kwa ma yaa jaru sobon Kiristi Yesu.10Mma yi ologba ke amomoko yaa na Onisimus, de ni ma kankye adaa yi a siki Kiristi; a kwanki de ni ma a siki jaru Ni ma adaa yi ni siki aworo.11A beyi ema ni ampani ba, sede kuzukam ema nsu ampani anya mu guru.
12Mma saka yi zo anya ke kuzukam, nsude dishiya na ma anya yi.13Mma bila de e ma anya mu nja ni, de Ni ma a siki jaru sobon nabari kyakyawu, de e sua ni nto a momoko ke.14Sede Na bila de ni sa ke dole de ki sua ni nto ba; sede Na bila de ki yi ni yeda dishiya ke. Nkayomu Na yi mbodaa ba se ni yeda ke.
15Yaa ma nkye Onisimus e bila ke ni kwanki piri, sobon de ki kua keleba yi de e yi zunwa nja ke ni ari gbogbo naa.16Kuzukam e ma bunwa na kokowe ba, sede e pi bunwa: e shi ema yayiwa de mma so a siki Kiristi. Ema nsude mma so na soseyi sede anya ke ki pi so yi! Kankye bunwa nja kankye yayiwa asiki Obagizi
17Nde, ki mani tunani nkye muma oboki ANKI ke, ki yi naba yiride ka yi ni naba.18Nde Onisimus yi ke mbodaa mumungu ko ki ma biya yi bashi mbodaa ki sa ni de ni biya.19E ni Bulusu mma rubuta mbo mu nnani na: Na biya ba ke. ki shina nkye na biya ke bashi ni kiya ke sobon e ni na keyi ke nabari kyakyawu.20Yayiwa na, na ologba ke, de ki yi aniyeri sobon Obagizi, yiri ni yayiwa a siki Kiristi, bwala ni dishiya!
21Ni tabata ka yi mbode ni rubuta ke nshi, ni shina ka yi pi mbode ni minya ke de ki yi
22Ari kuzukam, mma bila de ki gyala ni laki de sonka a siki yi, sobon ni sadishiya nkye Mirikisi yaa zi lepa ku guru de E kuma ni zo anya ku.
23Apaparasi, nsude ma nja ni a jaru sobon kiristi Yesu, saka ku ni gesuwa yi,24yomu du nzun nsu oboki ANKI na Marikusu, Aristakus, Demasi nja Luka.
25Bila de aniyeri ni Obagizi Yesu Kiristi ema nja ku guru.

The Word for the World International

https://app.library.bible/content/14c608286b5b94d2